Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzliyə heyvan və bitki sağlamlığı sahəsində təyin olunmuş latviyalı beynəlxalq müşavir - Ringoldsv Arnitis.

Qeyd edək ki, beynəlxalq müşavirlərin cəlb edilməsində məqsəd ölkəmizdə qida təhlükəsizliyi sisteminin davamlı inkişaf etdirilməsi, milli qanunvericilik aktlarının beynəlxalq tələblərə uyğunlaşdırılması, risk qiymətləndirilməsi, fitosanitar, baytarlıq sahəsində çalışan mütəxəssislərin bilik və bacarıqlarının artırılması, kadr hazırlığının yüksəldilməsidir.

Latviyadan seçilmiş müşavir Ringoldsv Arnitis hazırda Latviyada Riqa Dövlət Bitki Mühafizə Xidməti direktorunun baş məsləhətçisi vəzifəsində çalışır. 27 illik iş təcrübəsinə malik R. Arnitis qida təhlükəsizliyinin müxtəlif sahələri üzrə İtaliya, İspaniya, Latviya və Fransada çalışıb, habelə ölkəsində Parlament katibi, Kənd Təsərrüfatı Nazirliyində məsul vəzifələri icra edib. Azərbaycanda da fəaliyyət göstərən Ringoldsv Arnitis 2019-cu ildən ölkəmizdə Beynəlxalq Fitosanitar məsləhətçi kimi çalışır.

Bundan başqa, cənab Arnitis səmərəli və uzunmüddətli fəaliyyətinə görə 2008-ci ildə Latviya hökuməti tərəfindən təltif edilib. Kənd təsərrüfatı naziri tərəfindən “Çalışanlıq üzrə” və Ərzaq və Baytarlıq Xidmətindən “Əməkdaşlıq üzrə” medalları ilə təltif olunub.

Yüksək bilik və təcrübəyə malik şəxs kimi o, həmçinin Ərzaq və Kənd Təsərrüfatı Təşkilatında (FAO) və İPCC, Minsk, Belarusiya, Rusdilli ölkələrdə potensialın artırılması üzrə fitosanitar mütəxəssislər üçün, ABŞ-da Kənd Təsərrüfatı İdarəsi və Heyvan və Bitki Sağlamlığına Nəzarət Xidmətində (USDA / APHIS), Merilend (Amerika Birləşmiş Ştatları) "Bitki Sağlamlığı Sisteminin Təhlili” adlı və ingilis dili bilikləri, digər inzibati məsələlər üzrə müxtəlif təlim kurslarında iştirak edib.