Azərbaycan Respublikası Qida Təhlükəsizliyi Agentliyinin dövlət qulluqçularının Etik Davranış Qaydaları

Məlum olduğu kimi, Azərbaycan Respublikasının Qida Təhlükəsizliyi Agentliyi (bundan sonra – Agentlik) sədrinin 2018-ci il 7 yanvar tarixli Ü/003 nömrəli əmri ilə “Azərbaycan Respublikası Qida Təhlükəsizliyi Agentliyinin dövlət qulluqçularının Etik Davranış Qaydaları” (bundan sonra – Qaydalar) təsdiq edilmişdir.

Azərbaycan Respublikasının 2022-ci il 30 dekabr tarixli 788-VIQD nömrəli Qanunu ilə “Dövlət qulluqçularının etik davranış qaydaları haqqında” Qanunda edilmiş dəyişikliklərə əsasən, dövlət orqanlarında etik davranış qaydalarının tətbiqi, bu sahədə maarifləndirmə və mübahisələrin həlli məsələlərinə məsul olan etik davranış üzrə müvəkkil təyin edilməlidir.

Bundan başqa, keçən dövr ərzində mövcud sahədə inkişaf, eləcə də sözügedən Qanuna dəyişiklər nəticəsində Qaydaların yenidən hazırlanaraq təsdiq edilməsinə zərurət yaranmışdır.

Qeyd edilənləri nəzərə alaraq, Azərbaycan Respublikası Prezidentinin 2017-ci il 13 noyabr tarixli 1681 nömrəli Fərmanı ilə təsdiq edilmiş “Azərbaycan Respublikasının Qida Təhlükəsizliyi Agentliyi haqqında Əsasnamə”nin 5.5.10-cu yarımbəndini rəhbər tutaraq

ƏMR EDİRƏM:

1. “Azərbaycan Respublikası Qida Təhlükəsizliyi Agentliyinin dövlət qulluqçularının Etik Davranış Qaydaları” təsdiq edilsin (əlavə olunur).

2. Agentlik Aparatının rəhbəri Elxan Mikayılov etik davranış üzrə müvəkkil təyin edilsin.

3. Agentlik sədrinin 2018-ci il 7 yanvar tarixli Ü/003 nömrəli əmri ləğv edilsin.

4. Agentlik Aparatının struktur bölmələrində və strukturuna daxil olan regional bölmələrdə çalışan əməkdaşların Qaydalarla tanış olması və onun tələblərinə ciddi riayət edilməsi təmin edilsin.

5. Agentlik Aparatının Hüquq, kadr və icraya nəzarət şöbəsi bu əmrin surətinin aidiyyəti üzrə göndərilməsini təmin etsin.

6. Agentlik Aparatının Hüquq, kadr və icraya nəzarət şöbəsinə və Daxili nəzarət sektoruna tapşırılsın:

6.1. etik davranış üzrə müvəkkilin fəaliyyətinin təşkilində əməli köməklik göstərsinlər;

6.2. “Dövlət qulluqçularının etik davranış qaydaları haqqında” Azərbaycan Respublikası Qanununun müvafiq maddəsində nəzərdə tutulmuş  etik davranış üzrə müvəkkilin aidiyyəti vəzifə və səlahiyyətlərinin həyata keçirilməsinə dəstək göstərsinlər;

6.3. bu əmrdən irəli gələn məsələlərin həll edilməsini, müntəzəm təhlillərin aparılmasını, məlumatların ümumiləşdirilməsini və müvafiq təkliflərin verilməsini təmin etsinlər.

7. Agentlik Aparatının İnformasiya təminatı və innovativ həllər şöbəsi bu əmrin 1-ci bəndi ilə təsdiq edilmiş Qaydaların Agentliyin rəsmi internet saytında yerləşdirilməsini təmin etsin.

8. Bu əmrin icrasına nəzarət Agentliyin sədr müavini Əziz Şərifova həvalə edilsin.