Giriş
Daha 27 müəssisədən Rusiya Federasiyasına pomidor və alma məhsullarının ixracına icazə verilib
3 Mart 2021 20:16
Azərbaycan Respublikasından Rusiya Federasiyasına ixrac olunan pomidor və alma məhsullarına tətbiq edilən məhdudiyyətlərin aradan qaldırılması istiqamətində Azərbaycan Respublikasının Qida Təhlükəsizliyi Agentliyi (AQTA) və aidiyyəti qurumların birgə tədbirləri davam etdirilir.
AQTA ilə Rusiya Federasiyasının Baytarlıq və Fitosanitar Nəzarəti üzrə Federal Xidməti (Rosselxoznadzor) arasında aparılan müzakirələr nəticəsində 8 alma və 19 pomidor istehsalı müəssisəsinə məhsullarının Rusiya Federasiyasına ixracına icazə verilib.
Belə ki, həmin ölkənin müvafiq qurumu tərəfindən "Met-Ak" MMC, "FruitsByJan" MMC, "Qalagro" MMC və "FruitGarden" MMC-dən, habelə fiziki şəxslər Həsənov Elşən Hörmət oğlu, Piriyev Yusif Məmmədəli oğlu, Şirinov Mehman İsmayıl oğlu və Zulbalayev Elçin Mövludağa oğluna məxsus müəssisələrdən alma məhsulunun, "Agro-Nom" MMC, "Kaskad-Agro" MMC, "Agro Vest" MMC, “Red Globe" MMC, "Big Store" MMC, "Eco Prod" MMC, "T.T.Ş.-İnşaat" MMC, "ARAS" MMC, "Hamacoğlu Agro" MMC və "Türkan Aqro" MMC-dən, habelə fiziki şəxslər Cəfərov Zahid Həbib oğlu, İsayeva Gülnar Namik qızı, Qurbanov İskəndər Rasim oğlu, Qəmbərov Nizami Fəxrəddin oğlu, Axundova Aida Zahid qızı, Qocayev Rəsul Mehman oğlu, Cəbrayılov Məlikməməd Saday oğlu, Fərəcov Novruz Mürşüd oğlu və Məsimova Sücayət Qurban qızına məxsus müəssisələrdən isə pomidor məhsulunun Rusiya Federasiyasına ixracı mümkün olacaqdır.
Qeyd edirik ki, Rusiya Federasiyasına alma ixracına icazə verilmiş müəssisələrin ixrac potensialı 114.382 ton təşkil edir ki, bu da 2020-ci il ərzində həmin ölkəyə ixrac olunan 66.924 ton alma məhsulunun 170,9 %-i həcmindədir. Eyni zamanda, pomidor ixracına icazə verilmiş müəssisələrin ixrac potensialı 224.168 ton təşkil edir ki, bu da 2020-ci il ərzində Rusiyaya ixrac olunan 179.956 ton pomidor məhsulunun 124,5 %-ni təşkil edir.
Hazırda AQTA ilə Rosselxoznadzor arasında məhdudiyyətlərin aradan qaldırılması istiqamətində intensiv müzakirələr davam etdirilir.
Onu da xatırladırıq ki, bu günə qədər Rusiya Federasiyasının müvafiq qurumu tərəfindən ölkəmizdə fəaliyyət göstərən 70 pomidor, 46 alma istehsalı müəssisəsindən həmin ölkəyə məhsul ixracına icazə verilib.
Oxşar xəbərlər
Sahibsiz heyvanların sığınacaqla təmin edilməsi istiqamətində tədbirlər həyata keçiriləcək
“Azərbaycan Respublikasında qida təhlükəsizliyinin təmin edilməsinə dair 2027–2032-ci illər üçün Dövlət Proqramı”nda heyvan sağlamlığı və biotəhlükəsizliyə nəzarət sisteminin təkmilləşdirilməsi istiqamətində sahibsiz heyvanların sığınacaqlarla təmin edilməsi ilə bağlı tədbirlərin həyata keçirilməsi nəzərdə tutulur. Azərbaycan Respublikası Qida Təhlükəsizliyi Agentliyinin Heyvan sağlamlığı və bioloji təhlükəsizlik şöbəsinin müdiri, respublikanın baş dövlət baytarlıq müfəttişi Qalib Əbdüləliyev Dövlət Proqramında nəzərdə tutulan tapşırıqların icrası ilə bağlı məsələlərə aydınlıq gətirib. Ətraflı:
Aldığımız ətin mənşəyini necə öyrənə bilərik? - VİDEO
Heyvan mənşəli məhsulların təhlükəsizliyinin təmin olunmasında heyvanların identifikasiyası və izlənilməsi mühüm əhəmiyyət daşıyır. Belə ki, heyvan doğulduğu andan etibarən onun fərdi identifikasiyası aparılır. Əldə olunan məlumatlar Avtomatlaşdırılmış Qida Təhlükəsizliyi İnformasiya Sistemində (AQTİS) qeydiyyata alınır. Sistem vasitəsilə heyvanın saxlanıldığı təsərrüfat, onunla bağlı həyata keçirilən baytarlıq tədbirləri barədə məlumatların izlənilməsi təmin edilir. Bu, heyvanın təsərrüfatdan bazara və kəsim məntəqəsinə qədər hərəkətinin izlənilməsinə imkan yaradır. İdentifikasiya və izlənilmə sistemi heyvan xəstəliklərinin vaxtında aşkarlanması və qarşısının alınması, baytarlıq tədbirlərinə nəzarətin gücləndirilməsi, həmçinin heyvan mənşəli məhsulların təhlükəsizliyinin təmin olunması baxımından əhəmiyyətlidir. Beləliklə, istehlakçının aldığı ətin mənşəyi ilə bağlı məlumatın geriyə doğru izlənilməsi heyvanın yetişdirildiyi təsərrüfata qədər mümkündür. Bu imkanın əsasını isə heyvanların identifikasiyası təşkil edir. Daha ətraflı:
Ölkədə fəaliyyətə başlayan heyvan bazarlarının sayı 20-yə çatıb
Cəlilabad və Zaqatala rayonlarında yerləşən heyvan bazarlarının biotəhlükəsizlik, həmçinin müasir standartlara uyğun yenidənqurma və abadlaşdırma işlərindən sonra fəaliyyətinə icazə verilib. Belə ki, bazarların giriş-çıxış qapısında dezbaryerlər quraşdırılıb, baytarlıq nəzarəti zamanı xəstəlik əlamətləri aşkar edilən heyvanların digər heyvanlardan təcrid olunaraq saxlanılması məqsədilə xüsusi izolyatorlar tikilib. Bazar əraziləri asfaltlanıb, heyvanların rahat və təhlükəsiz hərəkətini təmin etmək məqsədilə rampalar və çardaqlar quraşdırılıb. Eyni zamanda, baytar həkimlərin nəzarəti həyata keçirməsi üçün xüsusi məntəqə yaradılıb. Aparılan qiymətləndirmə nəticəsində heyvan bazarında bioloji təhlükəsizlik və dövlət baytarlıq nəzarətinin həyata keçirilməsi üçün zəruri şəraitin yaradıldığı müəyyən edilib. Bundan başqa yeni tikilən və yenidən qurulan heyvan bazarlarında identifikasiya sisteminin tətbiqi üçün də şərait təmin olunub. Bu sistem heyvanların təsərrüfatlar arasında, eləcə də təsərrüfatlardan kəsimxanalara qədər izlənilməsinə imkan verir. Qeyd edək ki, ölkə üzrə artıq 20 heyvan bazarı AQTA Kollegiyasının 50 nömrəli Qərarı ilə təsdiq edilmiş “Heyvan bazarlarına dair baytarlıq-sanitariya norma və qaydaları”na uyğun yenidən qurularaq istifadəyə verilib. Hazırda ölkənin bir sıra heyvan bazarlarında yenidənqurma və abadlaşdırma işləri davam etdirilir. Link:
