Giriş
Amerika ağ kəpənəyi ilə bağlı maarifləndirici görüşlər keçirilir
8 Sentyabr 2026 17:44
Azərbayca Respublikasının Qida Təhlükəsizliyi Agentliyinin əməkdaşları tərəfindən Amerika ağ kəpənəyinin yayılmasının qarşısının alınması və zərərvericiyə qarşı mübarizə tədbirləri barədə əhalinin məlumatlandırılması məqsədilə Şəki rayonunun Aşağı Göynük, İnçə, Biləcik, Baltalı, Zaqatala rayonunun Aşağı Tala, Göyəm, Maqov və Fındıqlı kəndlərində maarifləndirici tədbirlər keçirilib.
Görüşlərdə sakinlərə zərərvericinin xüsusiyyətləri, yayılma yolları, bitkilərə vurduğu zərər və ona qarşı mübarizə tədbirləri haqqında ətraflı məlumat verilib. Tədbirlər çərçivəsində sakinlərə maarifləndirici bukletlər paylanılıb, onların sualları cavablandırılıb.
AQTA tərəfindən Amerika ağ kəpənəyinin yayılmasının qarşısının alınması, bitki sağlamlığının qorunması və əhalinin bu istiqamətdə məlumatlılığının artırılması məqsədilə maarifləndirici tədbirlər davam etdirilir.
Oxşar xəbərlər
"Piano Hall" şadlıq evində nöqsanlar aşkarlanıb
Nəzarət tədbirləri çərçivəsində Azərbaycan Respublikası Qida Təhlükəsizliyi Agentliyinin (AQTA) əməkdaşları Bakı şəhəri, Nizami rayonu, Babək prospekti, ev 5A ünvanında yerləşən, fiziki şəxs Aslanlı Raul Samir oğluna məxsus "Piano Hall" şadlıq evində yoxlama keçirib.
Qida təhlükəsizliyi tələblərinə cavab verməyən obyektin fəaliyyəti məhdudlaşdırılıb
Azərbaycan Respublikası Qida Təhlükəsizliyi Agentliyinin əməkdaşları Masallı rayonu, İsgəndərli kəndində fəaliyyət göstərən Zeynalov Şöhrət Ağakərim oğluna məxsus təndirxanada plandankənar yoxlama keçirib. Baxış zamanı qida obyektində normativ hüquqi aktların tələblərinin pozulduğu məlum olub. Obyektdə mənşəyi məlum olmayan toyuq məhsulları aşkarlanıb, həmçinin sanitar-gigiyenik və sanitar-texniki nöqsanlar müəyyən edilib. Faktla bağlı qanunamüvafiq tədbirlər görülüb, obyektin fəaliyyəti nöqsanlar aradan qaldırılanadək məhdudlaşdırılıb.
AQTA və Fransa Kənd Təsərrüfatı Nazirliyinin nümayəndələri arasında görüş keçirilib
Azərbaycan Respublikası Qida Təhlükəsizliyi Agentliyinin (AQTA), Fransa Respublikası Kənd Təsərrüfatı Nazirliyinin və Heyvandarlıq üzrə Tətbiqi Tədqiqat və Texniki İnstitutunun (IDELE) nümayəndələri arasında heyvanların identifikasiyası və qeydiyyatı sahəsində təcrübə mübadiləsi məqsədilə onlayn görüş keçirilib. Görüşdə Azərbaycanda Heyvanların İdentifikasiyası və Qeydiyyatı Sisteminin (HİQS) təkmilləşdirilməsi, həmçinin “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı” çərçivəsində bu istiqamətdə həyata keçirilməsi nəzərdə tutulan tədbirlər müzakirə olunub. Tədbir zamanı Fransada heyvanların identifikasiyası və qeydiyyatı sisteminin təşkili, heyvanların fərdi identifikasiyası, məlumatların elektron qaydada qeydiyyatı və idarə olunması, aidiyyəti informasiya sistemləri ilə inteqrasiya, eləcə də heyvanların hərəkətinin izlənilməsi və məlumatların uçotu üzrə tətbiq olunan yanaşmalar barədə təqdimatlar keçirilib. Görüşdə HİQS-in texniki və institusional aspektləri, informasiya texnologiyalarından səmərəli istifadə, məlumat bazalarının idarə olunmasında Fransa təcrübəsi və sistemin inkişaf etdirilməsi imkanları ilə bağlı fikir mübadiləsi aparılıb. Sonda heyvanların identifikasiyası və qeydiyyatı sahəsində Azərbaycan və Fransa arasında əməkdaşlığın, o cümlədən qarşılıqlı təcrübə mübadiləsinin davam etdirilməsinin əhəmiyyəti vurğulanıb.
