Giriş
AQTA sədri Qoşqar Təhməzlinin rəhbərlik etdiyi nümayəndə heyəti Fransa və Belçikada səfərdə olub
1 Aprel 2019 10:15
Azərbaycan Respublikasının Qida Təhlükəsizliyi Agentliyinin (AQTA) sədri Qoşqar Təhməzlinin rəhbərlik etdiyi nümayəndə heyəti Fransaya səfər edib.
Agentliyin nümayəndə heyəti Avropa və Aralıq Dənizi Bitki Mühafizəsi Təşkilatının (EPPO) baş direktoru Nico Horn, Ümumdünya Heyvan Sağlamlığı Təşkilatının (OİE) baş direktoru Monik Eluan, Fransanın Qida üzrə Baş Direktorluğunun (DGAL) Avropa və beynəlxalq sanitar məsələlər üzrə departamentinin rəhbəri Şarl Martən və Qida, Ətraf Mühit, Əmək Sağlamlığı və Təhlükəsizliyi üzrə Milli Agentliyin (ANSES) Tədqiqatlar üzrə baş direktoru doktor Jil Salvanın rəhbərlik etdiyi nümayəndə heyətləri ilə görüşüb.
Görüşlərdə Q. Təhməzli dövlət başçısı tərəfindən aparılan institusional islahatlar çərçivəsində yaradılmış Azərbaycan Respublikasının Qida Təhlükəsizliyi Agentliyinin missiyası və fəaliyyət istiqamətləri ilə bağlı iştirakçılara geniş məlumat verib.
Avropa və Aralıq Dənizi Bitki Mühafizəsi Təşkilatının (EPPO) baş direktoru Nico Horn ilə görüşdə əhalinin sağlam qida məhsulları ilə təmin olunması istiqamətində Agentlik tərəfindən həyata keçirilən tədbirlərdən, bitki mühafizəsi sahəsində mövcud vəziyyət və qarşıya çıxan problemlərdən bəhs edib. Bildirilib ki, ölkəmizin 20 faiz torpaqları erməni işğalı altındadır və bu torpaqlar nəzarətdən kənar olduğu üçün bitki mühafizəsi sahəsində zərərvericilərə qarşı mübarizə aparmaq, onların qarşısını almaq mümkün deyil və bu fitosanitar nəzarət sahəsində və bitkiçilik məhsullarının ixracında müəyyən çətinliklərin yaranmasına səbəb olur. İşğal altında olan torpaqlarda bitki sağlamlığını təmin etmək və zərurət yarandıqda karantin tətbiq etmək hazırki şəraitdə qeyri-mümkündür. Bildirilib ki, EPPO nüfuzlu beynəlxalq təşkilat kimi bu istiqamətdə öz missiyasına uyğun olaraq, müəyyən tədbirlər həyata keçirə və işğal olunmuş Azərbaycan torpaqlarında fitosanitar vəziyyəti diqqətdə saxlaya bilər.
Görüşdə EPPO-nun e-fresco Komissiyası çərçivəsində ölkəmizdə bitki sağlamlığı və fitosanitar nəzarət üzrə elmi tədqiqat işlərinin aparılmasına, eləcə də bitki sağlamlığı və fitosanitar nəzarət sahəsi üzrə kadr hazırlığına müvafiq texniki dəstək göstərməsinə dair müzakirələr aparılıb. “2020-ci il Beynəlxalq bitki sağlamlığı ili” üzrə EPPO-nun regional tədbirlərindən birinin Azərbaycan Respublikasında keçirilməsi təşəbbüsü irəli sürülüb.
Ümumdünya Heyvan Sağlamlığı Təşkilatının baş direktoru Monik Eluanın rəhbərlik etdiyi nümayəndə heyət ilə görüşdə heyvan sağlamlığı sahəsində həyata keçirilən tədbirlər və yeni yaradılacaq heyvanların identifikasiya sistemi ilə bağlı fikir mübadiləsi aparılıb. Eyni zamanda Abşeron yarımadasının “xəstəliklərdən azad zona” statusu almasına, Qida Təhlükəsizliyi İnstitutu ilə OİE-nin Elmi Komissiyası arasında əməkdaşlıq əlaqələrinin yaradılmasına, heyvan xəstəlikləri ilə mübarizə sahəsində elmi tədqiqatların aparılmasına, eləcə də heyvan sağlamlığı və baytarlıq nəzarəti üzrə kadr hazırlığı ilə bağlı müvafiq texniki dəstək göstərilməsi məsələləri müzakirə olunub.
Fransanın Qida üzrə Baş Direktorluğunun (DGAL) Avropa və beynəlxalq sanitar məsələlər üzrə departamentinin rəhbəri Şarl Martənin və Qida, Ətraf Mühit, Əmək Sağlamlığı və Təhlükəsizliyi üzrə Milli Agentliyin (ANSES) Tədqiqatlar üzrə baş direktoru Jil Salvanın rəhbərlik etdikləri nümayəndə heyətləri ilə görüşlərdə qida məhsullarının idxal və ixracı prosedurları, qida zəncirinin bütün mərhələlərində məhsulların izlənilməsinə dair təcrübə mübadiləsinin aparılması məsələsi müzakirə olunub. Qida təhlükəsizliyinə nəzarət üzrə regional idarəetmə sistemi ilə bağlı fikir mübadiləsi aparılıb.
Qoşqar Təhməzlinin rəhbərlik etdiyi nümayəndə heyəti həmçinin Belçikaya da səfər edib. Nümayəndə heyəti Belçika Krallığının Qida Təhlükəsizliyi üzrə Federal Xidmətinin baş icraçı direktoru Herman Diriks ilə görüşüb.
Görüşdə qida zəncirinin bütün mərhələlərində qida məhsullarının izlənilməsi və geri götürülməsi sisteminin təşkili üzrə təcrübə mübadiləsinin aparılması, qida təhlükəsizliyi, baytarlıq və fitosanitar sahələrdə kadr hazırlığı üzrə əməkdaşlığın həyata keçirilməsi, heyvanların identifikasiyası və qeydiyyatı sisteminin yaradılması zamanı Belçika Krallığının təcrübəsindən istifadə olunması məsələləri müzakirə edilib.
Tərəflər qida təhlükəsizliyinin müxtəlif xidmətləri üzrə mütəxəssislərin mübadiləsi, subyektlərin qida təhlükəsizliyi qeydiyyatının tətbiqi, eləcə də laboratoriyaların strukturunun öyrənilməsi və kadr hazırlığının gücləndirilməsi üzrə Belçika təcrübəsinin öyrənilməsi, Azərbaycan Qida Təhlükəsizliyi İnstitutunun beynəlxalq statusu, akkreditasiyası kimi məsələlərlə bağlı fikir mübadiləsi aparıblar.
Oxşar xəbərlər
Dünyadakı epizootik vəziyyətə uyğun olaraq müvafiq tədbirlər görülür
Azərbaycan Respublikasının Qida Təhlükəsizliyi Agentliyi başqa ölkələrdən respublikamızın ərazisinə keçə biləcək yoluxucu heyvan xəstəliklərindən qorunmaq məqsədilə Ümumdünya Heyvan Sağlamlığı Təşkilatından daxil olan məlumatlar əsasında dünyadakı epizootik vəziyyətə uyğun olaraq müvafiq tədbirlər həyata keçirir. Ümumdünya Heyvan Sağlamlığı Təşkilatının (WOAH) rəsmi məlumatlarına əsasən, Lixtenşteyn Knyazlığının Şellenberq şəhərində və Fransa Respublikasının Bretan regionunda blutanq, Amerika Birləşmiş Ştatlarının Oklahoma ştatında isə yüksək patogen quş qripi xəstəliyi qeydə alınıb. Respublika ərazisinin qeyd olunan yoluxucu xəstəliklərdən qorunması üçün zonalaşma prinsipi nəzərə alınmaqla, Şellenberq şəhərində və Bretan regionunda xəstəlik baş vermiş təsərrüfatdan 150 km radiusda olan məsafədən bütün növ diri iri və xırdabuynuzlu heyvanların, dəvələrin, həmçinin onlara aid genetik materialların, Oklahoma ştatında xəstəlik baş vermiş təsərrüfatdan 10 km radiusda olan məsafədə yerləşən müəssisələrdən diri quş və inkubasiya yumurtalarının, quş ətinin, tərkibində quş emalı məhsulları olan quş ətindən və bütün növ quşçuluq məhsulundan alınan hazır ət məhsullarının (quş qripi viruslarının məhv edilməsini təmin edən termik emala məruz qalan mallar istisna olmaqla), quş yemləri və quş üçün yem əlavələrinin (bitki mənşəli, kimyəvi və mikrobioloji sintez yolu ilə alınmış yemlər və yem əlavələri istisna olmaqla), quşların saxlanması, kəsilməsi və emalı üçün istifadə olunmuş avadanlıqların idxalına WOAH-nin “Quruda yaşayan heyvanların sağlamlıq Məcəlləsi”nə uyğun olaraq müvəqqəti məhdudiyyət tətbiq olunub. Eyni zamanda nəzarət tədbirlərinin gücləndirilməsi məqsədilə qeyd olunan inzibati ərazi vahidlərindən gələn, yaxud tranzitlə keçib respublikamıza daxil olan, habelə respublika ərazisindən tranzitlə digər ölkələrə gedən nəqliyyat vasitələri ilə bağlı müvafiq tədbirlərin görülməsi üçün Azərbaycan Respublikasının Dövlət Gömrük Komitəsinə müraciət olunub.
Azərbaycan ÜHST-nin İdarəetməyə Nəzarət Komitəsinə üzv seçilib
Azərbaycan Respublikası Ümumdünya Heyvan Sağlamlığı Təşkilatının (ÜHST) İdarəetməyə Nəzarət Komitəsinin üzvü seçilib. Komitədə Azərbaycan, Çin, Avstraliya, Avstriya, Norveç, İrlandiya, Kanada, Çili də daxil olmaqla, ümumilikdə, 16 dövlət təmsil olunur. Bu il ÜHST-nin 91-ci Ali Baş Sessiyasında yaradılan komitənin məqsədi sözügedən təşkilatın normativ sənədlərinin yenilənməsi, maliyyə idarəçiliyi və dünyada sahə üzrə prioritet məsələlərin tənzimlənməsi vəziyyətinin monitorinqinin aparılması və təkmilləşdirilməsindən ibarətdir. Komitənin işi ÜHST-nin Baş Qərargahında yerləşən katiblik tərəfindən koordinasiya ediləcək. Üzv ölkələrin nümayəndələri arasında müxtəlif görüşlərin keçirilməsi, müvafiq sahələr üzrə məsləhətçi və ekspertlərin də iştirakı nəzərdə tutulur. Komitə tərəfindən “İnstitusional, texniki və maliyyə idarəçiliyi üzrə qiymətləndirilmənin nəticələrinə dair hesabat” hazırlanaraq ÜHST-nin rəhbərliyinə təqdim olunacaq. Ölkəmizi İdarəetməyə Nəzarət Komitəsində Azərbaycanın ÜHST-dəki nümayəndəsi, Azərbaycan Respublikası Qida Təhlükəsizliyi Agentliyinin (AQTA) Heyvan sağlamlığı və bioloji təhlükəsizlik şöbəsinin müdiri, respublikanın baş dövlət baytarlıq müfəttişi Qalib Əbdüləliyev təmsil edəcək. Qeyd edək ki, son illər AQTA tərəfindən ölkədə heyvan sağlamlığı və bioloji təhlükəsizliyin təmin edilməsi, başqa ölkələrdən keçə biləcək yoluxucu heyvan xəstəliklərinin qarşısının alınması, habelə ətraf mühitdə biotəhlükəsizliyin pozulmasına səbəb olan xəstəliklərə görə sağlamlıq statusunun təsdiq edilməsi istiqamətində kompleks tədbirlər həyata keçirilməkdədir. Eyni zamanda Azərbaycanın təşəbbüsü ilə heyvan sağlamlığı sahəsində regional əməkdaşlığın gücləndirilməsi ÜHST tərəfindən yüksək qiymətləndirilir. Belə ki, ölkəmiz dabaq xəstəliyi üzrə Şərqi Avropa və Mərkəzi Asiya regionu üzrə məsləhət qrupuna sədr, həmçinin ÜHST-nin “Avropa heyvan rifahı platforması”nın rəhbər komitəsinə üzv seçilib. Cari ildə ölkəmizin xırdabuynuzlu heyvanların taunu və yüksək patogen quş qripi xəstəliklərindən azad olma statusu ÜHST tərəfindən təsdiqlənib. Heyvan sağlamlığı və bioloji təhlükəsizliyin təmin edilməsi sahəsində icra edilən institusional islahatlar nəticəsində ölkəmizə yüksək etimad göstərilərək Azərbaycan Ümumdünya Heyvan Sağlamlığı Təşkilatının İdarəetməyə Nəzarət Komitəsinə üzv seçilib.
Quş qripi xəstəliyinə qarşı epizootoloji monitorinqlər davam etdirilir
Quş qripi xəstəliyinin qarşısının alınması üzrə dövlət qurumlarının və digər aidiyyəti subyektlərin əlaqəli Fəaliyyət Planına uyğun olaraq, 2024-cü ilin 16-20 dekabr tarixlərində növbəti epizootoloji monitorinq keçiriləcək. Bununla əlaqədar risk əsasında müəyyən olunmuş ovçuluq təsərrüfatlarının və milli parkların su-bataqlıq, dənizsahili zonalar və digər ərazilərini əhatə etməklə ərazi ilə yanaşı, vəhşi quşlara ümumi baxış keçiriləcək, xəstəlik törədicisinin aşkar edilməsi məqsədilə vəhşi quşlar ovlanacaq və həmin müddətdə respublikada fəaliyyət göstərən bəzi sənaye əsaslı müxtəlif həcmli quşçuluq müəssisələrində, o cümlədən müxtəlif rayonlardakı (şəhərlərdəki) ailə təsərrüfatlarında saxlanılan ev quşlarından laborator müayinə aparılması üçün diaqnostik nümunələr götürüləcək, habelə ölkə üzrə müəssisələrə, təsərrüfatlara, su hövzələrinə və parklara ümumi baxış keçirilməklə, baytarlıq norma və qaydalarına əməl olunması üçün məqsədyönlü maarifləndirmə-təbliğat tədbirləri həyata keçiriləcək və epizootoloji məlumatlar toplanaraq təhlil ediləcək. Monitorinqlər çərçivəsində müşahidə aparılacaq ərazilər barədə məlumatlar “Epicollect5” proqramına daxil ediləcək. Monitorinqlərdə Qida Təhlükəsizliyi Agentliyinin, Qida Təhlükəsizliyi İnstitutunun, Kənd Təsərrüfatı Nazirliyi yanında Aqrar Xidmətlər Agentliyinin Heyvan Sağlamlığı və Baytarlıq Xidmətləri Mərkəzinin və yerli Heyvan Sağlamlığı və Baytarlıq Xidmətləri İdarələrinin, Ekologiya və Təbii Sərvətlər Nazirliyi yanında Bioloji Müxtəlifliyin Qorunması Xidmətinin və Səhiyyə Nazirliyinin Xüsusi Təhlükəli İnfeksiyalara Nəzarət Mərkəzinin əməkdaşları və mütəxəssisləri iştirak edəcəklər. Tədbirlər müddətində götürülmüş nümunələr İnstitutun Mərkəzi Baytarlıq Laboratoriyasında müvafiq müayinələrə cəlb olunacaq. Monitorinqlərin keçirildiyi dövr ərzində təbiət ərazilərində, ailə və fermer təsərrüfatlarında quduzluq və xırdabuynuzlu heyvanların taunu xəstəlikləri üzrə də müşahidələr aparılacaq, xəstə və ya tələf olmuş heyvanlara rast gəldikdə isə diaqnostik nümunələr götürüləcək.
