Giriş
Ölkəmizə idxal olunan bəzi bioloji aktiv qida məhsullarında uyğunsuzluqlar aşkarlanıb
1 İyul 2024 12:58
Azərbaycan Respublikası Qida Təhlükəsizliyi Agentliyinin əməkdaşları tərəfindən “Bioloji aktiv qida məhsullarının təhlükəsizlik göstəricilərinin və tərkibinin müəyyən edilməsinə dair Monitorinq Planı”na uyğun olaraq bioloji aktiv qida məhsullarının (BAQM) satışı həyata keçirilən apteklərdə monitorinqlər aparılıb.
Monitorinqlər zamanı bir sıra bioloji aktiv qida məhsullarından nümunələr götürülərək Azərbaycan Qida Təhlükəsizliyi İnstitutunun müvafiq laboratoriyalarında müayinələrə cəlb olunub. Nümunələrin sınaq nəticəsinə əsasən, “ARES” MMC tərəfindən Türkiyə Respublikasından idxal edilmiş “Bereket İlaç Kozmetik A.Ş” şirkətinə məxsus (01.03.2022 - 01.03.2025-ci il istehsal və son istifadə tarixli, EX-1810 seriya nömrəli) “Afrika Şiri” əmtəə nişanlı preparatın tərkibində BAQM-a xas olmayan və yalnız dərman vasitələrində mövcud olan “Sildenafil” maddəsinin olduğu aşkarlanıb. Eyni zamanda məhsulun etiket məlumatlarında həmin maddənin olması ilə bağlı qeydin olmadığı, həmçinin tərkibində Sinkin miqdarının preparatın üzərində bəyan edilən miqdardan az olduğu müəyyən olunub. Bununla yanaşı, Agentliyin müraciətinə əsasən, Azərbaycan Respublikasının Səhiyyə Nazirliyinin Analitik Ekspertiza Mərkəzi tərəfindən sözügedən məhsulun ekspertizası aparılıb və tərkibində kənar maddənin aşkar olunduğuna dair rəy verilib.
Faktla bağlı qanunvericiliyə uyğun olaraq idxalçı barəsində inzibati tədbir görülüb, 01.03.2022-ci il istehsal tarixli məhsulların dövriyyədən çıxarılması və satış şəbəkələrindən geri çağırılması ilə bağlı “Məhdudlaşdırıcı tədbirlərin tətbiqi barədə” və “Qida təhlükəsizliyi sertifikatının dayandırılması barədə” qərarlar qəbul edilib. Eyni zamanda sözügedən məhsul partiyasının ticarət şəbəkələrindən tam yığışdırılmadığı və satışının həyata keçirildiyi aşkarlandığı üçün sahibkar barəsində inzibati tədbir görülüb. İdxalçı tərəfindən geri çağırılmış məhsullar Agentlik əməkdaşlarının iştirakı ilə xüsusi poliqonda məhv edilib.
Aparılan nəzarət tədbirləri çərçivəsində satışda olan daha bir məhsuldan − yerli istehsalçı “Fito Lab” MMC-yə məxsus (01.12.2022 - 01.12.2025-ci il istehsal və son istifadə tarixli) "Tufan" əmtəə nişanlı preparatdan götürülmüş nümunələrin laborator müayinəsi nəticəsində uyğunsuzluq aşkarlanıb. Belə ki, məhsulun tərkibində BAQM-a xas olmayan və yalnız dərman vasitələrində mövcud olan “Sildenafil” maddəsi müəyyən olunub. Faktla bağlı sahibkar inzibati məsuliyyətə cəlb olunub, həmçinin preparatın istehsalının qadağan edilməsi və məhsul partiyasının apteklərdən geri çağırılması ilə bağlı məhdudlaşdırıcı tədbirlərin tətbiqi barədə qərarlar qəbul edilib. Sahibkar tərəfindən geri çağırılmış məhsul partiyası Agentlik əməkdaşlarının iştirakı ilə məhv ediləcəkdir.
Oxşar xəbərlər
AQTA xarici ölkələrə ixrac olunan bitkiçilik məhsullarının sertifikatlaşdırılması prosesini davam etdirir
Azərbaycan Respublikasının Qida Təhlükəsizliyi Agentliyi (AQTA) respublikamızdan xarici ölkələrə ixrac olunan bitkiçilik məhsullarının, o cümlədən nar və xurmanın sertifikatlaşdırılması prosesini həyata keçirir. Proses çərçivəsində Agentliyin mütəxəssisləri tərəfindən bitkiçilik təsərrüfatlarına, ixrac üçün nəzərdə tutulan məhsullara və həmin məhsulları daşımaq üçün istifadə edilən nəqliyyat vasitələrinə baxış keçirilir. Eyni zamanda məhsullardan nümunələr götürülür və müvafiq müayinələrə cəlb olunur. Daha sonra tələblərə cavab verən məhsullar sertifikatlaşdırılır və ixraca icazə verilir. Qeyd edək ki, “Qida təhlükəsizliyi haqqında” və “Fitosanitar nəzarəti haqqında” qanunlara əsasən, bitkiçilik məhsullarının istehsalı ilə məşğul olan təsərrüfat subyektləri qida təhlükəsizliyi qeydiyyatına alınmalıdır. Həmçinin xarici ölkələrə ixrac edilən bitkiçilik məhsulları idxalçı ölkələrin tələbləri nəzərə alınmaqla, sertifikatlaşdırılmalıdır.
İdxal olunan bəzi bioloji aktiv qida məhsulu partiyalarının normativ tələblərə cavab vermədiyi aşkarlanıb
Qida Təhlükəsizliyi Agentliyi ölkəyə idxal olunan qida məhsullarına nəzarət tədbirlərini davam etdirir. Tədbirlər çərçivəsində “NF Star” MMC-nin və “Loğman Farm” MMC-nin Türkiyədən idxal etdiyi bioloji aktiv qida məhsullarından Agentliyin əməkdaşları tərəfindən götürülmüş nümunələrin müayinəsi nəticəsində uyğunsuzluq aşkarlanıb. Faktla bağlı qanunvericiliyə uyğun müvafiq tədbirlər görülərək, tələblərə cavab verməyən bioloji aktiv qida məhsulları məhv edilib. Uyğunsuzluq aşkarlanmış bioloji aktiv qida məhsulu partiyaları aşağıdakılardır: 1. “İlaçsan Medikal San.Tic.LTD.ŞTİ” müəssisəsinə məxsus 3000 ədəd “Foxxol, kapsul №30” əmtəə nişanlı bioloji aktiv qida məhsulu (01.04.2024-01.04.2027-ci il istehsal və son istifadə tarixli, 908005 partiya nömrəli); “2. Greenland İlaç Gıda Takviyeleri ve Kozmetik San.Tic.LTD.ŞTİ” müəssisəsinə məxsus 3000 ədəd “Secret of Power, daxilə qəbul üçün pasta 240Q” əmtəə nişanlı bioloji aktiv qida məhsulu (01.02.2024-01.02.2027-ci il istehsal və son istifadə tarixli, 051 partiya nömrəli).
Türkiyədən idxal olunan bioloji aktiv qida məhsulu partiyasında uyğunsuzluq aşkarlanıb
Azərbaycan Respublikasının Qida Təhlükəsizliyi Agentliyi ölkəyə idxal olunan qida məhsullarına nəzarət tədbirlərini davam etdirir. Tədbirlər çərçivəsində “Buğur” MMC-nin Türkiyə Respublikasından idxal etdiyi “Evren İlaç Kozmetik San. ve Tic. LTD” şirkətinə məxsus “Leopard, kapsul №10” əmtəə nişanlı bioloji aktiv qida məhsulu partiyasından (13.02.2024-13.02.2027 istehsal və son istifadə tarixli) Agentlik əməkdaşları tərəfindən nümunələr götürülərək Azərbaycan Qida Təhlükəsizliyi İnstitutunun müvafiq laboratoriyasına təqdim edilib. Laborator müayinələr nəticəsində nümunələrdə uyğunsuzluq - “Tadalafil və Sildenafil” aşkarlanıb. Faktla bağlı qanunvericiliyə uyğun müvafiq tədbirlər görülüb. Aşkarlanmış uyğunsuzluqla əlaqədar müvafiq tədbirlərin həyata keçirilməsi üçün Türkiyə Respublikasının aidiyyəti dövlət qurumuna rəsmi məktub göndərilib.
