Giriş
AQTA-da Milli qida təhlükəsizliyinə nəzarət sisteminin qiymətləndirilməsi ilə bağlı seminar keçirilib
2 İyun 2022 15:42
BMT-nin Ərzaq və Kənd Təsərrüfatı Təşkilatının (FAO) dəstəyi ilə Azərbaycan Respublikası Qida Təhlükəsizliyi Agentliyində (AQTA) “Azərbaycanda qida nəzarəti sisteminin qiymətləndirilməsi aləti” mövzusunda seminar keçirilib. Seminar “Ərzaq və Kənd Təsərrüfatı üzrə FAO-Türkiyə Tərəfdaşlıq Proqramı”na (FTPP II) əsasən maliyyələşdirilən “Milli qida təhlükəsizliyi sistemlərinin və regional əməkdaşlığın təkmilləşdirilməsi” layihəsi çərçivəsində təşkil olunub.
AQTA, Kənd Təsərrüfatı və Səhiyyə nazirlikləri, Dövlət Gömrük Komitəsi, İcbari Tibbi Sığorta üzrə Dövlət Agentliyi və digər maraqlı tərəflərin nümayəndələrinin iştirakı ilə keçirilən tədbirdə FAO və Ümümdünya Səhiyyə Təşkilatı (ÜST) tərəfindən birgə hazırlanmış “Qida təhlükəsizliyinə nəzarət sisteminin qiymətləndirilməsi aləti” konsepsiyası haqda ətraflı məlumat verilib. Bildirilib ki, sözügedən konsepsiya milli səviyyədə qida nəzarət sistemlərinin effektivliyinin müəyyənləşdirilməsi və təkmilləşdirilməsində üzv ölkələrə kömək etmək məqsədi daşıyır. Azərbaycanda da tətbiqi nəzərdə tutulan konsepsiya beynəlxalq təcrübəyə əsaslanaraq, mövcud qida təhlükəsizliyinə nəzarət sisteminin qiymətləndirilməsi yolu ilə bu sahənin inkişafı üzrə prioritet istiqamətlərin müəyyənləşdirilməsinə imkan verəcək.
Seminara qoşulan FAO ekspertlərinin mövzu ilə bağlı geniş təqdimatından sonra qida təhlükəsizliyinə nəzarət sahəsində metodologiya, beynəlxalq təcrübə ətrafında fikir mübadiləsi aparılıb, qiymətləndirilmə prosesinin həyata keçirilməsində Azərbaycan üçün konkret məqsədlər, gözlənilən nəticələr və tərəflərin icra öhdəlikləri müzakirə olunub.
Oxşar xəbərlər
“Fırınçı” kafesində yoxlama keçirilib
Vətəndaş müraciəti əsasında Qida Təhlükəsizliyi Agentliyinin əməkdaşları Abşeron rayonu, Mehdiabad qəsəbəsi, 28 May küçəsində fəaliyyət göstərən, fiziki şəxs Firudunov Seyid Allahverdi oğluna məxsus “Fırınçı” kafesində yoxlama keçirib. İctimai iaşə obyektində qida təhlükəsizliyi sahəsində texniki normativ hüquqi aktların tələblərinin pozulduğu müəyyən edilib. Belə ki, mətbəxdə havalandırma sisteminin quraşdırılmadığı, işçi masaların yuyula bilən və korroziyaya davamlı materialla üzlənmədiyi, istifadə olunan suyun filtrdən keçirilmədiyi və digər tələblərin pozulduğu aşkarlanıb. Faktla bağlı obyektin fəaliyyəti məhdudlaşdırılıb, rəhbəri barəsində inzibati qərar qəbul edilərək cərimə tətbiq olunub.
Bakıda süd məhsullarının istehsalı müəssisəsinin fəaliyyəti məhdudlaşdırılıb
Qida Təhlükəsizliyi Agentliyinin əməkdaşları tərəfindən Bakı şəhəri, Sabunçu rayonu, Maştağa qəsəbəsi ərazisində fəaliyyət göstərən “Adilbərəkət” MMC-yə məxsus süd və süd məhsullarının emalı müəssisəsində plandankənar yoxlama keçirilib. Yoxlama zamanı qida təhlükəsizliyi sahəsində texniki normativ hüquqi aktların və sanitariya norma və qaydalarının, eləcə də etiketlənmə ilə bağlı bir sıra tələblərin pozulduğu müəyyən edilib. Belə ki, müəssisədə istehsal olunan kəsmik, şor, qatıq və holland pendiri məhsullarının etiketində “təbii inək südündən” istifadə edildiyi göstərilsə də, istehsalat prosesinin müşahidəsi və xammallara dair sənədlər təhlil edilərkən quru süd və bitki yağlarından istifadə edildiyi aşkarlanıb. Habelə, şor məhsulunun Bakı şəhərində emal edilməsinə baxmayaraq üzərində “İsmayıllı şor” ifadəsi yazılıb. Bu da etiketdə qida məhsuluna xas olmayan təsir və ya xassələrin göstərilərək etiket tələblərinin pozulması ilə yanaşı, istehlakçıların aldadılması faktıdır. Bundan başqa, anbarda döşəmə səthlərinin tamlığının pozulduğu, qida ilə təmasda olan səthlərin təmirsiz olduğu, pasterizasiya avadanlıqlarının və pendir saxlanan qabların korroziya uğradığı, süd məhsullarının antisanitar şəkildə saxlanıldığı, qida məhsulları ilə təmasda olan alət və avadanlıqların yararsız vəziyyətdə olduğu, pendirin hazırlanmasında xammal kimi istifadə edilən yağların üzərinin açıq şəkildə saxlanıldığı və digər nöqsanlar aşkarlanıb. Uyğunsuzluqlarla bağlı obyekt rəhbərliyi barəsində inzibati xəta haqqında protokol tərtib olunub, hazır qidalardan nümunələr götürülərək laboratoriyaya təqdim edilib. Eyni zamanda nöqsanlar aradan qaldırılana qədər müəssisənin fəaliyyəti məhdudlaşdırılıb.
Ağcabədidə çörək istehsalı sexində nöqsanlar aşkarlanıb
Qida Təhlükəsizliyi Agentliyinin əməkdaşları Ağcabədi rayonu, Təzəkənd kəndində fəaliyyət göstərən, sahibkar Vəliyev Elvin Yaşar oğluna məxsus çörək istehsalı sexində yoxlama keçirib. Yoxlama zamanı sanitariya-gigiyena qaydalarının və normativ hüquqi aktların tələblərinin pozulduğu müəyyən olunub. Aşkarlanan nöqsanlarla bağlı sahibkar barəsində inzibati protokol tərtib edilib, icrası məcburi göstərişlər verilib və sexin fəaliyyəti məhdudlaşdırılıb.
