Giriş
AQTA sədri alkoqollu içkilərin istehsalı və idxalı ilə məşğul olan sahibkarlarla görüşüb
10 Mart 2023 15:06
Azərbaycan Respublikasının Qida Təhlükəsizliyi Agentliyində (AQTA) Azərbaycan Şərab İstehsalçıları və İxracatçıları Assosiasiyasının nümayəndələri, həmçinin alkoqollu içkilərin istehsalı və idxalı ilə məşğul olan sahibkarlarla görüş keçirilib.
Tədbir alkoqollu içkilərin istehsalı və idxalı sahəsindəki vəziyyəti bir daha nəzərdən keçirmək, bu sahədə fəaliyyət göstərən sahibkarlarla əməkdaşlığı daha da genişləndirmək, onları mövcud qanunvericilik və tələblər barədə məlumatlandırmaq, işlərinin beynəlxalq tələblərə uyğun təşkilinə kömək göstərmək, həmçinin təkliflərini dinləmək və təkliflər üzrə müvafiq işlərin həyata keçirilməsini təmin etmək məqsədilə təşkil olunub.
Görüşdə AQTA sədri Qoşqar Təhməzli qida təhlükəsizliyi, o cümlədən alkoqollu içkilərin istehsalı və idxalı sahəsində həyata keçirilən tədbirlər, eləcə də ticarət şəbəkələrində qida təhlükəsizliyinə nəzarətin təkmilləşdirilməsi istiqamətində görülən işlər barədə iştirakçılara məlumat verib. Bildirib ki, 2023-cü il yanvarın 1-dən qüvvəyə minən “Qida təhlükəsizliyi haqqında” Qanuna əsasən, qida məhsullarının ölkəyə idxalı ilə bağlı tələblərdə dəyişikliklər edilib. Qanun bir çox beynəlxalq qaydaların tətbiqi ilə yanaşı, qida məhsullarının izlənmə sisteminin tətbiqi, qida zəncirində fəaliyyət göstərən subyektlərin (obyektlərin) qeydiyyatı və təsdiqi prosesinə yeni baxış formalaşdırıb. Ümumilikdə bu qanun istehlakçı hüquqlarının müdafiəsinə dövlət nəzarətinin daha da gücləndirilməsinə hədəflənib. Q.Təhməzli qanunun tələblərinin icrası ilə bağlı sahibkarlıq subyektləri tərəfindən lazımi tədbirlərin görülməsinin və onların işlərini müasir tələblərə və qaydalara uyğunlaşdırmasının zəruriliyini diqqətə çatdırıb. AQTA sədri eyni zamanda təhlükəsizlik və keyfiyyət göstəriciləri üzrə müayinələrin aparılması üçün Azərbaycan Qida Təhlükəsizliyi İnstitutunun (AQTİ) laboratoriyalarının ən müasir cihaz və avadanlıqlarla təchiz edildiyini vurğulayıb. Alkoqollu içkilərin istehsalı ilə məşğul olan müəssisələrin AQTİ tərəfindən təşkil ediləcək səriştəlilik sınaqlarına qatılmasının zəruri olduğunu bildirib.
Tədbirdə Azərbaycan Şərab İstehsalçıları və İxracatçıları Assosiasiyasının sədri Elçin Mədətov AQTA tərəfindən görülən işlərdən danışıb və bu sahənin inkişafına verdiyi dəstəyə görə Agentliyə minnətdarlığını ifadə edib.
Görüşdə ölkə ərazisində fəaliyyət göstərən alkoqollu içkilərin istehsalı müəssisələrində həyata keçirilən nəzarət tədbirləri barədə də məlumat verilib. Bildirilib ki, 2022-ci il ərzində 15-i planlı, 10-u plandankənar olmaqla, ümumilikdə ölkə ərazisində fəaliyyət göstərən 25 alkoqollu içkilərin istehsalı müəssisəsində yoxlama aparılıb. Yoxlamalar zamanı 19 müəssisədə nöqsan aşkar edilib. Eyni zamanda ötən il alkoqollu içkilərlə bağlı 65 vətəndaş şikayəti daxil olub ki, bunlardan 35-i təsdiqini tapıb. Aşkarlanmış uyğunsuzluqlarla əlaqədar 8 alkoqollu içkilərin istehsalı müəssisəsində istehsalın dayandırılması, məhsul partiyasının satışının dayandırılması və dövriyyədən çıxarılması, məhsul istehsalının qadağan olunması, iş personalının işdən kənarlaşdırılması barədə məhdudlaşdırıcı qərarlar verilib. 18 istehsalçı müəssisənin vəzifəli şəxsləri barəsində inzibati tənbeh tədbiri görülüb. Eyni zamanda vurğulanıb ki, 01.11.2022-28.02.2023-cü il tarixləri arasında 1833 ticarət və 824 ictimai iaşə müəssisəsində monitorinq aparılıb. Bu monitorinqlər zamanı 23-ü ticarət və 7-si ictimai iaşə müəssissəsi olmaqla, 30 qida obyektində alkoqollu içkilərlə bağlı şübhə yarandığı üçün nəzarət tədbirləri həyata keçirilib. Ümumilikdə müxtəlif növ əmtəə nişanlı 715 ədəd saxta alkoqollu içkilər aşkar olunub. Bununla bağlı qanunvericiliyə uyğun müvafiq tədbirlər görülüb, həmin məhsullar satışdan kənarlaşdırılıb. 10 qida obyekti barədə məlumatlar hüquq mühafizə orqanına göndərilib. 17 obyektin vəzifəli şəxsləri barəsində Agentlik tərəfindən inzibati məsuliyyət tədbirləri görülüb. Digər obyektlər barədə məlumatların da hüquq mühafizə orqanına göndərilməsi nəzərdə tutulub. 5 qida obyektinin vəzifəli şəxsləri barəsində isə cinayət işi başlanıb. Həmçinin qeyd olunub ki, 2023-cü il ərzində 53 müxtəlif növ alkoqollu içkilərin istehsalı müəssisəsində planlı yoxlamaların keçirilməsi nəzərdə tutulub.
Tədbirin sonunda sahibkarların təklifləri dinlənilib, onları maraqlandıran suallar cavablandırılıb və aidiyyəti üzrə müvafiq göstərişlər verilib.
Oxşar xəbərlər
Lənkəranda normativ tələblərin pozulduğu ət satışı məntəqəsinin fəaliyyəti məhdudlaşdırılıb
Daxil olan müraciət əsasında Lənkəran şəhəri, Koroğlu küçəsi, Böyük bazar ərazisində fəaliyyət göstərən, fiziki şəxs Həsənov Allahşükür Atəş oğluna məxsus ət satışı məntəqəsində Qida Təhlükəsizliyi Agentliyinin əməkdaşları tərəfindən keçirilmiş plandankənar yoxlama zamanı qida təhlükəsizliyi sahəsində texniki normativ hüquqi aktların tələblərinin pozulduğu aşkarlanıb. Belə ki, məntəqədə sanitar-gigiyenik tələblərə əməl edilmədiyi, ətlərin üzərində baytarlıq nəzarətindən keçirildiyinə dair möhürün olmadığı, əlyuma çanağının, havalandırma sisteminin, eləcə də ət məhsullarının saxlanması üçün soyuducu və dondurucuların mövcud olmadığı, işçi heyətin tibbi müayinədən keçmədiyi və fərdi qoruyucu vasitələrdən istifadə etmədiyi, dezinfeksiya işlərinin aparılmadığı müəyyən edilib.
Qanunsuz fəaliyyət göstərən dönərxanada bir sıra nöqsanlar aşkarlanıb
Ağdam rayonu, Quzanlı qəsəbəsində fəaliyyət göstərən, fiziki şəxs Əliyev İbrahim Şirin oğluna məxsus dönərxanada Qida Təhlükəsizliyi Agentliyinin əməkdaşları tərəfindən plandankənar yoxlama keçirilib. Baxış zamanı dönərxanada qida məhsulları üzrə gigiyena qaydalarına və qida təhlükəsizliyi tələblərinə əməl edilmədiyi, sanitar-texniki və sanitar-gigiyenik vəziyyətin qüvvədə olan normativlərə cavab vermədiyi müəyyən edilib. Belə ki, iaşə obyektinin qida təhlükəsizliyi qeydiyyatından keçmədən fəaliyyət göstərdiyi məlum olub, həmçinin obyektdə xammal olaraq istifadə edilən məhsulların (xiyar, pomidor, mayonez) açıq şəkildə saxlandığı, çarpaz çirklənmənin qarşısının alınması məqsədilə texnoloji prosesin ardıcıllığına riayət edilmədiyi, əlyuma çanaqlarının isti su və gigiyenik tələblərə cavab verən qurutma vasitələri ilə təmin edilmədiyi, havalandırma sisteminin quraşdırılmadığı, çirklənməyə qarşı müdafiə və zərərvericilərlə mübarizə üçün müvafiq şəraitin olmadığı, döşəmə, divar səthlərinin təmirsiz olduğu və dezinfeksiyaedici vasitələrin təsirinə davamlı materialla üzlənmədiyi, mütəmadi olaraq müvafiq təmizlik işlərinin aparılmadığı, tullantıların ağzı kip bağlanan və qoxu yaymayan qablara toplanmadığı və digər nöqsanlar aşkarlanıb.
Qida təhlükəsizliyi tələblərinin pozulduğu iki dönərxananın fəaliyyəti məhdudlaşdırılıb
Ağcabədi rayonunun N.Nərimanov küçəsində yerləşən, fiziki şəxs Alıyev Xəyyam Mirzəli oğluna məxsus “01” dönərxanasında və Xocavənd kəndində yerləşən, fiziki şəxs Hüseynov Elmir Əmirxan oğluna məxsus “Dostluq” dönərxanasında Qida Təhlükəsizliyi Agentliyinin əməkdaşları tərəfindən plandankənar yoxlama keçirilib. Baxış zamanı dönərxanalarda qida məhsulları üzrə gigiyena qaydalarına və qida təhlükəsizliyi tələblərinə əməl edilmədiyi, sanitar-texniki və sanitar-gigiyenik vəziyyətin qüvvədə olan normativlərə cavab vermədiyi müəyyən olunub. Belə ki, iaşə obyektlərində çarpaz çirklənmənin qarşısının alınması məqsədilə texnoloji prosesin ardıcıllığına əməl olunmadığı, qabaqcıl gigiyena təcrübəsinin, o cümlədən çirklənməyə qarşı müdafiə və zərərvericilərlə mübarizə üçün müvafiq şəraitin təmin edilmədiyi, döşəmə, divar səthlərinin təmirsiz olduğu və dezinfeksiyaedici vasitələrin təsirinə davamlı materialla üzlənmədiyi, mütəmadi olaraq müvafiq təmizlik işlərinin görülmədiyi, tullantıların ağzı kip bağlanan və qoxu yaymayan qablara toplanmadığı, işçi heyətin gigiyenik təlimlərə cəlb edilmədiyi və digər nöqsanlar aşkarlanıb.
