Giriş
AQTA “Təhlükəsiz qida ilə sağlam gələcəyə” adlı rəsm müsabiqəsinə start verib
11 Aprel 2023 15:23
Azərbaycan Respublikasının Qida Təhlükəsizliyi Agentliyi (AQTA) tərəfindən məktəblilər arasında Ümummilli Lider Heydər Əliyevin 100 illik yubileyinə həsr olunmuş “Təhlükəsiz qida ilə sağlam gələcəyə” adlı rəsm müsabiqəsinə start verilib.
Layihə məktəblilərin qida təhlükəsizliyi ilə bağlı təxəyyül və biliklərinin çəkdikləri rəsmlər vasitəsilə ictimaiyyətə çatdırılmasını təmin etmək, həmçinin onların təhlükəsiz və sağlam qida anlayışlarına dair təsəvvürlərini müəyyənləşdirmək məqsədilə həyata keçirilir.
“Məktəblinin dostları”nın dəstəyi ilə reallaşdırılan layihə paytaxtda fəaliyyət göstərən məktəblərdə təhsil alan V-XI sinif şagirdləri üçün nəzərdə tutulub.
Məktəblilər rəsmlərini A3 formatlı vərəqdə çəkərək müsabiqəyə təqdim edə bilərlər. Vərəqin sağ tərəfinin alt hissəsində rəsmi çəkən şagirdin ad və soyadının, eləcə də oxuduğu sinif və təhsil aldığı məktəb barədə məlumatların yazılması da şərtlərə daxildir. Məktəblərdə şagirdlər tərəfindən çəkilən rəsmlər aprelin 15-dən mayın 15-dək layihə ilə bağlı ayrılmış “Məktəblinin dostları” tərəfindən toplanaraq AQTA-ya təqdim ediləcək.
Agentlik əməkdaşlarından ibarət komissiya rəsmlərə baxaraq müsabiqənin şərtlərinə uyğun olan və seçilən rəsmləri müəyyənləşdirəcək. Münsiflər heyəti tərəfindən bəyənilən 50-dək rəsm 1 İyun-Uşaqların Beynəlxalq Müdafiəsi Günündə təşkil ediləcək sərgidə nümayiş olunacaq. Həmçinin rəsmləri bəyənilən məktəblilər sərgiyə dəvət ediləcəklər. Onlara AQTA tərəfindən tərtib olunan sertifikat və həvəsləndirici hədiyyələr təqdim ediləcək. Ən yaxşı 3 rəsm əsərinin müəllifinə isə xüsusi hədiyyələr veriləcək.
Oxşar xəbərlər
Bərdədə bazarda nöqsanlar aşkarlanıb
Qida Təhlükəsizliyi Agentliyinin əməkdaşları tərəfindən Bərdə rayonu, Güloğlular kəndində fəaliyyət göstərən “Ticarət Mərkəzi” MMC-yə məxsus bazarda keçirilmiş yoxlama zamanı aşkarlanan nöqsanların icra vəziyyəti ilə bağlı yenidən yoxlama keçirilib. Baxış zamanı bazarda süd və süd məhsullarının mənşəyinin məlum olmadığı və temperatur rejiminə əməl edilmədiyi, məhsulların açıq şəkildə satışa çıxarıldığı, işçilərin gigiyena qaydalarına diqqət yetirmədiyi və xüsusi geyimlə təmin edilmədiyi, əl yuma çanaqlarının mövcud olmadığı və digər nöqsanlar müəyyən edilib. Faktla bağlı sahibkar barəsində inzibati protokol tərtib edilib, qeyd edilən məhsullar satışdan kənarlaşdırılıb və icrası məcburi göstərişlər verilib.
İmişlidə fəaliyyət göstərən çörək emalı müəssisəsində nöqsanlar aşkarlanıb
Qida Təhlükəsizliyi Agentliyinin əməkdaşları İmişli şəhəri, N.Savalanov küçəsində fəaliyyət göstərən, Fərmanov Dirbaş Veysəl oğluna məxsus çörək emalı müəssisəsində yoxlama keçirib. Baxış zamanı müəssisənin qida təhlükəsizliyi qeydiyyatından keçmədən fəaliyyət göstərdiyi məlum olub. Həmçinin məhsulların saxlanma şəraitinə və temperatur rejiminə əməl olunmadığı, emal prosesinin qaydalara uyğun həyata keçirilmədiyi, müvafiq təmizlik işlərinin görülmədiyi və digər nöqsanlar aşkarlanıb. Faktla bağlı müəssisənin fəaliyyəti nöqsanlar aradan qaldırılanadək məhdudlaşdırılıb, rəhbəri inzibati məsuliyyətə cəlb olunub.
Gəncədə yaşayış evində saxta alkoqollu içkilərin istehsal edildiyi aşkarlanıb
Gizli fəaliyyət göstərən saxta alkoqollu spirtli içki istehsalı ilə bağlı daxil olan məlumat əsasında Qida Təhlükəsizliyi Agentliyinin və yerli polis idarəsinin əməkdaşları Gəncə şəhəri, M.Ə.Sabir küçəsində Fituri Əsmər Mehman qızına məxsus yaşayış evində reyd keçirib. Yoxlama zamanı müxtəlif əmtəə nişanlı şüşə butulkaların yuyulub təmizlənərək, saxta üsullarla alkoqollu içkilərin qablaşdırıldığı müəyyən olunub. 13 ədəd 1 l-lik, 9 ədəd 0.7 l-lik, 4 ədəd 0.5 l-lik “Banketnaya Yubiley”, 19 ədəd 1 l-lik, 7 ədəd 0.7 l-lik, 5 ədəd 0.5 l-lik “Organic Line”, 1 ədəd 1 l-lik, 3 ədəd 0.7 l-lik “Banketnaya”, 1 ədəd 1 l-lik, 1 ədəd 0.5 l-lik “Старый Доктор” əmtəə nişanlı satış məqsədilə qablaşdırılmış saxta alkoqollu içki, həmçinin müxtəlif yerli və xarici brend markalı içkilərə məxsus butulka və qapaqlar, içərisində 25 litr su-spirt qarışığı olan plastik çəllək aşkarlanıb. Faktla bağlı qanunvericiliyə uyğun müvafiq tədbirlər görülüb. Məhsullardan nümunələr götürülərək laborator müayinələrə cəlb edilib. Qanunsuz istehsal olunan alkoqollu içkilərin satış yerlərinin müəyyən edilməsi istiqamətində zəruri tədbirlər həyata keçirilməkdədir. Araşdırmalar davam etdirilir.
