Giriş
AQTA və AQTİ-nin əməkdaşları Türkiyədə təlim səfərində olublar
12 Yanvar 2023 12:19
Azərbaycan Respublikasının Qida Təhlükəsizliyi Agentliyinin (AQTA) və Azərbaycan Qida Təhlükəsizliyi İnstitutunun (AQTİ) əməkdaşları Türkiyə Respublikasının Ankara şəhərində təlim səfərində olublar.
Səfər Birləşmiş Millətlər Təşkilatının Ərzaq və Kənd Təsərrüfatı Təşkilatının (FAO) Mərkəzi Asiya Ofisi tərəfindən həyata keçirilən "Mərkəzi Asiya ölkələrində və Türkiyədə pestisidlərin dövriyyəsinin idarə olunması və Davamlı Üzvi Çirkləndiricilərə aid edilən pestisidlərin zərərsizləşdirilməsi" layihəsi çərçivəsində reallaşdırılıb və Türkiyənin bitki mühafizəsi vasitələri və aqrokimyəvi maddələrin dövriyyəsinə dair qanunvericiliyi ilə tanış olmaq məqsədi daşıyıb.
Təlim səfəri çərçivəsində AQTA və AQTİ-nin əməkdaşları Türkiyə Kənd Təsərrüfatı və Meşə Nazirliyinin Qida və nəzarət baş idarəsi ilə Bitki mənşəli istehsal baş idarəsinin iş fəaliyyəti ilə tanış olublar. Həmçinin Ankara Mərkəzi Elmi Tədqiqat Bitki Mühafizə İnstitutunda və Milli Referans Qida Laboratoriyasında olublar.
Səfər zamanı keçirilən görüşlərdə Türkiyənin aidiyyəti qurumlarının nümayəndələri bu ölkənin bitki mühafizəsi vasitələri və aqrokimyəvi maddələrin dövriyyəsinə dair qanunvericiliyinin Avropa İttifaqının müvafiq qanunvericiliyinə uyğunlaşdırıldığını bildiriblər və ölkələrimiz arasında bu sahədə təcrübə mübadiləsinin aparılmasının əhəmiyyətini qeyd ediblər. Eyni zamanda onlar təcrübələrini bölüşməyə və bu işə dəstək verməyə hazır olduqlarını vurğulayıblar. Görüşlər zamanı hazırda Türkiyədə uğurla həyata keçirilən və bir çox Avropa ölkəsində mövcud olmayan, pestisidlərin və aqrokimyəvi maddələrin izlənilmə sisteminin ölkəmizdə tətbiq edilməsi ilə bağlı müzakirələr də aparılıb. Müzakirələr zamanı "Mərkəzi Asiya ölkələrində və Türkiyədə pestisidlərin dövriyyəsinin idarə olunması və Davamlı Üzvi Çirkləndiricilərə aid edilən pestisidlərin zərərsizləşdirilməsi" layihəsi çərçivəsində FAO-nun dəstəyi və Türkiyə Kənd Təsərrüfatı və Meşə Nazirliyinin mütəxəssislərinin iştirakı ilə bu istiqamətdə Azərbaycanda pilot layihənin həyata keçirilməsinin mümkün olduğu qeyd edilib.
Oxşar xəbərlər
İctimai iaşə müəssisələrində aşkar edilmiş nöqsanlar aradan qaldırılıb
Azərbaycan Respublikası Qida Təhlükəsizliyi Agentliyinin apardığı plandankənar yoxlamalar zamanı Bakı şəhərində fəaliyyət göstərən bir sıra ictimai iaşə və qida məhsullarının satışı ilə məşğul olan müəssisələrdə aşkarlanmış nöqsanların aradan qaldırılması istiqamətində müvafiq sağlamlaşdırma tədbirləri həyata keçirilib. Belə ki, Xətai, Yasamal və Suraxanı rayonlarında fəaliyyət göstərən 3 müəssisədə keçirilmiş yoxlamalar zamanı müəyyən edilmiş nöqsanlar müəssisə sahibləri tərəfindən aradan qaldırılıb. Görülmüş tədbirlər nəticəsində ictimai iaşə müəssisələrində aşkar edilmiş uyğunsuzluqlar aradan qaldırılıb və fəaliyyətin davam etdirilməsinə şərait yaradılıb. Sağlamlaşdırma tədbirləri həyata keçirilən müəssisələr aşağıdakılardır: 1. Fiziki şəxs Rəhimov Fərid Mübariz oğluna məxsus Bakı şəhəri, Nəsimi rayonu, Mir Cəlal 4 mkr, ev 18A ünvanında yerləşən “Köhnə ciyərxana” kafesi; 2. Fiziki şəxs Zamanov Nəsimi Səməd oğluna məxsus Bakı şəhəri, Nəsimi rayonu, Mir Cəlal küçəsi, 18/3 (93 saylı mağaza) ünvanında yerləşən “Köhnə ciyərxana” kafesi; 3.Fiziki şəxs Bayramov Emin Varımcan oğluna məxsus Bakı şəhəri, Xəzər rayonu, Şüvəlan qəsəbəsi, A.İldırım küçəsi, 37C ünvanında yerləşən “Halva” kafesi;
Masallıda qanunsuz toyuq kəsimi sexləri aşkarlandı – Fəaliyyətləri məhdudlaşdırıldı
Azərbaycan Respublikası Qida Təhlükəsizliyi Agentliyinin əməkdaşları Masallı rayonu, İsgəndərli qəsəbəsində Rəsulov Taleh Seyran oğluna məxsus toyuq kəsimi sexində, Digah kəndində isə Paşayev Füzuli İbrahim oğluna məxsus toyuq kəsimi sahəsində yoxlama keçirib. Yoxlama zamanı hər iki qida obyektində quşların müvafiq müşayiətedici sənədlərinin olmaması, sanitar-gigiyenik və sanitar-texniki tələblərin pozulması və digər nöqsanlar aşkarlanıb. Hər iki sahibkar barəsində inzibati protokol tərtib edilib, məhdudlaşdırıcı tədbirlərin tətbiqi barədə qərar qəbul olunub, toyuq məhsullarından nümunələr götürülərək laborator müayinələrə cəlb edilib. Araşdırmalar davam etdirilir.
Nəzarət tədbirləri - İcmal
AQTA tərəfindən keçirilən plandankənar yoxlamalar zamanı Bakı şəhərində, Bərdə və Masallı rayonlarında fəaliyyət göstərən qida obyektlərində sanitariya-gigiyena tələblərinin pozulması və digər nöqsanlar müəyyən edilib. Aşkarlanmış pozuntularla bağlı obyektlərin fəaliyyətinin məhdudlaşdırılması istiqamətində tədbirlər görülüb.
