Bakıda fəaliyyət göstərən süd məhsullarının emalı müəssisəsində istehlaka yararsız məhsullar aşkarlanıb
18 İyul 2024 15:57
Qida Təhlükəsizliyi Agentliyinin əməkdaşları Bakı şəhəri, Sabunçu rayonu, Zabrat qəsəbəsi, 18 Oktyabr küçəsi 37 ünvanında fəaliyyət göstərən, fiziki şəxs Cəfərov Əli Telman oğluna məxsus süd məhsullarının emalı müəssisəsində plandankənar yoxlama keçirib.
Baxış zamanı müəssisədə sanitar-gigiyenik və sanitar-texniki tələblərin pozulduğu müəyyən edilib. Həmçinin qanunvericiliyə uyğun markalanması olmayan 28 ədəd 2 kq-lıq duzlu pendir məhsulu, etiket məlumatlarında istehsalçı ünvanı və məhsulun çeşidi barədə düzgün məlumatlar qeyd olunmamış ümumi çəkisi 180 kq "Gülman" əmtəə nişanlı pendir məhsulu, xammal olaraq tərkibində palma yağından istifadə olunmasına baxmayaraq, etiket məlumatlarında "Palma yağı yoxdur" ifadəsi yer almış 1 kq-lıq qablaşdırmada 18 ədəd yağ məhsulu aşkarlanıb.
Müayinələrin aparılması məqsədilə müəssisədə emal olunan məhsullardan nümunələr götürülərək Qida Təhlükəsizliyi İnstitutunun müvafiq laboratoriyasına təqdim olunub. Sınaq protokollarına əsasən, "Gülman" əmtəə nişanlı holland pendirində (E.Coli) və "Ukrayna" bitki yağı spredində (Kif maya) mikrobioloji uyğunsuzluq, yağ nümunəsində isə “Natamisin” (məhsulların rəf ömrünü artırmaq üçün istifadə olunan antibiotik) aşkar edilib. Normativ sənədlərin tələbinə əsasən, yağ məhsullarında “Natamisin”in istifadəsinə yol verilmir.
Yoxlama zamanı xammal olaraq istifadə olunan təbii və quru süd məhsullarının müşayiətedici sənədləri, yağ emalında istifadə olunan nehrə qurğusunun sertifikatı təqdim edilməyib. Müəssisədə yağ məhsullarının qablaşdırılması üçün xüsusi qurğu və qəliblərin olmadığı, sözügedən prosesin başqa müəssisədə həyata keçirildiyi məlum olub.
Faktla bağlı müəssisə rəhbərliyi barəsində inzibati protokol tərtib olunub, uyğunsuzluq aşkar edilən məhsulların satışının qadağan olunması və emalının dayandırılması barədə məhdudlaşdırıcı tədbirlərin tətbiqinə dair qərarlar qəbul olunub.
Oxşar xəbərlər
Nərimanov rayonunda fəaliyyət göstərən restoranda nöqsanlar aşkarlanıb
Qida Təhlükəsizliyi Agentliyinin əməkdaşları Bakı şəhəri, Nərimanov rayonu, Təbriz küçəsi, ev 35 ünvanında fəaliyyət göstərən, fiziki şəxs Qasımov Elşad Elxan oğluna məxsus “Şuşa” restoranında plandankənar yoxlama keçirib. Baxış zamanı restoranda üzərində markalanma aparılmayan soyuq qəlyanaltılar, yarımfabrikatlar və müxtəlif çeşidli turşular aşkarlanıb. Həmçinin texnoloji ardıcıllıq prinsipinə riayət edilmədiyi, soyuducuda mal qonşuluğu prinsipinin pozulduğu, quru məhsulların saxlanılması, ət məhsullarının və tərəvəzlərin ilkin emalı üçün sahənin təşkil edilmədiyi, havalandırma sisteminin qurulmadığı, temperaturun monitorinqi və qeydiyyatının aparılmadığı, işçi heyətin gigiyenik təlimlərə cəlb edilmədiyi və xüsusi sanitar geyimlə (əlcək, saç toru), fərdi mühafizə vasitələri (maska) ilə təmin olunmadığı, emal sahəsində masa səthlərinin asan yuyulan və dezinfeksiyaya davamlı materialdan təşkil olunmadığı, müvafiq təmizlik işlərinin aparılmadığı, ağzı kip bağlanan, qoxu yaymayan tullantı qablarından istifadə edilmədiyi və digər nöqsanlar müəyyən olunub.
Sahibkarların nəzərinə: Qida və yem məhsullarının qeydiyyatı zamanı sənədlərin ekspertizası üçün AQTİ-yə müraciət etmək lazımdır!
Azərbaycan Qida Təhlükəsizliyi İnstitutu (AQTİ) bioloji aktiv qida məhsullarının, genetik modifikasiya olunmuş orqanizmlərin (GMO) və GMO-lu yem məhsullarının, təbii mineral suların, qida və yem əlavələrinin və yeni növ qida məhsullarının qeydiyyatını aparmaq istəyən sahibkarlara müraciət ünvanlayıb. Bildirilir ki, adıçəkilən məhsulların qeydiyyatı zamanı ekspertiza üçün tələb olunan sənədlər və laborator müayinələr aparmaqdan ötrü lazım olan nümunələr AQTİ-yə təqdim edilməlidir. Sahibkarlar bu barədə daha ətraflı məlumata sahib olmaq və maraqlandıqları suallara cavab almaq üçün (012) 377-00-20 (daxili:453) nömrəli telefona zəng edə bilərlər.
Qaydaları pozan su emalı müəssisəsinin fəaliyyəti məhdudlaşdırılıb
Bakı şəhəri, Binəqədi rayonu, M.Rəsulzadə qəsəbəsi, İ.Hacıyev küçəsi, ev 46C ünvanında fəaliyyət göstərən, “Pure Life” MMC-yə məxsus qablaşdırılmış su emalı müəssisəsində Qida Təhlükəsizliyi Agentliyinin əməkdaşları tərəfindən planlı yoxlama keçirilib. Belə ki, müəssisədə texnoloji ardıcıllıq prinsipinə əməl olunmadığı, qablaşdırma materiallarının, yuyucu və dezinfeksiyaedici vasitələrin saxlanılması, eləcə də işçi heyət üçün ayrıca sahələrin təşkil edilmədiyi, temperaturun monitorinqi və qeydiyyatının aparılmadığı, havalandırma sisteminin quraşdırılmadığı, emal sahəsində divar və tavanın tamlığının pozulduğu, qablaşdırma materiallarının yuyulması üçün asan təmizlənə bilən və gigiyenik tələblərə cavab verən yuma çanağının təmin edilmədiyi, müvafiq təmizlik işlərinin aparılmadığı və digər nöqsanlar müəyyən olunub.