Giriş
Binəqədi rayonunda fəaliyyət göstərən süd məhsullarının emalı müəssisəsində nöqsanlar aşkarlanıb
6 İyun 2024 16:31
Daxil olmuş vətəndaş müraciəti əsasında Azərbaycan Respublikası Qida Təhlükəsizliyi Agentliyinin əməkdaşları tərəfindən Bakı şəhəri, Binəqədi rayonu, M.Ə.Rəsulzadə qəsəbəsi, “Baksol” adlanan ərazidə fəaliyyət göstərən süd məhsullarının emalı müəssisəsində yoxlama həyata keçirilib. Yoxlama zamanı qida təhlükəsizliyi sahəsində texniki normativ hüquqi aktların, sanitariya norma və qaydalarının bir sıra tələblərinin pozulması faktları müəyyən edilib. Belə ki, müəssisənin qida təhlükəsizliyi qeydiyyatından keçmədən fəaliyyət göstərdiyi, temperatur rejiminə və texnoloji ardıcıllıq prinsipinə əməl edilmədiyi, qida obyektinə qəbul edilmiş məhsulların müvafiq müşayiətedici sənədlərinin mövcud olmadığı, emal edilmiş məhsulların qablaşdırma materiallarının qida təhlükəsizliyi sahəsində normativlərə cavab vermədiyi, qida məhsullarının yuyulması üçün ayrıca yuma çanağının təşkil edilmədiyi, işçilərin dövri tibbi müayinədən keçirilmədiyi və mütəmadi təmizlik işlərinin aparılmadığı məlum olub.
Eyni zamanda müəssisədə müxtəlif istehsalçılara aid etiketlər aşkarlanıb. Müəssisədə istehsal olunan “Alpen” əmtəə nişanlı mozarella pendirinin etiket məlumatlarında məhsulun növü olaraq “mozarella” deyil, “gouda” sözünün qeyd edildiyi, məhsulun emalı zamanı istifadə edilən bitki yağı barədə məlumatların dolğun qeyd olunmadığı müəyyən olunub. Bundan əlavə etiket məlumatlarında qanunsuz olaraq digər qida obyektinə məxsus qida məhsulları sahəsində fəaliyyət göstərən subyektin dövlət reyestrindən çıxarışının nömrəsi qeyd edilib. Qida obyektində hazır məhsul kamerasına baxış keçirilən zaman üzərində qanunvericiliyə uyğun etiket məlumatları olmayan ümumi çəkisi 1297 kq pendir məhsulu aşkarlanıb.
Müayinələrin aparılması məqsədilə müəssisədə emal olunan “Sweet” əmtəə nişanlı mozarella pendirindən nümunələr götürülərək Azərbaycan Qida Təhlükəsizliyi İnstitutunun müvafiq laboratoriyasına təqdim olunub.
Faktla bağlı müəssisə rəhbəri barəsində inzibati protokol tərtib edilib, süd məhsullarının emalının dayandırılmasına dair “Məhdudlaşdırıcı tədbirlərin tətbiqi barədə” Qərar qəbul olunub. Araşdırmalar davam etdirilir.
Oxşar xəbərlər
Beyləqanda marketdə saxta spirtli içkilər aşkarlanıb
Qida Təhlükəsizliyi Agentliyinin əməkdaşları Beyləqan şəhəri, Magistral küçəsində fəaliyyət göstərən, Əliyev Asim Pəsi oğluna oğluna məxsus “Beyləqan” marketdə yoxlama keçirib. Baxış zamanı marketdə “Ağsu”, “Qafqazkaya“ və “Belaya” əmtəə nişanlı müxtəlif həcmli saxta spirtli içkilər aşkarlanıb. Məhsullardan nümunələr götürülərək laborator müayinələrə cəlb olunub. Faktla bağlı fiziki şəxs barəsində inzibati protokol tərtib olunub. Saxta spirtli içkilərin satışı qadağan edilib və qanunvericiliyə uyğun zəruri tədbirlər görülüb. Araşdırmalar davam etdirilir.
Sabunçuda süd məhsullarının istehsalı müəssisəsində nöqsanlar aşkarlanıb
AQTA əməkdaşları tərəfindən Sabunçu rayonu, Maştağa qəsəbəsi, Mehdi Hüseynzadə 65 ünvanında fəaliyyət göstərən, Hüseynov Ağahüseyn Kamil oğluna məxsus süd məhsullarının istehsalı müəssisəsində keçirilmiş yoxlama zamanı qida təhlükəsizliyi sahəsində bir sıra tələblərin pozulması faktları aşkarlanıb. Belə ki, müəssisənin qida təhlükəsizliyi qeydiyyatından keçmədən qanunsuz fəaliyyət göstərdiyi, emal prosesi zamanı texnoloji ardıcıllıq prinsipinə, gigiyena qaydalarına riayət olunmadığı, qablarda kiflənmə əlamətlərinin müşahidə edildiyi, hazır məhsulların birbaşa döşəmə üzərində, ara məsafəsi gözlənilmədən saxlandığı, temperaturun monitorinqi və qeydiyyatının aparılmadığı, işçi heyətin ilkin və dövri tibbi müayinədən keçmədiyi və gigiyenik təlimlərə cəlb edilmədiyi müəyyən edilib. Bundan başqa, müəssisədə istehsal olunan məhsulların (şor, dovğa) etiket məlumatlarında istehsal tarixi və yararlılıq müddətinin saxtalaşdırıldığı aşkarlanıb. Məhsullardan nümunələr götürülərək müayinələrin aparılması üçün laboratoriyaya təqdim olunub. Faktla bağlı sahibkar barəsində inzibati protokol tərtib edilib, müəssisənin fəaliyyəti nöqsanlar aradan qaldırılanadək müvəqqəti məhdudlaşdırılıb.
Binəqədidə saxta alkoqollu içkilər aşkarlanıb
Qida Təhlükəsizliyi Agentliyinin əməkdaşları Bakı şəhəri, Binəqədi rayonu, S.S.Axundov küçəsi, ev 15/1 ünvanında fəaliyyət göstərən, fiziki şəxs Qaraqurbanlı Rəşad Xanlar oğluna məxsus “Pub 008” ictimai iaşə obyektində yoxlama keçirib. Baxış zamanı iaşə obyektində aşkar saxtalaşdırma əlamətləri olan 4 ədəd 1 litrlik, 3 ədəd 0.7 litrlik “Olmeca Tequila” əmtəə nişanlı tekila, 2 ədəd 1 litrlik, 4 ədəd 0.7 litrlik, 4 ədəd 0.5 litrlik “Chivas Regal 12” əmtəə nişanlı viski, 3 ədəd 0.7 litrlik, 4 ədəd 0.5 litrlik “Jack Daniel`s” əmtəə nişanlı viski aşkarlanıb. İçkilərin bir qismində qablaşdırılmada istifadə olunan başlığın kustar üsulla yapışdırıldığı, məhsulun qapağındakı və etiketlənmədəki “LOT” kodların fərqli olduğu və qapaq hissəsində qopmalar müəyyən edilib. Həmçinin qeyd olunan alkoqollu içkilərin keyfiyyət və təhlükəsizlik göstəricilərinə dair sənədlər yoxlamaya təqdim edilməyib. Faktla bağlı inzibati icraata başlanıb, həmin məhsulların dövriyyədən çıxarılması və satışının qadağan edilməsi barədə qərar qəbul edilib və nümunələr götürülərək laborator müayinələrə cəlb olunub. Araşdırmalar davam etdirilir.
