Giriş
“Qida təhlükəsizliyi haqqında” Qanun layihəsi ilə bağlı “AmCham” üzvləri ilə görüş keçirilib
17 Mart 2022 16:45
Azərbaycan Respublikasının Qida Təhlükəsizliyi Agentliyi (AQTA) ilə Azərbaycandakı Amerika Ticarət Palatasının (AmCham), o cümlədən Palatada təmsil olunan bir sıra xarici şirkətlərin nümayəndələri arasında videokonfrans keçirilib. Konfrans “Qida təhlükəsizliyi haqqında” Qanun layihəsi ilə bağlı “AmCham” üzvlərini maraqlandıran sualların müzakirəsi məqsədilə təşkil olunub.
Tədbirdə Milli Məclisin müzakirəsində olan “Qida təhlükəsizliyi haqqında” Qanun layihəsi barədə Ticarət Palatasının üzvlərinə ətraflı məlumat verilib, layihənin beynəlxalq norma və standartlar, qabaqcıl ölkələrin təcrübələri nəzərə alınmaqla hazırlandığı, xarici ekspertlərin, o cümlədən Avropa İttifaqı və Dünya Bankı kimi qurumların mütəxəssislərinin layihənin hazırlanmasında iştirak etdiyi diqqətə çatdırılıb. Qanun layihəsinin elmi-ictimai təşkilatların, biznes subyektlərinin iştirakı ilə geniş ictimai müzakirəsinin keçirildiyi vurğulanıb.
Azərbaycanda mütərəqqi qida təhlükəsizliyi sisteminin tətbiqi məqsədilə Qanun layihəsində bir çox yeniliklərin nəzərdə tutulduğu və həmin yeniliklərin tətbiqi üçün ölkəmizdə qida sahəsində fəaliyyət göstərən biznes subyektlərinə müəyyən vaxt verilməsi ilə bağlı bildirilib ki, məhz bu məqsədlə layihədə müəyyən möhlətlər nəzərdə tutulmuşdur. Belə ki, Qanun özü dərc olunduqdan 6 ay sonra, bəzi spesifik maddələri isə 2-4 il sonra qüvvəyə minəcəkdir. Bu müddət ərzində sahibkarlar öz fəaliyyətlərini qeyd edilən yeniliklərə uyğunlaşdırmalı olacaqlar.
Daha sonra Palata üzvləri Qanunun qəbulundan irəli gələrək təsdiq olunacaq ikinci dərəcəli hüquqi aktlarla bağlı onları maraqlandıran sualları AQTA rəsmilərinə ünvanlayıblar. Suallar Qanun qüvvəyə mindikdən sonra qəbul oluna biləcək yeni sanitariya norma və qaydalar, xüsusilə də etiketləmə ilə bağlı dəyişikliklər, yeni qaydaların qüvvəyə minməsi ilə əlaqədar müvafiq keçid müddətinin tətbiqinin tənzimlənmə forması və s. istiqamətlərdə olub.
Agentlik Qanun layihəsində olduğu kimi, yeni texniki normativ aktların, həmçinin sanitariya norma və qaydalarının da hazırlanmasında geniş ictimai iştirakçılığın təmin olunmasında maraqlı olduğunu bildirib, həmin aktların layihələrinin müzakirəsində bütün sahibkarları, o cümlədən xarici şirkətləri fəal iştiraka dəvət edib.
Qeyd edək ki, “Qida təhlükəsizliyi haqqında” Qanun Milli Məclisin 4 mart 2022-ci il tarixində keçirilən iclasında ilk oxunuşda qəbul edilib. Qanun ölkə ərazisində insanların həyat və sağlamlığı, eyni zamanda istehlakçı hüquqlarının müdafiəsi üçün qida və yem məhsullarının təhlükəsizliyinin təmin edilməsi ilə bağlı münasibətləri tənzimləyir, qida təhlükəsizliyi sahəsində dövlət tənzimlənməsinin forma və üsullarını müəyyən edir.
Oxşar xəbərlər
Göygöldə nöqsanlar aşkarlanan kolbasa istehsalı müəssisəsinin fəaliyyəti məhdudlaşdırılıb
Qida Təhlükəsizliyi Agentliyinin əməkdaşları Göygöl rayonunun Qızılqaya qəsəbəsində yerləşən, fiziki şəxs Nağıyev Camal Əli oğluna məxsus kolbasa istehsalı müəssisəsində plandankənar yoxlama keçirib. Baxış zamanı müəssisənin qida təhlükəsizliyi qeydiyyatından keçmədən fəaliyyət göstərdiyi, sanitar-gigiyenik vəziyyətin qida təhlükəsizliyi sahəsində texniki normativ hüquqi aktların tələblərinə cavab vermədiyi, kolbasa məhsullarının saxlanması və qablaşdırılması sahəsində xüsusi temperatur rejiminə əməl edilmədiyi, həmçinin məhsulların etiket məlumatlarında uyğunsuzluq müəyyən olunub. Bundan əlavə, müəssisədə istifadə müddəti bitmiş məhsulların təkrar dövriyyəsi üçün doğrama bıçaqları, kiflənmiş kolbasanın silinməsi üçün duru yağ, istehsal tarixinin silinməsi üçün məhlul, təkrar qablaşdırılma üçün vakuum avadanlığı aşkarlanıb. Faktla bağlı qanunvericiliyə uyğun olaraq müəssisənin fəaliyyəti məhdudlaşdırılıb və icrası məcburi göstərişlər verilib. Araşdırmalar davam etdirilir.
Lənkəranda normativ tələblərin pozulduğu ət satışı məntəqəsinin fəaliyyəti məhdudlaşdırılıb
Daxil olan müraciət əsasında Lənkəran şəhəri, Koroğlu küçəsi, Böyük bazar ərazisində fəaliyyət göstərən, fiziki şəxs Həsənov Allahşükür Atəş oğluna məxsus ət satışı məntəqəsində Qida Təhlükəsizliyi Agentliyinin əməkdaşları tərəfindən keçirilmiş plandankənar yoxlama zamanı qida təhlükəsizliyi sahəsində texniki normativ hüquqi aktların tələblərinin pozulduğu aşkarlanıb. Belə ki, məntəqədə sanitar-gigiyenik tələblərə əməl edilmədiyi, ətlərin üzərində baytarlıq nəzarətindən keçirildiyinə dair möhürün olmadığı, əlyuma çanağının, havalandırma sisteminin, eləcə də ət məhsullarının saxlanması üçün soyuducu və dondurucuların mövcud olmadığı, işçi heyətin tibbi müayinədən keçmədiyi və fərdi qoruyucu vasitələrdən istifadə etmədiyi, dezinfeksiya işlərinin aparılmadığı müəyyən edilib.
Qanunsuz fəaliyyət göstərən dönərxanada bir sıra nöqsanlar aşkarlanıb
Ağdam rayonu, Quzanlı qəsəbəsində fəaliyyət göstərən, fiziki şəxs Əliyev İbrahim Şirin oğluna məxsus dönərxanada Qida Təhlükəsizliyi Agentliyinin əməkdaşları tərəfindən plandankənar yoxlama keçirilib. Baxış zamanı dönərxanada qida məhsulları üzrə gigiyena qaydalarına və qida təhlükəsizliyi tələblərinə əməl edilmədiyi, sanitar-texniki və sanitar-gigiyenik vəziyyətin qüvvədə olan normativlərə cavab vermədiyi müəyyən edilib. Belə ki, iaşə obyektinin qida təhlükəsizliyi qeydiyyatından keçmədən fəaliyyət göstərdiyi məlum olub, həmçinin obyektdə xammal olaraq istifadə edilən məhsulların (xiyar, pomidor, mayonez) açıq şəkildə saxlandığı, çarpaz çirklənmənin qarşısının alınması məqsədilə texnoloji prosesin ardıcıllığına riayət edilmədiyi, əlyuma çanaqlarının isti su və gigiyenik tələblərə cavab verən qurutma vasitələri ilə təmin edilmədiyi, havalandırma sisteminin quraşdırılmadığı, çirklənməyə qarşı müdafiə və zərərvericilərlə mübarizə üçün müvafiq şəraitin olmadığı, döşəmə, divar səthlərinin təmirsiz olduğu və dezinfeksiyaedici vasitələrin təsirinə davamlı materialla üzlənmədiyi, mütəmadi olaraq müvafiq təmizlik işlərinin aparılmadığı, tullantıların ağzı kip bağlanan və qoxu yaymayan qablara toplanmadığı və digər nöqsanlar aşkarlanıb.
