Giriş
AQTA “Vahid Sağlamlıq” konsepsiyası ilə bağlı zəruri tədbirləri davam etdirir
15 Fevral 2024 13:28
Azərbaycan Respublikasının Qida Təhlükəsizliyi Agentliyi (AQTA) “Vahid Sağlamlıq” konsepsiyası ilə bağlı müvafiq beynəlxalq təşkilatlarla əməkdaşlığı davam etdirir və bununla əlaqədar hazırlanan Tədbirlər Planı icra olunur.
“Vahid Sağlamlıq” insanlar, heyvanlar, bitkilər və onların ortaq ətraf mühiti arasında qarşılıqlı əlaqəni nəzərə alaraq optimal sağlamlıq nəticələrinə nail olmaq məqsədilə yerli, regional, milli və qlobal səviyyələrdə işləyən birgə və çoxsahəli yanaşmadır. Bu yanaşma insan sağlamlığı ilə ev və vəhşi heyvanların, bitkilərin və ətraf mühitin, o cümlədən ekosistemlərin sağlamlığı arasında sıx əlaqəni və qarşılıqlı asılılığı qəbul edir. Həmçinin birgə əməkdaşlığı təşviq edərək proqramların, siyasətlərin, qanunvericiliyin və tədqiqatların hazırlanması ilə həyata keçirilməsini hədəfləyir. Qida təhlükəsizliyi, yoluxucu və xroniki xəstəliklərə nəzarət, profilaktika və cavab tədbirləri, bitki, torpaq sağlamlığı və sair “Vahid Sağlamlıq” yanaşmasının xüsusilə aktual olduğu fəaliyyət istiqamətlərinə aid edilir.
“Vahid Sağlamlıq” konsepsiyasının tətbiqini zəruri edən bir sıra amillər var. Artan dünya əhalisini adekvat səhiyyə, qida və su ilə təmin etmək üçün müvafiq qurumlar birlikdə işləməlidir. Ətraf mühitin çirklənməsi və dəyişən iqlim şəraiti insanlarla heyvanların sağlamlığına təsir göstərir ki, bu da yeni yoluxucu xəstəliklərin yaranmasına səbəb ola bilər. Buna misal olaraq, heyvanlardan insanlara keçən zoonoz xəstəlikləri göstərmək mümkündür. Bundan başqa, Ümumdünya Səhiyyə Təşkilatı (ÜST) antimikrob müqavimətini bəşəriyyətin üzləşdiyi 10 qlobal ictimai sağlamlıq təhlükəsindən biri elan edib. Hər il dünya miqyasında 700000 ölüm dərmana davamlı patogenlərin infeksiyaları ilə əlaqələndirilir.
Qeyd edək ki, Birləşmiş Millətlər Təşkilatının Ərzaq və Kənd Təsərrüfatı Təşkilatının, ÜST-nin və Ümumdünya Heyvan Sağlamlığı Təşkilatının “Vahid Sağlamlıq” yanaşması prioritetləri mövcuddur. Hesab edilir ki, bu yanaşma ilə qlobal sağlamlıq təhlükəsizliyini qorumaq, heyvanlarda və insanlarda zoonoz xəstəliklərin yayılmasının qarşısını almaq olar. Həmçinin “Vahid Sağlamlıq” yanaşması ilə qida təhlükəsizliyinin, eləcə də antibiotiklərə davamlı infeksiyaların azaldılmasının, insan və heyvan sağlamlığının təkmilləşdirilməsinə nail olmaq mümkündür.
Onu da bildirək ki, AQTA tərəfindən “Vahid Sağlamlıq” konsepsiyası ilə bağlı təbliğat-təşviqat işləri, o cümlədən qida subyektlərinin bu istiqamətdə məlumatlandırılması bundan sonra da davam etdiriləcək.
Oxşar xəbərlər
Dünyadakı epizootik vəziyyətə uyğun olaraq müvafiq tədbirlər görülür
Ümumdünya Heyvan Sağlamlığı Təşkilatının (ÜHST) rəsmi məlumatına əsasən, Əlcəzair Xalq Demokratik Respublikasının Uarqla, Ləğuat, Becaya əyalətlərində, Türkiyə Respublikasının Hakkari vilayətində dabaq xəstəliyi qeydə alınıb. Respublika ərazisinin bu yoluxucu xəstəlikdən qorunması üçün qeyd olunan ərazilərdə zonalaşma prinsipi nəzərə alınmaqla, xəstəlik baş vermiş təsərrüfatdan 10 km radiusda olan məsafədən cütdırnaqlı heyvanların (iri və xırdabuynuzlu heyvanlar, donuz, dəvə və s.), habelə onlara aid xammal və məhsulların idxalına və tranzit daşınmasına ÜHST-nin “Quruda yaşayan heyvanların sağlamlıq Məcəlləsi”inə uyğun olaraq AQTA tərəfindən müvəqqəti məhdudiyyət tətbiq olunub. Eyni zamanda müvafiq tədbirlərin görülməsi üçün Azərbaycan Respublikasının Dövlət Gömrük Komitəsinə müraciət olunub.
AQTA sədri Oğuzda vətəndaşları qəbul edib, istehsal müəssisələrinə baş çəkib
Qida Təhlükəsizliyi Agentliyinin sədri Qoşqar Təhməzli mayın 15-i Oğuzda Oğuz, Şəki, Qax, Zaqatala, Balakən, Qəbələ rayonlarından olan vətəndaşları qəbul edib. Qəbuldan əvvəl Ümummilli Lider Heydər Əliyevin abidəsi ziyarət edilib, önünə gül dəstələri düzülüb, xatirəsi ehtiramla yad edilib. Qəbulda vətəndaşların müraciətləri diqqətlə dinlənilib, bir qismi yerində öz həllini tapıb, qaldırılan bəzi məsələlər isə araşdırılması üçün nəzarətə götürülüb. AQTA sədri Qoşqar Təhməzli vətəndaşların qəbulu ilə bağlı səfəri çərçivəsində Oğuzda yerləşən "CPC" və Qaxda yerləşən "Ulu Aqro" MMC-lərdə istehsal prosesi ilə yaxından tanış olub.
“Bitki sağlamlığı haqqında” Qanun layihəsinin ictimai müzakirəsi davam edir
Azərbaycan Respublikasının Qida Təhlükəsizliyi Agentliyi (AQTA) tərəfindən yeni hazırlanan “Bitki sağlamlığı haqqında” Qanun layihəsinin bu sahədə elmi tədqiqatlar aparan alim və mütəxəssislərlə ictimai müzakirəsi təşkil edilib. Müzakirə zamanı AQTA rəsmisi Elxan Mikayılov yeni Qanun layihəsinin hazırlanmasında əsas məqsədin ölkədə bitki sağlamlığının təmin edilməsi, fitosanitar nəzarət və fitosanitar xidmətlərin hüquqi əsaslarının müəyyən edilməsi, bu sahədə fəaliyyət göstərən subyektlər arasında münasibətlərin tənzimlənməsi olduğunu bildirib. Qanun layihəsində yer alan elmi-tədqiqat institutları, təhsil müəssisələri, alimlər, tədqiqatçılar və məsləhətçilər tərəfindən elmi araşdırmalar zamanı aşkarlanan zərərli orqanizmin ərazidə mövcudluğuna dair məlumatın verilməsi qaydası, Azərbaycan Respublikasının ərazisində zərərli orqanizmlərin aşkarlanmasına dair mümkün mənbələrdən məlumatların çevik toplanması, dəqiqləşdirilməsi, zərərli orqanizmin identifikasiyası və mövcudluğunun təsdiqi qaydaları, ümumi monitorinqlə bağlı elmi-tədqiqat müəssisələrindən, universitetlərdən, ictimai təşkilatlardan, alimlərdən, tədqiqatçılardan, məsləhətçilərdən, elmi jurnallardan məlumatların toplanması və təhlili ilə bağlı müddəalar ətraflı müzakirə edilib. Görüşdə Qanun layihəsində yer alan anlayışlar, yeni terminlər, laboratoriyalarda zərərli orqanizmin identifikasiyasının həyata keçirilməsi, mövcudluğunun və yayılma vəziyyətinin rəsmi təsdiqi qaydası, risk qiymətləndirmələrinin aparılmasında alim və mütəxəssislərin yaxından iştirakının məqsədəuyğunluğu, o cümlədən inteqrir mübarizə ilə bağlı alimlərin rəy və təklifləri dinlənilib. Qanun layihəsinin hazırlanmasının ölkədə bitki sağlamlığı sahəsində mövcud olan problemlərin həllində mühüm addım olması alim və mütəxəsislər tərəfindən xüsusi vurğulanıb. Görüşdə digər maraq doğuran suallar cavablandırılıb.
