Giriş
Azərbaycanda qida nəzarəti sistemi beynəlxalq standartlara uyğun təkmilləşdirilir
2 Noyabr 2023 09:25
Azərbaycan Respublikasının Qida Təhlükəsizliyi Agentliyi (AQTA) ölkəmizdə qida nəzarəti sisteminin təkmilləşdirilməsi istiqamətində tədbirləri davam etdirir.
Tədbirlər çərçivəsində AQTA tərəfindən BMT-nin Ərzaq və Kənd Təsərrüfatı Təşkilatının (FAO) dəstəyi ilə “Qida nəzarəti sisteminin qiymətləndirilməsi aləti” layihəsi həyata keçirilir. Qida nəzarəti sistemini daha da təkmilləşdirmək üçün mövcud ehtiyacları müəyyənləşdirmək və bu sistemin davamlı inkişafını təmin etmək məqsədilə reallaşdırılan layihə çərçivəsində görülən işlərin davamı olaraq, qida təhlükəsizliyi üzrə beynəlxalq ekspert Anna Vasilenko, qida nəzarəti üzrə beynəlxalq ekspert Nilay Demir və FAO-nun Avropa ofisində qida təhlükəsizliyi üzrə məsləhətçi Gökçe Akbalık Azərbaycana səfər edib. Səfər ölkəmizdə qida nəzarəti sisteminin daha da təkmilləşdirilməsinə dair beynəlxalq ekspertlərə təqdim olunmuş məlumatların qiymətləndirilməsi məqsədilə həyata keçirilib.
Səfər çərçivəsində qonaqlar AQTA, Azərbaycan Qida Təhlükəsizliyi İnstitutu, Səhiyyə və Kənd Təsərrüfatı nazirlikləri və Dövlət Gömrük Komitəsinin layihə ilə bağlı təyin edilmiş əlaqələndirici şəxsləri ilə görüşəcəklər. Eyni zamanda onlar Agentliyin regional bölməsində olacaq, sərhəd keçid məntəqəsində qida məhsullarının idxalı və ixracı proseslərini izləyəcəklər.
Qeyd edək ki, qida nəzarəti sisteminin fəaliyyətinin beynəlxalq ekspertlər tərəfindən hərtərəfli qiymətləndirilməsi təkmilləşdiriləcək prioritet sahələri müəyyənləşdirməyə və gözlənilən nəticələrə nail olmaq üçün ardıcıl işləri planlaşdırmağa kömək edəcək. Həmçinin ticarət əlaqələrini yaxşılaşdırmağa imkan verəcək.
Oxşar xəbərlər
Dünyadakı epizootik vəziyyətə uyğun olaraq müvafiq tədbirlər görülür
Ümumdünya Heyvan Sağlamlığı Təşkilatının (ÜHST) rəsmi məlumatına əsasən, Əlcəzair Xalq Demokratik Respublikasının Uarqla, Ləğuat, Becaya əyalətlərində, Türkiyə Respublikasının Hakkari vilayətində dabaq xəstəliyi qeydə alınıb. Respublika ərazisinin bu yoluxucu xəstəlikdən qorunması üçün qeyd olunan ərazilərdə zonalaşma prinsipi nəzərə alınmaqla, xəstəlik baş vermiş təsərrüfatdan 10 km radiusda olan məsafədən cütdırnaqlı heyvanların (iri və xırdabuynuzlu heyvanlar, donuz, dəvə və s.), habelə onlara aid xammal və məhsulların idxalına və tranzit daşınmasına ÜHST-nin “Quruda yaşayan heyvanların sağlamlıq Məcəlləsi”inə uyğun olaraq AQTA tərəfindən müvəqqəti məhdudiyyət tətbiq olunub. Eyni zamanda müvafiq tədbirlərin görülməsi üçün Azərbaycan Respublikasının Dövlət Gömrük Komitəsinə müraciət olunub.
AQTA sədri Oğuzda vətəndaşları qəbul edib, istehsal müəssisələrinə baş çəkib
Qida Təhlükəsizliyi Agentliyinin sədri Qoşqar Təhməzli mayın 15-i Oğuzda Oğuz, Şəki, Qax, Zaqatala, Balakən, Qəbələ rayonlarından olan vətəndaşları qəbul edib. Qəbuldan əvvəl Ümummilli Lider Heydər Əliyevin abidəsi ziyarət edilib, önünə gül dəstələri düzülüb, xatirəsi ehtiramla yad edilib. Qəbulda vətəndaşların müraciətləri diqqətlə dinlənilib, bir qismi yerində öz həllini tapıb, qaldırılan bəzi məsələlər isə araşdırılması üçün nəzarətə götürülüb. AQTA sədri Qoşqar Təhməzli vətəndaşların qəbulu ilə bağlı səfəri çərçivəsində Oğuzda yerləşən "CPC" və Qaxda yerləşən "Ulu Aqro" MMC-lərdə istehsal prosesi ilə yaxından tanış olub.
“Bitki sağlamlığı haqqında” Qanun layihəsinin ictimai müzakirəsi davam edir
Azərbaycan Respublikasının Qida Təhlükəsizliyi Agentliyi (AQTA) tərəfindən yeni hazırlanan “Bitki sağlamlığı haqqında” Qanun layihəsinin bu sahədə elmi tədqiqatlar aparan alim və mütəxəssislərlə ictimai müzakirəsi təşkil edilib. Müzakirə zamanı AQTA rəsmisi Elxan Mikayılov yeni Qanun layihəsinin hazırlanmasında əsas məqsədin ölkədə bitki sağlamlığının təmin edilməsi, fitosanitar nəzarət və fitosanitar xidmətlərin hüquqi əsaslarının müəyyən edilməsi, bu sahədə fəaliyyət göstərən subyektlər arasında münasibətlərin tənzimlənməsi olduğunu bildirib. Qanun layihəsində yer alan elmi-tədqiqat institutları, təhsil müəssisələri, alimlər, tədqiqatçılar və məsləhətçilər tərəfindən elmi araşdırmalar zamanı aşkarlanan zərərli orqanizmin ərazidə mövcudluğuna dair məlumatın verilməsi qaydası, Azərbaycan Respublikasının ərazisində zərərli orqanizmlərin aşkarlanmasına dair mümkün mənbələrdən məlumatların çevik toplanması, dəqiqləşdirilməsi, zərərli orqanizmin identifikasiyası və mövcudluğunun təsdiqi qaydaları, ümumi monitorinqlə bağlı elmi-tədqiqat müəssisələrindən, universitetlərdən, ictimai təşkilatlardan, alimlərdən, tədqiqatçılardan, məsləhətçilərdən, elmi jurnallardan məlumatların toplanması və təhlili ilə bağlı müddəalar ətraflı müzakirə edilib. Görüşdə Qanun layihəsində yer alan anlayışlar, yeni terminlər, laboratoriyalarda zərərli orqanizmin identifikasiyasının həyata keçirilməsi, mövcudluğunun və yayılma vəziyyətinin rəsmi təsdiqi qaydası, risk qiymətləndirmələrinin aparılmasında alim və mütəxəssislərin yaxından iştirakının məqsədəuyğunluğu, o cümlədən inteqrir mübarizə ilə bağlı alimlərin rəy və təklifləri dinlənilib. Qanun layihəsinin hazırlanmasının ölkədə bitki sağlamlığı sahəsində mövcud olan problemlərin həllində mühüm addım olması alim və mütəxəsislər tərəfindən xüsusi vurğulanıb. Görüşdə digər maraq doğuran suallar cavablandırılıb.
