İctimai iaşə obyektlərində çalışanlar bir sıra qaydalara əməl etməlidir

9 Sentyabr 2024 11:03

İstehlakçılara sağlam və təhlükəsiz ictimai iaşə xidmətlərini göstərmək üçün həmin müəssisələrdə bir sıra qaydalara ciddi şəkildə əməl edilməli, o cümlədən işçi heyətinə dair tələblər yerinə yetirilməlidir. 
Qida məhsulları ilə təmasda olan işçilər icra etdikləri işə uyğun olaraq gigiyenik təlimlərə cəlb edilməlidir. İctimai iaşə obyektlərində çalışan hər bir şəxs gigiyena qaydalarına riayət etməli, təmiz, müvafiq iş geyimi və digər mühafizə vasitələri (əlcək, maska, saç toru və ya örtüyü, xalat, önlük) ilə təmin olunmalıdır. Çirklənmənin qarşısının alınması məqsədilə həmin geyim və vasitələr müvafiq qaydada istifadə edilməlidir. Qida məhsullarının istehsal olunduğu, emal edildiyi və saxlandığı yerlərdə qidalanma həyata keçirilməməli, tütün və tütün məmulatlarından (siqaretlər və s.) istifadə olunmamalıdır. Həmçinin belə yerlərdə şəxsi əşyalar və geyimlər saxlanılmamalı, aksesuarlardan istifadə edilməməlidir.
Xəstəliyi qida vasitəsilə keçə bilən və ya belə xəstəlik daşıyıcısı olan, yaxud infeksiyalı yaralar, dəri infeksiyaları və s. bu kimi şikayətləri olan şəxslərin hər hansı bir formada birbaşa, yaxud dolayısıyla qida ilə təmasının, o cümlədən qida istehsalı və emalı sahəsinə daxil olmasının qarşısı alınmalıdır. İşçi heyətinin qanunvericiliyə uyğun dövri olaraq və şübhəli hallarda tibbi müayinədən keçməsi təmin edilməlidir.
Bu qaydalara əməl olunmadıqda, bir sıra təhlükəli hallar meydana çıxır ki, bu da kütləvi zəhərlənmələrə və insanın həyat və sağlamlığı üçün arzuolunmaz hadisələrə səbəb ola bilər.

Oxşar xəbərlər

18 Sentyabr 2026 18:35

AQTA sədri Şəmkirdə istixana təsərrüfatlarında olub

Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzli Şəmkir rayonunda fəaliyyət göstərən “Shamkir Greenhouse” MMC və “AM Brothers Agro” MMC-nin istixana təsərrüfatlarında olub.

18 Sentyabr 2026 16:56

Ölkədə fəaliyyətinə icazə verilən heyvan bazarlarının sayı 22-ə çatdı - VİDEO

Qazax və Gədəbəy rayonlarında yerləşən heyvan bazarlarının biotəhlükəsizlik, həmçinin müasir standartlara uyğun yenidənqurma və abadlaşdırma işlərindən sonra fəaliyyətinə icazə verilib. Belə ki, bazarların giriş-çıxış qapısında dezbaryerlər quraşdırılıb, baytarlıq nəzarəti zamanı xəstəlik əlamətləri aşkar edilən heyvanların digər heyvanlardan təcrid olunaraq saxlanılması məqsədilə xüsusi izolyatorlar tikilib.

18 Sentyabr 2026 16:03

Ölkənin 33 rayon və şəhərində müasir heyvan kəsimi məntəqələri qurulmalıdır - VİDEO

Ət və ət məhsullarının təhlükəsizliyinin təmin edilməsi baxımından heyvanların kəsiminin müvafiq baytarlıq-sanitariya və sanitariya-gigiyena tələblərinə cavab verən ixtisaslaşdırılmış kəsim məntəqələrində həyata keçirilməsi mühüm əhəmiyyət daşıyır. Azərbaycan Respublikasının Qida Təhlükəsizliyi Agentliyi (AQTA) tərəfindən aparılan monitorinqlər göstərir ki, hazırda ölkənin 33 rayon və şəhərində heyvan kəsimi məntəqəsi ya mövcud deyil, ya da fəaliyyət göstərmir. Əhalinin sıx məskunlaşdığı bu bölgələrdə heyvan kəsimi məntəqələrinin mövcud olmaması heyvanların kəsiminin əksər hallarda küçələrdə, yol kənarlarında həyata keçirilməsinə şərait yaradır. Bu da öz növbəsində kəsim prosesinin, eləcə də əldə olunan ət və ət məhsullarının təhlükəsizliyinə nəzarətin təmin edilməsində birbaşa çətinliklər yaradır.