Giriş
Süd və süd məhsullarının ölkəyə idxalı qaydaları ilə bağlı videoçarx hazırlanıb
28 İyun 2024 11:24
Azərbaycan Respublikasının Qida Təhlükəsizliyi Agentliyi (AQTA) süd və süd məhsullarının idxalı proseduruna dair yeni videoçarx hazırlayıb.
Videoçarxda Azərbaycan Respublikasının gömrük ərazisinə idxal olunmuş süd və süd məhsulları üçün idxal sağlamlıq aktının əldə edilməsi və bu sənədlə bağlı müraciətə imtina verilməsi prosesi ətraflı şəkildə izah olunub. Bildirilib ki, Azərbaycan Respublikasının gömrük ərazisinə idxal edilmiş süd və süd məhsulları qida təhlükəsizliyi sahəsində tələblərə cavab verdikdə, idxal sağlamlıq aktı ilə təmin olunur və yalnız bundan sonra məhsulun dövriyyəyə buraxılmasına icazə verilir. Qida təhlükəsizliyi sahəsində tələblərə cavab verməməsi səbəbindən idxal sağlamlıq aktının əldə edilməsi ilə bağlı müraciətə imtina verildikdə isə qanunvericiliyə uyğun olaraq, həmin məhsulun utilizasiyası, geri qaytarılması və ya məhv edilməsi haqqında qərar qəbul olunur. Həmin məhsullar 10 gün ərzində geri qaytarılmadıqda və ya utilizasiya edilmədikdə isə qəbul olunan yeni qərar əsasında məhsul partiyası məhv edilir.
Qeyd edək ki, sahibkarlıq subyektləri bu videoçarx vasitəsilə qeyd olunan prosedurlar barədə ətraflı məlumat əldə edə biləcəklər.
Oxşar xəbərlər
Uyğunsuzluq aşkarlanan bioloji aktiv qida məhsulu məhv edilib
Azərbaycan Respublikası Qida Təhlükəsizliyi Agentliyinin nəzarət tədbirləri çərçivəsində “Nord Star Pharma” MMC tərəfindən Rusiyadan idxal olunan “Biokor” istehsal müəssisəsinə məxsus “Qlisin Вiоkоr” əmtəə nişanlı bioloji aktiv qida məhsulundan (istehsal və son istifadə tarixi: 15.06.2026-15.06.2029) nümunələr götürülərək laborator müayinələrə cəlb edilib. Sınaq nəticələrinə əsasən, bəyan olunmuş tərkibdə uyğunsuzluq aşkarlanıb. Faktla bağlı qanunvericiliyə uyğun müvafiq qərar qəbul edilib, ümumi çəkisi 216 kq olan 10 000 qutu məhsul partiyası məhv edilib.
İdxal olunan baytarlıq preparatında uyğunsuzluq aşkarlanıb
Azərbaycan Respublikasının Qida Təhlükəsizliyi Agentliyi tərəfindən həyata keçirilən nəzarət tədbirləri zamanı "Spektra-Vet" MMC-nin respublikamıza idxal etdiyi baytarlıq preparatlarının sınaq nəticələrində uyğunsuzluq aşkarlanıb. Belə ki, Çin Xalq Respublikasından idxal edilən “Farmazin Tylo” əmtəə nişanlı baytarlıq preparatı məhsul partiyasından götürülmüş nümunələrdə pH göstəricisinin normativ texniki tələblərə cavab vermədiyi müəyyən edilib. Uyğunsuzluqla əlaqədar qanunvericiliyə müvafiq qərar qəbul edilərək, 5010 ədəd 50 ml-lik, 3006 ədəd 100 ml-lik məhsul məhv edilib.
Fındıq istehsalçıları və ixracatçıları ilə görüş keçirilib
Azərbaycan Respublikasının Qida Təhlükəsizliyi Agentliyi (AQTA) fındıq istehsalçıları və ixracatçılarının iştirakı ilə onlayn görüş keçirib. Görüşdə fındıq bağlarında zərərli orqanizmlərin, xüsusilə qəhvəyi mərmər bağacığının (Halyomorpha halys) yayılmasının qarşısının alınması, mütəmadi monitorinqlərin aparılması və kompleks mübarizə tədbirlərinin tətbiqi müzakirə olunub. Həmçinin bitki mühafizə vasitələrindən düzgün istifadə, pestisid qalıqlarına dair normalar və ixrac ölkələrinin fitosanitar tələbləri barədə məlumat verilib. İstehsalçı və ixracatçıların qarşılaşdıqları problemlər dinlənilib, onların həlli yolları və müvafiq tədbirlərin görülməsi məsələləri ətrafında fikir mübadiləsi aparılıb.
