İstifadəyə yararsız, qeydiyyatdan keçməmiş və etiket məlumatlarına uyğun olmayan pestisid və aqrokimyəvi maddələr aşkarlanıb

26 Sentyabr 2022 16:15

Bitki sağlamlığının təmin olunması, standartlara cavab verən yüksək keyfiyyətli qida məhsullarının istehsalı, ölkə ərazisində bitki örtüyünün qorunması və inkişafı üçün istifadə olunan bitki mühafizə vasitələri (pestisid və bioloji preparatlar) və aqrokimyəvi maddələrin istehsalı, idxalı, ixracı, saxlanılması və satışı ilə bağlı qaydalara əməl olunması xüsusi əhəmiyyət kəsb edir. Bununla bağlı olaraq, Azərbaycan Respublikasının Qida Təhlükəsizliyi Agentliyi (AQTA) tərəfindən pestisid və aqrokimyəvi maddələrin satış və saxlanma yerlərində mütəmadi yoxlama-nəzarət tədbirləri keçirilir.

AQTA və Kənd Təsərrüfatı Nazirliyi yanında Aqrar Xidmətlər Agentliyi ilə birgə keçirilən monitorinqlər çərçivəsində indiyə kimi 185 pestisid və aqrokimyəvi maddələrin satış yerinə baxış keçirilib. Bu obyektlərdən 60-ı pestisid, 104-ü aqrokimyəvi maddə olmaqla, ümumilikdə 164 nümunə götürülərək, keyfiyyət göstəricilərinin yoxlanılması məqsədilə Azərbaycan Qida Təhlükəsizliyi İnstitutunun (AQTİ) müvafiq laboratoriyasına göndərilib.

Nəzarət tədbirləri çərçivəsində tərkibinin etiketindəki göstəricilərlə uyğun olmadığı, istifadə müddəti bitmiş, qeydiyyatdan keçməmiş pestisid və aqrokimyəvi maddələr aşkarlanıb. Belə ki, yoxlamalar zamanı 124 preparatın 6-nın tərkibinin etiketindəki göstəricilərlə uyğun olmadığı müəyyən edilib. Digər 40 nümunənin analizi isə davam edir.

Etiket məlumatlarına uyğun olmayan pestisid və aqrokimyəvi maddələr aşağıdakılardır:

Həyata keçirilən monitorinqlər zamanı Bakı, Şəki, Salyan, Lənkəran, Tovuz, Gəncə və Bərdə regional bölmələri tərəfindən pestisid və aqrokimyəvi maddələrin satış yerlərində ümumilikdə 124 adda (417,85 L və 404,6 kq pestisid, 24486,9 L və 3014 kq aqrokimyəvi maddə) istifadə müddəti bitmiş preparatlar müəyyən edilib.

Eyni zamanda Şəki, Gəncə və Bərdə regional bölmələri tərəfindən keçirilən monitorinqlər zamanı 11 pestisid və aqrokimyəvi maddələrin satış yerində 9-u pestisid, 3-ü aqrokimyəvi maddə olmaqla, 12 adda qeydiyyatdan keçməmiş preparatlar aşkar edilib.

Qeydiyyatdan keçməyən pestisid və aqrokimyəvi maddələr aşağıdakılardır:

1. İran İslam Respublikasının “Zarpashimi Cova” şirkətinin istehsalı olan “VALUE PACK”;

2. Türkiyə Respublikasının “Doğal Tarım” şirkətinin istehsalı olan “Sperpon combi”;

3. Türkiyə Respublikasının “Doğal Kimya” şirkətinin istehsalı olan “Vinifill 24 EC”;

4. Türkiyə Respublikasının “Pileryum Tarım” şirkətini istehsalı olan “Piler Thiram”;

5. Hindistan Respublikasının “Modern İnsecticides LTD” şirkətinin istehsalı olan “Negaban”;

6. Almaniya Federativ Respublikasının istehsalı olan “Topez 10% EC”;

7. İran İslam Respublikasının “Astranova” şirkətinin istehsalı olan “Bordeaux Fix”;

8. Türkiyə Respublikasının “Tarkım” şirkətinin istehsalı olan “Efdal Pirinos”;

9. Türkiyə Respublikasının “Kimya Tarımcılar” şirkətinin istehsalı olan “Fully Combi”;

10. Türkiyə Respublikasının “Pileryum Tarım” şirkətini istehsalı olan “Piler İron”;

11. Türkiyə Respublikasının “Lorem” şirkətini istehsalı olan “Lorem 10.48.10+TE”;

12. İordaniya Haşimi Krallığının “Vapco” şirkətinin istehsalı olan “Supermetrin N-25% EC”.

Sınaq nəticəsi uyğunsuz çıxan preparatlar dövriyyədən çıxarılaraq möhürlənib və sahibkarlar onların toxunulmazlığının təmin edilməsi ilə əlaqədar təlimatlandırılıblar. İstifadəyə yararsız hesab olunan preparatların zərərsizləşdirilməsi və ya məhv edilməsi ilə bağlı Agentlik tərəfindən müvafiq qərar qəbul ediləcək.

İstifadəyə yararsız, qeydiyyatdan keçməmiş və etiket məlumatlarına uyğun olmayan pestisid və aqrokimyəvi maddələrin fermer təsərrüfatları tərəfindən istifadəsi həmin təsərrüfatlarda gözlənilən nəticələrin əldə olunmamasına gətirib çıxarır ki, bu da fermerlərin haqlı narazılığına səbəb olur.

AQTA adıçəkilən pestisid və aqrokimyəvi maddələrin satışının qanunazidd olduğunu bildirir və fermerləri sınaqdan keçməmiş, istifadə müddəti bitmiş, qeydiyyatsız preparatları təsərrüfatlarda istifadə etməməyə çağırır.

Oxşar xəbərlər

15 May 2025 14:49

“Bitki sağlamlığı haqqında” Qanun layihəsinin ictimai müzakirəsi davam edir

Azərbaycan Respublikasının Qida Təhlükəsizliyi Agentliyi (AQTA) tərəfindən yeni hazırlanan “Bitki sağlamlığı haqqında” Qanun layihəsinin bu sahədə elmi tədqiqatlar aparan alim və mütəxəssislərlə ictimai müzakirəsi təşkil edilib.   Müzakirə zamanı AQTA rəsmisi Elxan Mikayılov yeni Qanun layihəsinin hazırlanmasında əsas məqsədin ölkədə bitki sağlamlığının təmin edilməsi, fitosanitar nəzarət və fitosanitar xidmətlərin hüquqi əsaslarının müəyyən edilməsi, bu sahədə fəaliyyət göstərən subyektlər arasında münasibətlərin tənzimlənməsi olduğunu bildirib. Qanun layihəsində yer alan elmi-tədqiqat institutları, təhsil müəssisələri, alimlər, tədqiqatçılar və məsləhətçilər tərəfindən elmi araşdırmalar zamanı aşkarlanan zərərli orqanizmin ərazidə mövcudluğuna dair məlumatın verilməsi qaydası, Azərbaycan Respublikasının ərazisində zərərli orqanizmlərin aşkarlanmasına dair mümkün mənbələrdən məlumatların çevik toplanması, dəqiqləşdirilməsi, zərərli orqanizmin identifikasiyası və mövcudluğunun təsdiqi qaydaları, ümumi monitorinqlə bağlı elmi-tədqiqat müəssisələrindən, universitetlərdən, ictimai təşkilatlardan, alimlərdən, tədqiqatçılardan, məsləhətçilərdən, elmi jurnallardan məlumatların toplanması və təhlili ilə bağlı müddəalar ətraflı müzakirə edilib. Görüşdə Qanun layihəsində yer alan anlayışlar, yeni terminlər, laboratoriyalarda zərərli orqanizmin identifikasiyasının həyata keçirilməsi, mövcudluğunun və yayılma vəziyyətinin rəsmi təsdiqi qaydası, risk qiymətləndirmələrinin aparılmasında alim və mütəxəssislərin yaxından iştirakının məqsədəuyğunluğu, o cümlədən inteqrir mübarizə ilə bağlı alimlərin rəy və təklifləri dinlənilib. Qanun layihəsinin hazırlanmasının ölkədə bitki sağlamlığı sahəsində mövcud olan problemlərin həllində mühüm addım olması alim və mütəxəsislər tərəfindən xüsusi vurğulanıb. Görüşdə digər maraq doğuran suallar cavablandırılıb.

12 May 2025 11:16

12 May - Beynəlxalq Bitki Sağlamlığı Günüdür

12 May - Beynəlxalq Bitki Sağlamlığı Günüdür. Birləşmiş Millətlər Təşkilatı tərəfindən elan edilən bu günün məqsədi bitki sağlamlığının qorunmasının qlobal miqyasda əhəmiyyətini vurğulamaq və bu sahədə ictimaiyyəti maarifləndirməkdir. Azərbaycan Respublikasının Qida Təhlükəsizliyi Agentliyi tərəfindən ölkəmizdə bitki sağlamlığının qorunması, həmçinin xəstəliklərin, zərərvericilərin vaxtında aşkarlanaraq onlara qarşı effektiv mübarizə tədbirlərinin görülməsi məqsədilə mütəmadi tədbirlər həyata keçirilir. Qida zəncirinin əsas elementlərindən olan bitki sağlamlığı sahəsində hüquqi bazanın təkmilləşdirilməsi istiqamətində AQTA tərəfindən yeni “Bitki sağlamlığı haqqında” Azərbaycan Respublikasının Qanun layihəsi hazırlanıb. Qanun layihəsinin məqsədləri əsasəsn bitki xəstəliklərinə qarşı mübarizə metodlarını daha da təkmilləşdirmək, pestisidlərin, aqrokimyəvi maddələrin düzgün istifadəsini nəzarət altına almaq, kənd təsərrüfatı məhsullarının beynəlxalq tələblərə uyğunluğunu təmin etməkdir. Həmçinin bitki sağlamlığının təmin olunmasında Azərbaycan Qida Təhlükəsizlyi İnstitutunun ixtisaslaşmış laboratoriyaları xüsusi rola malikdir. Mərkəzi Fitosanitar Laboratoriyasında entomoloji, herboloji, fitohelmintoloji, mikoloji, bakterioloji və virusoloji ekspertizalar aparılır. Kompleks Tədqiqatlar Laboratoriyasında beynəlxalq metodlardan istifadə edilərək, pestisid və aqrokimyəvi maddələrin laboratoriya sınaqları həyata keçirilir. Milli Referens Laboratoriyasında meyvə-tərəvəz məhsullarında pestisidlərin qalıq miqdarları təyin olunur. Eyni zamanda Xaçmaz, Lənkəran və Tovuz Regional Sınaq Laboratoriyalarında bitki xəstəliklərinin aşkar olunması istiqamətində ən müasir laborator sınaqlar həyata keçirir. Eləcə də fitosanitar sahədə nəzarətin daha da gücləndirilməsi və işin səmərəli təşkili məqsədilə Səyyar Fitosanitar Laboratoriya fəaliyyət göstərir.

12 May 2025 10:28

Bitki sağlamlığının qorunması istiqamətində tədbirlər davam etdirilir

Karantin tətbiq edilən, o cümlədən potensial təhlükəli zərərli orqanizmlərdən qorumaq və onların mənbələrini vaxtında aşkarlamaq məqsədilə karantin nəzarətində olan materiallarda müntəzəm olaraq müşahidələrin aparılması, fitosanitar ekspertizaların keçirilməsi və profilaktik tədbirlərin görülməsi istiqamətində Qida Təhlükəsizliyi Agentliyinin müfəttişləri tərəfindən fitosanitar monitorinqlər davam etdirilir. Milli Monitorinq Planı çərçivəsində Agentliyin Şəki-Zaqatala regional bölməsinin əməkdaşları tərəfindən ilkin istehsal təsərrüfatlarında keçirilmiş fitosanitar monitorinqlər zamanı simptomlu bitki hissələrindən nümunələr götürülərək laborator müayinələrə cəlb edilib. Müayinələr nəticəsində Şəki rayonunun Öryət və Çeşməli kəndləri ərazisində yerləşən tumlu-çəyirdəkli meyvə bağlarında karantin tətbiq edilən göbələk mənşəli Qonur monilioz çürümə xəstəliyi aşkarlanıb. Monitorinq zamanı həmçinin bağçılıq təsərrüfatlarında Qəhvəyi mərmər bağacığı, Şaftalı meyvəyeyəni, Qərb çiçək tripsi və Şərq meyvəyeyəni kimi karantin tətbiq edilən zərərvericilərin mövcudluğunu müəyyənləşdirmək məqsədilə feromon tələlər asılıb. Sahə aqronomu və texniki işçilərlə söhbətlər aparılıb, zərərvericilərlə mübarizə üsulları əks olunan maarifləndirici çap materialları paylanıb. Eyni zamanda təsərrüfat sahiblərinə və işçilərə pestisid və aqrokimyəvi maddələrin saxlanması, daşınması, tətbiq reqlamenti, o cümlədən istifadəsi zamanı təhlükəsizlik qaydalarına əməl olunması barədə tövsiyələr verilib.