Giriş
Türkiyəli mütəxəssis pomidor bitkisinin qonur qırışıqlıq virusunun müasir metodlarla təyin olunması ilə bağlı təqdimat keçirib
14 Sentyabr 2021 11:46
Azərbaycan Qida Təhlükəsizliyi İnstitutunun (AQTİ) nəzdində fəaliyyət göstərən laboratoriyaların mütəxəssislərinin peşəkarlıq və səriştəlilik səviyyəsinin artırılması əsas prioritet sahələrdəndir. Hazırda bu istiqamətdə istər nəzəri tədqiqatların, istərsə də praktik fəaliyyətin gücləndirilməsi məqsədilə xarici ölkə laboratoriyaları, beynəlxalq təşkilatlarla əməkdaşlıq mütəmadi olaraq davam etdirilir.
Mütəxəssislərin peşəkarlığının beynəlxalq standartların tələbinə uyğunlaşdırılması məqsədilə türkiyəli mütəxəssislərlə qarşılıqlı təcrübə mübadiləsi çərçivəsində Türkiyənin “Letgen Biotechnology” şirkətinin rəhbəri Fahrettin Özcan növbəti dəfə AQTİ laboratoriyalarının əməkdaşlarına təlim keçib. Türkiyəli mütəxəssis dünyada mövcud olan beynəlxalq standartların tələbinə uyğun olaraq qida təhlükəsizliyi sahəsində laboratoriya sistemində yeniliklərin öyrənilməsi və tətbiq edilməsinin zəruriliyindən bəhs edib. Bildirib ki, bitki sağlamlığı sahəsində laborator müayinə metodları arasında real zamanlı PZR üsulu yüksək dəqiqliyi və operativliyi təmin etmək baxımından olduqca effektivdir. Xüsusən də pomidor bitkisinin qonur qırışıqlıq virusunun real zamanlı PZR ilə təyininin daha mütərəqqi üsul olduğunu diqqətə çatdırıb.
Daha sonra təlim iştirakçılarına real zamanlı PZR metodunun üstünlükləri, tətbiqi, eləcə də analizlərin “Letgen Biotechnology” şirkətinə məxsus kit dəstləri ilə təyini üzrə geniş təqdimat keçirilib. İnteraktiv müzakirələrlə davam edən təlimdə F. Özcan AQTİ laboratoriyalarının mütəxəssislərinin suallarını cavablandırıb, bitkiçilik və bitki mühafizəsi üzrə təcrübəsini bölüşüb.
Oxşar xəbərlər
Fındıq bağlarında fitosanitar monitorinqlər aparılıb
Qida Təhlükəsizliyi Agentliyinin Şəki-Zaqatala regional bölməsi tərəfindən Milli Monitorinq Planı çərçivəsində region ərazisində yerləşən fındıq bağlarında fitosanitar monitorinqlər aparılıb. Monitorinqlər zamanı əsas diqqət karantin tətbiq edilən Qəhvəyi mərmər bağacığının aşkarlanmasına və ona qarşı fitosanitar tədbirlərin gücləndirilməsinə yönəldilib. Bu məqsədlə Zaqatala rayonundan Danaçı, Fındıqlı, Maqov, Dağlı, Muğanlı, Faldarlı, 3-cü Tala kəndlərində, Balakən rayonundan isə İtitala, Xalatala, Gərəkli, Poçtbinə, Mazımqara, Şərif, Yeni Şərif kəndlərində yerləşən bağ sahələrində müşahidələr aparılıb və xüsusi feromon tələlər quraşdırılıb. Zərərverici aşkarlanmış sahələrdə aqrotexniki və biotexniki tədbirlər barədə fermerlər və aidiyyəti qurumlar operativ şəkildə məlumatlandırılıb, zəruri fitosanitar tədbirlərin həyata keçirilməsi tövsiyə olunub.
Meyvə bağlarında fitosanitar monitorinqlər davam etdirilir
Milli Monitorinq Planına uyğun olaraq, Qida Təhlükəsizliyi Agentliyinin əməkdaşları ölkə ərazisində zərərli orqanizmlərin vaxtında aşkarlanması və yayılmasının qarşısının alınması məqsədilə fitosanitar monitorinqlər keçirib. Monitorinqlər Göyçay rayonunun Potu, Hüngütlü, Mallı - Şıxlı, Məlikkənd, Ləkçıplaq və Ağdaş rayonunun Ərəbocağı, Nehrəxəlil, Yeniarx kəndləri, habelə Saatlı rayonunun Sarısu ərazisi, Hacıqasımlı kəndində, Sabirabad rayonunun Bulduq və Nizami kəndlərində, həmçinin Beyləqan rayonunun Türklər kəndi ərazisində yerləşən meyvə bağları və bitkiçilik təsərrüfatlarını əhatə edib.
Bərdə, Ağcabədi və Tərtərdə fitosanitar monitorinqlər keçirilib
Milli Monitorinq Planına uyğun olaraq, Qida Təhlükəsizliyi Agentliyinin əməkdaşları ölkə ərazisində zərərli orqanizmlərin vaxtında aşkarlanması və yayılmasının qarşısının alınması məqsədilə fitosanitar monitorinqlər keçirib. Monitorinqlər Bərdə rayonunun Qazıqurdalı, Samuxlu, Qaraqoyunlu və Qaradəmirçilər kəndlərində, Ağcabədi rayonunun Minaxorlu kəndi və Hindarx qəsəbəsində, həmçinin Tərtər rayonunun Borsunlu, Hacıqərvənd, Xoruzlu və Kəngərli kəndlərində yerləşən meyvə bağları və bitkiçilik təsərrüfatlarını əhatə edib. Təsərrüfat sahibləri ilə maarifləndirici söhbətlər aparılıb, onlara karantin tətbiq edilən zərərli orqanizmlər, mübarizə tədbirləri, eləcə də pestisidlərdən istifadə zamanı təhlükəsizlik qaydalarına əməl olunmasının vacibliyi barədə ətraflı məlumat verilib. Monitorinqlər çərçivəsində Qəhvəyi mərmər bağacığına qarşı feromon tələlər asılıb. Eyni zamanda sirayətlənmə əlamətləri müşahidə edilən təsərrüfatlardan nümunələr götürülərək müvafiq laboratoriyalara təqdim olunub.
