Giriş
Türkiyəli mütəxəssis pomidor bitkisinin qonur qırışıqlıq virusunun müasir metodlarla təyin olunması ilə bağlı təqdimat keçirib
14 Sentyabr 2021 11:46
Azərbaycan Qida Təhlükəsizliyi İnstitutunun (AQTİ) nəzdində fəaliyyət göstərən laboratoriyaların mütəxəssislərinin peşəkarlıq və səriştəlilik səviyyəsinin artırılması əsas prioritet sahələrdəndir. Hazırda bu istiqamətdə istər nəzəri tədqiqatların, istərsə də praktik fəaliyyətin gücləndirilməsi məqsədilə xarici ölkə laboratoriyaları, beynəlxalq təşkilatlarla əməkdaşlıq mütəmadi olaraq davam etdirilir.
Mütəxəssislərin peşəkarlığının beynəlxalq standartların tələbinə uyğunlaşdırılması məqsədilə türkiyəli mütəxəssislərlə qarşılıqlı təcrübə mübadiləsi çərçivəsində Türkiyənin “Letgen Biotechnology” şirkətinin rəhbəri Fahrettin Özcan növbəti dəfə AQTİ laboratoriyalarının əməkdaşlarına təlim keçib. Türkiyəli mütəxəssis dünyada mövcud olan beynəlxalq standartların tələbinə uyğun olaraq qida təhlükəsizliyi sahəsində laboratoriya sistemində yeniliklərin öyrənilməsi və tətbiq edilməsinin zəruriliyindən bəhs edib. Bildirib ki, bitki sağlamlığı sahəsində laborator müayinə metodları arasında real zamanlı PZR üsulu yüksək dəqiqliyi və operativliyi təmin etmək baxımından olduqca effektivdir. Xüsusən də pomidor bitkisinin qonur qırışıqlıq virusunun real zamanlı PZR ilə təyininin daha mütərəqqi üsul olduğunu diqqətə çatdırıb.
Daha sonra təlim iştirakçılarına real zamanlı PZR metodunun üstünlükləri, tətbiqi, eləcə də analizlərin “Letgen Biotechnology” şirkətinə məxsus kit dəstləri ilə təyini üzrə geniş təqdimat keçirilib. İnteraktiv müzakirələrlə davam edən təlimdə F. Özcan AQTİ laboratoriyalarının mütəxəssislərinin suallarını cavablandırıb, bitkiçilik və bitki mühafizəsi üzrə təcrübəsini bölüşüb.
Oxşar xəbərlər
Xankəndi və Xocalıda zərərvericilərə qarşı maarifləndirmə tədbirləri keçirilib
Azərbaycan Respublikası Qida Təhlükəsizliyi Agentliyinin əməkdaşları tərəfindən Xankəndi şəhərində, eləcə də Xocalı rayonunun Şuşakənd, Malıbəyli və Quşçular kəndlərində fitosanitar nəzarət və maarifləndirmə tədbirləri keçirilib. Tədbirlərin əsas məqsədi qəhvəyi mərmər bağacığı və Amerika ağ kəpənəyinin ölkə ərazisində yayılmasının qarşısının alınması, bu zərərvericilərin vaxtında aşkar edilməsi və sakinlərin bu sahədə məlumatlılıq səviyyəsinin artırılmasıdır. Yerli sakinlərə karantin tətbiq edilən zərərvericilərin bioloji xüsusiyyətləri, yayılma yolları, xarakterik əlamətləri, habelə kənd təsərrüfatı bitkilərinə və yaşıllıqlara vura biləcəyi zərərlər barədə ətraflı məlumat verilib. Zərərvericilərin yayılmasının qarşısını almaq üçün xüsusilə payız-qış mövsümündə həyata keçirilməsi tövsiyə olunan mexaniki və profilaktik mübarizə tədbirləri izah olunub. Tədbirlər çərçivəsində zərərvericilərin vaxtında müəyyən edilməsi, onların mümkün yayılma ocaqlarının aşkarlanması və müvafiq mübarizə tədbirlərinin görülməsinin əhəmiyyəti diqqətə çatdırılıb, sakinlərə maarifləndirici çap materialları paylanıb.
Amerika ağ kəpənəyi və Qəhvəyi mərmər bağacığı ilə bağlı maarifləndirmə tədbirləri davam etdirilir
Amerika ağ kəpənəyi və Qəhvəyi mərmər bağacığının ölkə ərazisində yayılmasının qarşısının alınması və zərərvericilərlə mübarizə məqsədilə Azərbaycan Respublikasının Qida Təhlükəsizliyi Agentliyi tərəfindən fitosanitar nəzarət və maarifləndirmə tədbirləri davam etdirilir. Zərərvericilərə qarşı bitki mühafizəsi tədbirləri çərçivəsində Şəki-Zaqatala regional bölməsinin əməkdaşları tərəfindən Oğuz rayonunun Bucaq, Bayan, Qəbələ rayonunun isə Mirzəbəyli kəndlərində sakinlərlə maarifləndirici görüşlər keçirilib. Görüşlər zamanı zərərvericilərin bioloji xüsusiyyətləri, yayılma səbəbləri, bitkilərə vurduğu zərər, xüsusilə Amerika ağ kəpənəyinin tırtıl mərhələsində yaratdığı təhlükə və ona qarşı mübarizə tədbirləri barədə vətəndaşlara məlumat verilib. Eyni zamanda, zərərvericilərin vaxtında aşkarlanmasının və onların yayılmasının qarşısının alınması məqsədilə mütəmadi müşahidə və monitorinqlərin aparılmasının vacibliyi diqqətə çatdırılıb. Tədbirlər çərçivəsində kənd sakinlərinə zərərvericilərlə bağlı maarifləndirici bukletlər təqdim olunub, onların sualları cavablandırılıb və müvafiq fitosanitar tələblərə əməl olunması ilə bağlı tövsiyələr verilib.
Qəhvəyi mərmər bağacığı ilə bağlı maarifləndirmə tədbirləri davam etdirilir
Qəhvəyi mərmər bağacığının ölkə ərazisində yayılmasının qarşısının alınması məqsədilə Qida Təhlükəsizliyi Agentliyi tərəfindən fitosanitar nəzarət və maarifləndirmə tədbirləri davam etdirilir. Zərərvericiyə qarşı bitki mühafizəsi tədbirləri çərçivəsində Quba-Xaçmaz regional bölməsinin əməkdaşları tərəfindən Xaçmaz rayonunun Arzu kəndində kənd sakinləri ilə maarifləndirici görüşlər keçirilib. Görüşlər zamanı qəhvəyi mərmər bağacığının payız aylarında açıq sahələri tərk edərək qışlama məqsədilə evlərə, anbarlara və digər qapalı tikililərə toplanması barədə sakinlərə məlumat verilib. Eyni zamanda, zərərvericinin sayının azaldılmasında effektiv üsullardan biri olan mexaniki mübarizə tədbirləri və onların tətbiqi qaydaları izah edilib, kənd sakinlərinə qəhvəyi mərmər bağacığı haqqında məlumat kitabçaları paylanıb.
