Giriş
AQTA-nın nümayəndə heyəti Avstriya Respublikasında işgüzar səfərdə olub
19 Oktyabr 2022 15:42
Azərbaycan Respublikasının Qida Təhlükəsizliyi Agentliyinin (AQTA) nümayəndə heyəti 12-13 oktyabr tarixlərində Avstriya Respublikasında işgüzar səfərdə olub.
Agentliyin sədr müavini Zəkiyyə Mustafayevanın rəhbərlik etdiyi nümayəndə heyəti səfər çərçivəsində bu ölkənin Sağlamlıq və Qida Təhlükəsizliyi Agentliyinin icraçı direktoru Tomas Kikingerin rəhbərlik etdiyi nümayəndə heyəti ilə görüşüb. Görüş zamanı AQTA-nın fəaliyyət istiqamətləri, son illər ölkəmizdə qida təhlükəsizliyi sahəsində görülən tədbirlər barədə geniş məlumat verilib. Həmçinin Avstriya Respublikasında risklərin və böhran vəziyyətlərin idarə edilməsi mexanizmi, dövriyyəyə buraxılan bitki mühafizə vasitələrinin əsas təsiredici maddələrindən başqa, preparatın tərkibindəki digər köməkçi komponentlər üzərində həyata keçirilən yoxlama-nəzarət tədbirləri müzakirə olunub. Eləcə də GMO yemlərin, qida, bioloji fəallığa malik qida və yem əlavələrinin, qablaşdırılmış təbii mineral suların, yeni növ qida məhsullarının Avropa İttifaqında təsdiqindən sonra Avstriya Respublikasında ölkədaxili qeydiyyata alınması və bununla bağlı prosedur qaydaları üzrə gələcək əməkdaşlıq perspektivlərinə dair fikir mübadiləsi aparılıb. Tərəflər qida təhlükəsizliyi sahəsində qarşılıqlı əməkdaşlığı genişləndirmək niyyətlərini bəyan ediblər.
Agentliyin nümayəndə heyəti ilə Avstriya Respublikasının Qida Təhlükəsizliyi İnstitutunun nümayəndə heyəti arasında da görüş keçirilib. Görüş zamanı hər iki ölkənin qida təhlükəsizliyi institutları barədə məlumat verilib. Eyni zamanda, risk qiymətləndirilməsi və qida məhsullarında müxtəlif növ baytarlıq preparatları ilə farmakoloji aktiv maddələrin qalıqlarının təyini sınaqlarının aparılması üzrə Avstriya təcrübəsinin öyrənilməsinin vacibliyi vurğulanıb. AQTA-nın nümayəndə heyətinin üzvləri laboratoriyaların faəliyyəti ilə yaxından tanış olub. Həmçinin qida təhlükəsizliyinə dair normativ texniki hüquqi aktların Avropa İttifaqı qanunvericiliyinə uyğunlaşdırılması, risklərin və böhran vəziyyətlərin idarəedilməsi ilə bağlı Avstriya təcrübəsinin öyrənilməsi, qida məhsullarının idxal-ixrac prosedurlarının sadələşdirilməsi, laboratoriyaların inkişafı və qurulması sahəsində birgə əməkdaşlığa dair fikir mübadiləsi aparılıb.
AQTA-nın nümayəndə heyəti Avstriya Respublikasının İstehlakçıların Sağlamlığı üzrə Federal İdarəsində də görüş keçirib. Görüşdə Azərbaycanda ixrac potensialı yüksək olan təzə meyvə və tərəvəzin, eləcə də heyvan mənşəli məhsulların Avropa bazarına çıxarılması üçün Avstriyanın bitki sağlamlığı, baytarlıq və qida təhlükəsizliyi sahəsindəki şərtlərinin, həmçinin ölkəmizin bu sahə ilə bağlı idxal tələblərinin tətbiqi zamanı qarşıya çıxa biləcək məsələlər müzakirə olunub. Eyni zamanda, gələcəkdə Avropa İttifaqı ölkələrində fəaliyyət göstərən subyektlərin təsdiq sisteminin ekvivalentliyinin tanınması, qida təhlükəsizliyi, fitosanitar və baytarlıq nəzarəti üzrə gələcək əməkdaşlıq perspektivlərinə dair fikir mübadiləsi aparılıb.
Oxşar xəbərlər
Bayramla bağlı 135 ünvanda qurbanlıq heyvanların satışı və kəsimi xidmətləri göstərilir
İyunun 6-sı və 7-si tarixlərini əhatə edən Qurban bayramı günlərində əhalinin təhlükəsiz ət və ət məhsulları ilə təmin olunması, həmçinin qurbanlıq heyvan kəsimi və satışının müvafiq norma və qaydalara uyğun, təhlükəsiz və sağlam şəraitdə həyata keçirilməsi üçün Qida Təhlükəsizliyi Agentliyi və aidiyyəti qurumlar tərəfindən bütün zəruri tədbirlər görülüb. Tədbirlər çərçivəsində Naxçıvan Muxtar Respublikası da daxil olmaqla, ölkə üzrə 135 ünvanda qurbanlıq heyvanların satışı və kəsimi xidmətləri təşkil edilib. Onlardan 77-də qurbanlıq heyvanların kəsimi və satışı, 30-da yalnız satışı, 28-də isə yalnız kəsimi xidmətləri vətəndaşlara təklif olunur. Bununla yanaşı, bir sıra regionlarda səyyar heyvan kəsimi çadırları quraşdırılaraq qurbanlıq heyvanların baytarlıq nəzarəti altında kəsimi və satışı həyata keçirilir. Bu çərçivədə Zəngilan rayonunun Ağalı kəndində və Ağdərə rayonunun Talış kəndində, həmçinin Ağdam, Şuşa, Füzuli və Cəbrayıl rayonlarında da heyvan kəsimi üçün çadırlar quraşdırılıb. Kəsim məntəqələrində Qida Təhlükəsizliyi İnstitutunun baytarlıq laboratoriyaları da mövcuddur. Gücləndirilmiş rejimdə fəaliyyət göstərən laboratoriyalarda peşəkar baytar həkimlər fəaliyyət göstərir. Qurbanlıq heyvanlar arasında hər hansı xəstəliyə şübhə yaranarsa, daxili orqanlarından nümunə götürülərək həmin laboratoriyalarda, eyni zamanda Mərkəzi Baytarlıq Laboratoriyasında müayinə edilir. Ölkə ərazisində fəaliyyət göstərən soyuducu infrastruktura malik ticarət şəbəkələri tərəfindən də əvvəlcədən qəbul olunmuş sifarişlər əsasında qurbanlıq heyvanların kəsilməsi və ətinin vətəndaşlara çatdırılması xidməti həyata keçirilir. Vətəndaşlar qurbanlıq heyvanların kəsim və satış məntəqələri barədə məlumatı Agentliyin saytından (afsa.gov.az/az/qurban-bayrami-2025) əldə edə bilərlər. Vətəndaşlardan bayram günlərində heyvan kəsimi və satışı fəaliyyətləri ilə bağlı xoşagəlməz hallarla rastlaşdıqda, aidiyyəti dövlət qurumlarına və ya Agentliyin “1003-Çağrı Mərkəzi”nə məlumat vermələri xahiş olunur.
Latviyanın Vidzeme regionunda quş qripi xəstəliyi qeydə alınıb
Ümumdünya Heyvan Sağlamlığı Təşkilatının (ÜHST) rəsmi məlumatına əsasən, Latviya Respublikasının Vidzeme regionunda yüksək patogen quş qripi xəstəliyi qeydə alınıb. Respublika ərazisinin qeyd olunan yoluxucu xəstəlikdən qorunması üçün Vidzeme regionunda zonalaşma prinsipi nəzərə alınmaqla, xəstəlik baş vermiş təsərrüfatdan 10 km radiusda olan məsafədə yerləşən müəssisələrdən diri quş və quşçuluq məhsullarının idxalına ÜHST-nin “Quruda yaşayan heyvanların sağlamlıq Məcəlləsi”nə uyğun olaraq Qida Təhlükəsizliyi Agentliyi tərəfindən müvəqqəti məhdudiyyət tətbiq olunub. Eyni zamanda müvafiq tədbirlərin görülməsi üçün Dövlət Gömrük Komitəsinə müraciət olunub.
Qurbanlıq heyvanların satışı və kəsimi xidmətləri göstəriləcək ünvanların SİYAHISI
Qurbanlıq heyvan kəsimi və satışının müvafiq norma və qaydalara uyğun, sağlam və rahat şəraitdə həyata keçirilməsi məqsədilə bu il Naxçıvan Muxtar Respublikası da daxil olmaqla, ölkə üzrə 135 ünvanda qurbanlıq heyvanların satışı və kəsimi xidmətləri təşkil olunacaq. Bunlardan 77-də həm kəsim, həm satış, 30-da qurbanlıq heyvanların yalnız satışı, 28-də isə yalnız heyvan kəsimi xidmətləri təklif olunacaq. Həmin məntəqələrdə baytarlıq nəzarətindən keçmiş və sanitar-gigiyenik tələblər gözlənilməklə kəsilmiş qurbanlıq heyvanlar əhaliyə təqdim olunacaq. Bununla yanaşı, bir sıra regionlarda Qida Təhlükəsizliyi Agentliyi ilə razılaşdırılmaqla səyyar heyvan kəsimi çadırları quraşdırılaraq qurbanlıq heyvanların baytarlıq nəzarəti altında kəsimi və satışı təmin ediləcək. Həmçinin ölkə ərazisində fəaliyyət göstərən müvafiq infrastruktura malik ticarət şəbəkələri tərəfindən sifarişlərə uyğun bayram günlərində qurbanlıq heyvan ətinin vətəndaşlara çatdırılması nəzərdə tutulur. Bununla bağlı həmin satış şəbəkələri tərəfindən ətraflı məlumatlar veriləcək. Vətəndaşlar bayram günlərində saat 08:00-dan 20:00-dək qurbanlıq heyvanları satmaq, almaq və ya kəsdirmək üçün yuxarıda qeyd edilən xidmətlərdən istifadə edə bilərlər. Ölkə üzrə qurbanlıq heyvanların satışı və kəsimi yerləri barədə məlumatları https://afsa.gov.az/az/qurban-bayrami-2025 linkinə daxil olmaqla, eləcə də aşağıdakı cədvəldən əldə edə bilərsiniz:
