Giriş
Qida məhsullarının çatdırılması zamanı qablaşdırma və etiketləmə tələblərinə əməl olunmalıdır
1 Sentyabr 2023 09:33
Xarici ölkələrin təcrübəsinə əsasən, qida məhsullarının çatdırılması zamanı qablaşdırma və etiketləmə tələbləri mütləq yerinə yetirilməlidir.
Belə ki, qablaşdırma məhsulları çirklənmədən, xarici mühitdən və fiziki zədələrdən qoruyur, riskləri minimuma endirir. Sarğılar, qida ilə təmasda olan qablar və plastik torbalar kimi ilkin və ikinci dərəcəli qablaşdırma qida məhsullarını birbaşa qoruyur. Üçüncü dərəcəli və ya xarici qablaşdırma isə çatdırılma çantaları və ya soyuducular, yüksək temperatur, günəş şüası, yağış, qar, tullantılar, heyvanlar və zərərvericilər daxil olmaqla, xarici mühitdən qorunmanı təmin edir. Qida müəssisələri və çatdırılmanı həyata keçirən şəxslər qida qablarının zədələnməsinin qarşısını almaqdan ötrü daşınma üçün qablaşdırılacaq məhsulların miqdarını və düzgün saxlanma şərtlərini müəyyənləşdirməlidirlər. İstehlakçılara çatdırılacaq qidaların paketlərinin və ya konteynerlərinin üzərində isə məhsulların hazırlanma saatı və ən geci 4 saat ərzində istehlak edilməsinə dair məlumat əks olunmalıdır.
Qeyd edək ki, ilkin və ikinci dərəcəli qablaşdırmada istifadə olunan materiallardan qida müəssisələri tərəfindən təkrar istifadə edilməməlidir. Üçüncü dərəcəli qablar isə təkrar istifadə üçün davamlı və asanlıqla təmizlənə bilən materiallardan hazırlanmalıdır.
Oxşar xəbərlər
Mayın 31-i Ümumdünya Tütünlə Mübarizə Günüdür
Tütün istifadəsi insan sağlamlığı üçün ən ciddi risk faktorlarından biridir. Hər il milyonlarla insan tütünlə əlaqəli xəstəliklər səbəbindən həyatını itirir. Ümumdünya Səhiyyə Təşkilatının təşəbbüsü ilə hər il mayın 31-i Ümumdünya Tütünlə Mübarizə Günü kimi qeyd olunur. Bu gün tütünün fəsadlarına diqqət çəkmək və insanları sağlam seçimlərə təşviq etmək üçün mühüm çağırışdır. Bu çərçivədə Agentlik yeniyetmə və gənclər arasında populyarlaşan elektron siqaretlərin (veyp) zərərləri barədə maarifləndirmə fəaliyyətlərini genişləndirib. Veyp mayelərinin tərkibində müxtəlif kimyəvi maddələr, o cümlədən tütündən əldə edilən nikotin və insan orqanizminə təsir edən bir çox zərərli komponentlər var. Nikotinin yüksək dərəcədə asılılıq yaratması ilə yanaşı, ürək-damar, tənəffüs və sinir sisteminə mənfi təsirləri elmi araşdırmalarla təsdiqlənib. Ali təhsil müəssisələrində tələbələrlə keçirilən görüşlərdə ənənəvi siqaretlərə alternativ kimi təqdim olunan veyplərin sağlamlıq üçün yaratdığı təhdidlər izah olunub. Eyni zamanda “Bakı Metropoliteni” stansiyalarında elektron siqaretlərin (veyplərin) zərərləri ilə bağlı sosial reklamlar yerləşdirilib. Həmçinin veyplərin zərərləri barədə sosial şəbəkə hesablarında mütəmadi olaraq maarifləndirici videolar paylaşılır.
Quş qripi xəstəliyi ilə bağlı tətbiq edilmiş bəzi məhdudiyyətlər aradan qaldırılıb
Ümumdünya Heyvan Sağlamlığı Təşkilatının (ÜHST) rəsmi məlumatlarına əsasən, İsrail Dövlətinin Cənub bölgəsində və Rumıniyanın Olt inzibati ərazi vahidində qeydə alınmış yüksək patogen quş qripi xəstəliyi aradan qaldırılıb. Belə ki, qeyd olunan ərazilərdə ÜHST-nin “Quruda yaşayan heyvanların sağlamlıq Məcəlləsi”nə əsasən, xəstəliyin ləğv edilməsindən sonra gözləmə müddəti başa çatıb və epizootik sağlamlıq statusu bərpa olunub. Bununla əlaqədar respublika ərazisinin bu yoluxucu xəstəlikdən qorunması məqsədilə Qida Təhlükəsizliyi Agentliyi tərəfindən həmin ərazilərə tətbiq edilmiş məhdudiyyətlər aradan qaldırılıb. Eyni zamanda müvafiq tədbirlərin görülməsi üçün Dövlət Gömrük Komitəsinə müraciət olunub.
İdxal olunan bəzi qida məhsulu partiyalarında uyğunsuzluq aşkarlanıb
Nəzarət tədbirləri çərçivəsində Rusiya və İrandan idxal olunan bəzi qida məhsulu partiyalarında uyğunsuzluq aşkarlanıb. Bununla bağlı müvafiq ölkələrin aidiyyəti qurumlarına bildirişlər ünvanlanıb. Həmçinin faktla bağlı AQTA tərəfindən qanunvericiliyə uyğun zəruri tədbirlər görülüb. Uyğunsuzluqlar əsasən parazit və bakteriya üzrə, eləcə də kükürd dioksidin kütlə payının normadan çox olması ilə bağlı olub. Nöqsanlar aşkarlanan məhsul partiyaları aşağıdakılardır:
