Giriş
İctimai iaşə müəssisələrinin nümayəndələri ilə görüş keçirilib
7 Mart 2025 20:23
Bakıda fəaliyyət göstərən ictimai iaşə müəssisələrinin nümayəndələri Azərbaycan Qida Təhlükəsizliyi İnstitutunun (AQTİ) təklif etdiyi layihə və xidmətlər barədə məlumatlandırılıb. Görüşdə AQTİ-nin İdarə Heyətinin sədri Əli Nəbiyev qida sahəsində fəaliyyət göstərən sahibkarlara dəstək məqsədi ilə onların maarifləndirilməsi, müəssisələrin rəqabət qabiliyyətli olması üçün AQTİ tərəfindən atılan addımlardan danışıb.
Görüş çərçivəsində Azərbaycan Qida Təhlükəsizliyi Agentliyi sədrinin müşaviri Seymur Mövlayev sahibkarlara AQTİ-nin yeni “Rəqəmsal Təlim Platforması” haqqında məlumat verib. Bildirib ki, platforma vasitəsilə qida təhlükəsizliyi sahəsində 4 fərqli istiqamətdə onlayn təlimlər təklif olunacaq. Təlim proqramlarını uğurla bitirən şəxslər onlayn imtahanlarda iştirak edərək elektron sertifikat əldə edə biləcəklər. Sahibkarlar üçün iqtisadi cəhətdən də faydalı və daha rentabelli olan təlim platforması iştirakçılara beynəlxalq sertifikatlı ekspertlərdən təlim almaq üstünlüyü qazandıracaq.
Daha sonra AQTİ-nin sahibkarlara təqdim etdiyi layihə və xidmətlər barədə ətraflı məlumat verilib. Qeyd olunub ki, “Ulduz-reytinq” layihəsi qida sahəsində fəaliyyət göstərən ictimai iaşə obyektlərinin risk göstəriciləri əsasında reytinqini müəyyənləşdirir. Reytinq təsnifatı 3, 4, 5 ulduz olmaqla aparılır. Reytinqin müəyyənləşdirilməsi sahibkarların könüllü müraciəti əsasında həyata keçirilir.
AQTİ-nin təklif etdiyi HACCP sistemi müəssisələrdə qida təhlükəsizliyini beynəlxalq standartlara uyğunlaşdırmaq üçün nəzərdə tutulub. İnstitutun mütəxəssisləri HACCP sisteminin tətbiqi zamanı proseslərin hər birində müəssisələrə dəstək göstərərək onların istehlakçılara keyfiyyətli və təhlükəsiz qida məhsulları təqdim etməsinə şərait yaradır.
Təqdimatlardan sonra ictimai iaşə müəssisələrinin nümayəndələrini maraqlandıran suallar cavablandırılıb.
Oxşar xəbərlər
AQTA sədri Şəmkirdə istixana təsərrüfatlarında olub
Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzli Şəmkir rayonunda fəaliyyət göstərən “Shamkir Greenhouse” MMC və “AM Brothers Agro” MMC-nin istixana təsərrüfatlarında olub.
Ölkədə fəaliyyətinə icazə verilən heyvan bazarlarının sayı 22-ə çatdı - VİDEO
Qazax və Gədəbəy rayonlarında yerləşən heyvan bazarlarının biotəhlükəsizlik, həmçinin müasir standartlara uyğun yenidənqurma və abadlaşdırma işlərindən sonra fəaliyyətinə icazə verilib. Belə ki, bazarların giriş-çıxış qapısında dezbaryerlər quraşdırılıb, baytarlıq nəzarəti zamanı xəstəlik əlamətləri aşkar edilən heyvanların digər heyvanlardan təcrid olunaraq saxlanılması məqsədilə xüsusi izolyatorlar tikilib.
Ölkənin 33 rayon və şəhərində müasir heyvan kəsimi məntəqələri qurulmalıdır - VİDEO
Ət və ət məhsullarının təhlükəsizliyinin təmin edilməsi baxımından heyvanların kəsiminin müvafiq baytarlıq-sanitariya və sanitariya-gigiyena tələblərinə cavab verən ixtisaslaşdırılmış kəsim məntəqələrində həyata keçirilməsi mühüm əhəmiyyət daşıyır. Azərbaycan Respublikasının Qida Təhlükəsizliyi Agentliyi (AQTA) tərəfindən aparılan monitorinqlər göstərir ki, hazırda ölkənin 33 rayon və şəhərində heyvan kəsimi məntəqəsi ya mövcud deyil, ya da fəaliyyət göstərmir. Əhalinin sıx məskunlaşdığı bu bölgələrdə heyvan kəsimi məntəqələrinin mövcud olmaması heyvanların kəsiminin əksər hallarda küçələrdə, yol kənarlarında həyata keçirilməsinə şərait yaradır. Bu da öz növbəsində kəsim prosesinin, eləcə də əldə olunan ət və ət məhsullarının təhlükəsizliyinə nəzarətin təmin edilməsində birbaşa çətinliklər yaradır.
