Giriş
AQTA: İstehlakçıların seçiminə təsir edən yanlış reklam və etiketləmə halları aşkar edilib
4 Avqust 2026 18:02
Azərbaycan Respublikasının Qida Təhlükəsizliyi Agentliyi (AQTA) tərəfindən sərinləşdirici içkilər bazarında aparılmış monitorinqlər və təhlillər nəticəsində müəyyən edilib ki, bəzi sərinləşdirici içkilərin etiketlənməsi, qablaşdırılması və reklamında istifadə olunan vizual və mətn elementləri istehlakçılarda bu məhsulların energetik içki olması barədə yanlış təsəvvür formalaşdırır.
Bu cür məhsulların təqdimatında aqressiya, güc, dominantlıq, yüksək fiziki performans, sürət və üstünlük kimi anlayışları ifadə edən təsvirlərdən, simvollardan, heyvan obrazlarından, adlardan və digər dizayn elementlərindən istifadə edilir. Eyni zamanda, reklam materiallarında idmançıların və yüksək fiziki aktivliyə malik şəxslərin yer alması istehlakçılarda məhsulun energetik və ya idman içkisi olduğu barədə yanlış təəssürat yarada bilər.
Monitorinqlər zamanı bəzi sərinləşdirici içkilərin qablaşdırılmasında energetik içkilər üçün nəzərdə tutulmuş xəbərdarlıq və məhdudiyyətlərin də əks olunduğu müəyyən edilib. Belə ki, məhsulların üzərində “18 yaşdan aşağı şəxslərə satışı qadağandır”, “Alkoqollu içkilərlə birlikdə və ya qarışdırılaraq istifadə edilməməlidir”, “Hamilə və süd verən qadınlara, eləcə də müəyyən xəstəlikləri olan şəxslərə istifadəsi tövsiyə edilmir”, “Gündəlik 500 ml-dən çox istifadə olunması tövsiyə edilmir” kimi ifadələrə rast gəlinir. Halbuki bu xəbərdarlıqlar yalnız energetik içkilər üçün müəyyən edilmiş xüsusi tələblərdir və onların adi sərinləşdirici içkilərin üzərində istifadə olunması istehlakçıların çaşdırılmasına səbəb ola bilər.
AQTA istehsalçıların, idxalçıların və reklam subyektlərinin diqqətinə çatdırır ki, məhsulların etiketlənməsi, qablaşdırılması və reklamında istehlakçıları çaşdıran, məhsulun faktiki xüsusiyyətləri barədə yanlış təsəvvür yaradan vizual və mətn elementlərindən istifadə edilməməlidir.
İstehlakçılara tövsiyə olunur ki, məhsul alarkən etiket məlumatlarını diqqətlə oxusunlar. Məhsulun energetik içki olub-olmadığını müəyyən etmək üçün etiket üzərində "Energetik içki" qeydinin mövcudluğuna diqqət yetirilməsi vacibdir.
Oxşar xəbərlər
Toyuq kəsimi sexinin qanundankənar fəaliyyət göstərdiyi aşkarlanıb
Azərbaycan Respublikası Qida Təhlükəsizliyi Agentliyinin əməkdaşları Lənkəran rayonu, Girdəni kəndində yerləşən, Hüseynova Ruhəngiz Davud qızına məxsus toyuq kəsimi sexində plandankənar yoxlama keçirib. Obyektdə qida təhlükəsizliyi sahəsində normativ hüquqi aktların tələblərinə əməl olunmadığı aşkarlanıb. Baxış zamanı sexin qida təhlükəsizliyi qeydiyyatından keçmədən qanunsuz fəaliyyət göstərdiyi məlum olub. Həmçinin diri quşların müşayiətedici sənədlərinin olmadığı, antisanitar şəraitdə, baytarlıq-sanitariya nəzarətindən keçmədən kəsiminin aparıldığı, məhsulların etiketlənmədiyi və digər normativ tələblərin pozulduğu müəyyən edilib. Faktla bağlı inzibati protokol tərtib edilib, sexin fəaliyyəti məhdudlaşdırılıb və nümunələr götürülərək laborator müayinələrə cəlb edilib.
Qanunsuz toyuq əti emalı müəssisəsində plandankənar yoxlama keçirilib
Azərbaycan Respublikası Qida Təhlükəsizliyi Agentliyinin “1003 - Çağrı Mərkəzi”nə daxil olan vətəndaş müraciəti və sosial mediada paylaşılan məlumat əsasında Abşeron rayonu, Fatmayı kəndində fəaliyyət göstərən, fiziki şəxs Orucov Abbas Tahir oğluna məxsus obyektdə yoxlama keçirilib. Baxış zamanı müəssisənin qanunsuz fəaliyyət göstərdiyi, eləcə də sanitar-gigiyenik və sanitar-texniki qaydaların tələblərinin pozulduğu müəyyən edilib. Müəssisədə toyuq məhsullarının müşayiətedici sənədlərinin və etiketlərin mövcud olmadığı və digər nöqsanlar aşkarlanıb. Müəssisənin fəaliyyəti nöqsanlar aradan qaldırılanadək məhdudlaşdırılıb. Fakt əsasında qanunvericiliyin tələbinə uyğun müvafiq tədbirlər görülməkdədir.
Siyəzəndə ərzaq bazarında yoxlama keçirilib
Azərbaycan Respublikası Qida Təhlükəsizliyi Agentliyinin əməkdaşları Siyəzən şəhəri, Xətai küçəsi 56 ünvanında fəaliyyət göstərən, “Xətai” Ticarət Mərkəzinə məxsus ərzaq bazarında plandankənar yoxlama keçirib. Yoxlama zamanı bazarda qida təhlükəsizliyi sahəsində texniki normativ hüquqi aktların tələblərinin pozulduğu aşkarlanıb. Aşkar edilmiş nöqsanların aradan qaldırılması ilə bağlı icrası məcburi göstərişlər verilib, sahibkar barəsində inzibati protokol tərtib edilib.
