Giriş
AQTA sədri Qoşqar Təhməzli Avropa İttifaqının ölkəmizdəki səfiri Peter Mixalko ilə görüşüb
7 İyun 2022 15:45
Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzli Avropa İttifaqının (Aİ) ölkəmizdəki nümayəndəliyinin rəhbəri, səfir Peter Mixalko ilə görüşüb.
Görüşdə Azərbaycan ilə Avropa İttifaqının önəmli tərəfdaş olduğunu vurğulayan AQTA sədri ikitərəfli münasibətlərin bütün istiqamətlər, o cümlədən qida təhlükəsizliyi sahəsində səmərəli və uğurlu əməkdaşlıq müstəvisində inkişaf etdiyini bildirib. Avropa İttifaqı ilə birgə həyata keçirilən layihələrdən söz açan Q.Təhməzli qeyd edib ki, bitki mənşəli qida və yemlər üzrə sanitar və fitosanitar qanunvericiliyin hazırlanması, eləcə də həyata keçirilməsində əməkdaşlıq davam etdirilir və bu əməkdaşlıq çərçivəsində “Azərbaycanda sanitar və fitosanitar tədbirlərin gücləndirilməsi” adlı tvinninq layihəsi icra edilməkdədir. Sədr, həmçinin “Fitosanitar nəzarət tədbirlərinin gücləndirilməsi” və “Balıq xəstəliklərinin qarşısının alınması və sağlam balıqyetişdirmə üsullarının öyrənilməsi” adlı TAİEX layihələrinin hazırlanaraq təqdim edildiyini, Avropa İttifaqı tərəfindən həmin layihələr üzrə əməkdaşlığın həyata keçirilməsinin məqbul hesab edildiyini diqqətə çatdırıb. İttifaqa üzv ölkələr ilə qida təhlükəsizliyi, heyvan sağlamlığı, fitosanitar, eləcə də bitki karantini və bitki mühafizəsi sahəsində imzalanmış sənəd layihələrini də nəzərə çatdıran AQTA sədri bir sıra qida məhsullarının Aİ ölkələrinə ixracı üçün monitorinq planlarının hazırlanmasına zərurət olduğunu və bu istiqamətdə Agentlik tərəfindən işlərin davam etdirildiyini bildirib. Həmçinin qonağın diqqətinə çatdırılıb ki, uzun müddət Ermənistan tərəfindən Azərbaycanın işğal altında saxlanılmış ərazilərində şərab və digər məhsullar istehsal edilərək, mənşə ölkəsi Ermənistan göstərilməklə saxtalaşdırmaya yol verilib və həmin məhsulların Aİ ölkələrinə ixracı həyata keçirilib, eyni zamanda bu kimi halların qarşısının alınması ilə bağlı Agentlik tərəfindən davamlı tədbirlər həyata keçirilir.
Peter Mixalko da Avropa İttifaqının Azərbaycanla əlaqələrindən söz açaraq, bu münasibətlərin Aİ-Azərbaycan Tərəfdaşlıq və Əməkdaşlıq Sazişinə əsaslandığını, əməkdaşlığın hazırkı səviyyəsinin məmnunluq doğurduğunu ifadə edib. Aİ və Azərbaycan arasında bir sıra istiqamətlər, o cümlədən qida təhlükəsizliyi sahəsində qarşılıqlı faydalı əməkdaşlığın mövcud olduğunu deyən səfir gələcək əməkdaşlıq imkanlarının günişləndirilməsi üçün bütün sahələr üzrə böyük potensialın olduğunu nəzərə çatdırıb. Azərbaycan ərazilərində qanunsuz olaraq, “Made in Armenia” adı altında şərab və digər məhsulların istehsalı, Aİ ölkələrinə satışı və ixracı ilə bağlı məsələyə də toxunan Peter Mixalko bu istiqamətdə Agentlik tərəfindən həyata keçirilən davamlı fəaliyyəti yüksək dəyərləndirib, eyni zamanda bu kimi neqativ halların qarşısının alınmasında Azərbaycana dəstək göstəriləcəyini vurğulayıb.
Görüşdə qarşılıqlı maraq kəsb edən mövzular, o cümlədən bitkiçilik məhsullarının Avropa ölkələrinə ixracının genişləndirilməsi, qabaqcıl təcrübənin öyrənilməsinə dair təlimlərin keçirilməsi və s. məsələlər ətrafında fikir mübadiləsi aparılıb.
Oxşar xəbərlər
Lənkəranda normativ tələblərin pozulduğu ət satışı məntəqəsinin fəaliyyəti məhdudlaşdırılıb
Daxil olan müraciət əsasında Lənkəran şəhəri, Koroğlu küçəsi, Böyük bazar ərazisində fəaliyyət göstərən, fiziki şəxs Həsənov Allahşükür Atəş oğluna məxsus ət satışı məntəqəsində Qida Təhlükəsizliyi Agentliyinin əməkdaşları tərəfindən keçirilmiş plandankənar yoxlama zamanı qida təhlükəsizliyi sahəsində texniki normativ hüquqi aktların tələblərinin pozulduğu aşkarlanıb. Belə ki, məntəqədə sanitar-gigiyenik tələblərə əməl edilmədiyi, ətlərin üzərində baytarlıq nəzarətindən keçirildiyinə dair möhürün olmadığı, əlyuma çanağının, havalandırma sisteminin, eləcə də ət məhsullarının saxlanması üçün soyuducu və dondurucuların mövcud olmadığı, işçi heyətin tibbi müayinədən keçmədiyi və fərdi qoruyucu vasitələrdən istifadə etmədiyi, dezinfeksiya işlərinin aparılmadığı müəyyən edilib.
Qanunsuz fəaliyyət göstərən dönərxanada bir sıra nöqsanlar aşkarlanıb
Ağdam rayonu, Quzanlı qəsəbəsində fəaliyyət göstərən, fiziki şəxs Əliyev İbrahim Şirin oğluna məxsus dönərxanada Qida Təhlükəsizliyi Agentliyinin əməkdaşları tərəfindən plandankənar yoxlama keçirilib. Baxış zamanı dönərxanada qida məhsulları üzrə gigiyena qaydalarına və qida təhlükəsizliyi tələblərinə əməl edilmədiyi, sanitar-texniki və sanitar-gigiyenik vəziyyətin qüvvədə olan normativlərə cavab vermədiyi müəyyən edilib. Belə ki, iaşə obyektinin qida təhlükəsizliyi qeydiyyatından keçmədən fəaliyyət göstərdiyi məlum olub, həmçinin obyektdə xammal olaraq istifadə edilən məhsulların (xiyar, pomidor, mayonez) açıq şəkildə saxlandığı, çarpaz çirklənmənin qarşısının alınması məqsədilə texnoloji prosesin ardıcıllığına riayət edilmədiyi, əlyuma çanaqlarının isti su və gigiyenik tələblərə cavab verən qurutma vasitələri ilə təmin edilmədiyi, havalandırma sisteminin quraşdırılmadığı, çirklənməyə qarşı müdafiə və zərərvericilərlə mübarizə üçün müvafiq şəraitin olmadığı, döşəmə, divar səthlərinin təmirsiz olduğu və dezinfeksiyaedici vasitələrin təsirinə davamlı materialla üzlənmədiyi, mütəmadi olaraq müvafiq təmizlik işlərinin aparılmadığı, tullantıların ağzı kip bağlanan və qoxu yaymayan qablara toplanmadığı və digər nöqsanlar aşkarlanıb.
Qida təhlükəsizliyi tələblərinin pozulduğu iki dönərxananın fəaliyyəti məhdudlaşdırılıb
Ağcabədi rayonunun N.Nərimanov küçəsində yerləşən, fiziki şəxs Alıyev Xəyyam Mirzəli oğluna məxsus “01” dönərxanasında və Xocavənd kəndində yerləşən, fiziki şəxs Hüseynov Elmir Əmirxan oğluna məxsus “Dostluq” dönərxanasında Qida Təhlükəsizliyi Agentliyinin əməkdaşları tərəfindən plandankənar yoxlama keçirilib. Baxış zamanı dönərxanalarda qida məhsulları üzrə gigiyena qaydalarına və qida təhlükəsizliyi tələblərinə əməl edilmədiyi, sanitar-texniki və sanitar-gigiyenik vəziyyətin qüvvədə olan normativlərə cavab vermədiyi müəyyən olunub. Belə ki, iaşə obyektlərində çarpaz çirklənmənin qarşısının alınması məqsədilə texnoloji prosesin ardıcıllığına əməl olunmadığı, qabaqcıl gigiyena təcrübəsinin, o cümlədən çirklənməyə qarşı müdafiə və zərərvericilərlə mübarizə üçün müvafiq şəraitin təmin edilmədiyi, döşəmə, divar səthlərinin təmirsiz olduğu və dezinfeksiyaedici vasitələrin təsirinə davamlı materialla üzlənmədiyi, mütəmadi olaraq müvafiq təmizlik işlərinin görülmədiyi, tullantıların ağzı kip bağlanan və qoxu yaymayan qablara toplanmadığı, işçi heyətin gigiyenik təlimlərə cəlb edilmədiyi və digər nöqsanlar aşkarlanıb.
