Giriş
AQTA sədri yerli şərab istehsalçıları və ixracatçıları ilə görüşüb
21 Aprel 2022 14:48
Azərbaycan Respublikasının Qida Təhlükəsizliyi Agentliyində (AQTA) yerli şərab istehsalçıları və ixracatçıları ilə onlayn formatda görüş keçirilib.
Görüşdə AQTA sədri Qoşqar Təhməzli ölkədə şərab istehsalı və ixracatı sahəsində görülən işlər, iqtisadiyyatın diversifikasiyası, o cümlədən qeyri-neft sektorunun inkişafında xüsusi yer tutan bu istiqamətə verilən dövlət dəstəyi və bununla bağlı həyata keçirilən tədbirlər - özəl sektorun gücləndirilməsi, rəqabətədavamlı qeyri-neft məhsullarının istehsalı, ixracatçılara yaradılmış əlverişli şərait barədə iştirakçılara məlumat verib. Həmçinin daxili istehlak bazarının tələbatının ödənilməsi ilə yanaşı, şərab istehsalı sahəsində ixrac imkanları və potensialının artırılması, müəssisələrin fəaliyyətinin müasir texnologiyalar əsasında qurularaq daha da genişləndirilməsinin vacibliyi bildirilib. Təhlükəsizlik və keyfiyyət göstəriciləri üzrə müayinələrin aparılması üçün Azərbaycan Qida Təhlükəsizliyi İnstitutunun laboratoriyalarının ən müasir cihaz və avadanlıqlarla təchiz edildiyini diqqətə çatdıran Agentlik sədri şərab məhsullarının fiziki-kimyəvi və toksikoloji sınaqları, məhsulun keyfiyyətinə və təhlükəsizliyinə təsir edən amillər, orqanoleptik müayinə parametrlərinin düzgün şəkildə müəyyən edilməsinin vacibliyini vurğulayıb.
Daha sonra Azərbaycan Şərab İstehsalçıları və İxracatçıları Assosiasiyasının nümayəndələri görülən işlər və bu sahənin inkişafına verdiyi dəstək üçün AQTA-ya təşəkkürlərini ifadə ediblər.
Görüşdə sahibkarları maraqlandıran məsələlər dinlənilib, milli şərab istehsalı sahəsinin inkişafına mane olan səbəblərin tamamilə aradan qaldırılması, o cümlədən, qanunsuz olaraq gizli sexlərdə saxta içki istehsalı istiqamətində görülən tədbirlərin davam etdirilməsinin əhəmiyyəti önə çəkilib.
Qarşılıqlı maraq doğuran məsələlər ətrafında müzakirələrlə davam etdirilən görüşdə verilən təklif və rəylərin nəzərə alınacağı bildirilib.
Oxşar xəbərlər
Uşaq bağçasında nöqsanlar aşkarlanıb
Binəqədi rayonu, Müşfiqabad qəsəbəsi, Günəşli küçəsində yerləşən 329 nömrəli uşaq bağçasında Azərbaycan Respublikası Qida Təhlükəsizliyi Agentliyinin əməkdaşları tərəfindən keçirilən plandankənar yoxlama zamanı qida təhlükəsizliyi sahəsində texniki normativ hüquqi aktların, sanitariya norma və qaydalarının tələblərinin pozulduğu müəyyən edilib. Yoxlama zamanı müəssisənin qida təhlükəsizliyi qeydiyyatına alınmadan fəaliyyət göstərdiyi, sanitariya norma və qaydalarının tələblərinin pozulduğu müəyyən edilib. Aşkar edilmiş nöqsanlarla bağlı müəssisənin rəhbərliyi barəsində inzibati xəta haqqında protokol tərtib olunub. Mətbəxdə istehlaka hazır qida məhsullarından nümunələr götürülərək laborator müayinələrə göndərilib.
Toyuq kəsimi sexinin qanundankənar fəaliyyət göstərdiyi aşkarlanıb
Azərbaycan Respublikası Qida Təhlükəsizliyi Agentliyinin əməkdaşları Lənkəran rayonu, Girdəni kəndində yerləşən, Hüseynova Ruhəngiz Davud qızına məxsus toyuq kəsimi sexində plandankənar yoxlama keçirib. Obyektdə qida təhlükəsizliyi sahəsində normativ hüquqi aktların tələblərinə əməl olunmadığı aşkarlanıb. Baxış zamanı sexin qida təhlükəsizliyi qeydiyyatından keçmədən qanunsuz fəaliyyət göstərdiyi məlum olub. Həmçinin diri quşların müşayiətedici sənədlərinin olmadığı, antisanitar şəraitdə, baytarlıq-sanitariya nəzarətindən keçmədən kəsiminin aparıldığı, məhsulların etiketlənmədiyi və digər normativ tələblərin pozulduğu müəyyən edilib. Faktla bağlı inzibati protokol tərtib edilib, sexin fəaliyyəti məhdudlaşdırılıb və nümunələr götürülərək laborator müayinələrə cəlb edilib.
Qanunsuz toyuq əti emalı müəssisəsində plandankənar yoxlama keçirilib
Azərbaycan Respublikası Qida Təhlükəsizliyi Agentliyinin “1003 - Çağrı Mərkəzi”nə daxil olan vətəndaş müraciəti və sosial mediada paylaşılan məlumat əsasında Abşeron rayonu, Fatmayı kəndində fəaliyyət göstərən, fiziki şəxs Orucov Abbas Tahir oğluna məxsus obyektdə yoxlama keçirilib. Baxış zamanı müəssisənin qanunsuz fəaliyyət göstərdiyi, eləcə də sanitar-gigiyenik və sanitar-texniki qaydaların tələblərinin pozulduğu müəyyən edilib. Müəssisədə toyuq məhsullarının müşayiətedici sənədlərinin və etiketlərin mövcud olmadığı və digər nöqsanlar aşkarlanıb. Müəssisənin fəaliyyəti nöqsanlar aradan qaldırılanadək məhdudlaşdırılıb. Fakt əsasında qanunvericiliyin tələbinə uyğun müvafiq tədbirlər görülməkdədir.
