Giriş
“Azərbaycan Respublikasının Qida Təhlükəsizliyi Agentliyi və Macarıstanın Kənd Təsərrüfatı Nazirliyi arasında qida təhlükəsizliyi və heyvan sağlamlığı sahəsində əməkdaşlıq haqqında Anlaşma Memorandumu” imzalanıb
3 Fevral 2022 16:51
Fevralın 3-də Azərbaycan Respublikası Hökuməti və Macarıstan Hökuməti arasında keçirilən iqtisadi əməkdaşlıq üzrə birgə Komissiyanın 8-ci iclası çərçivəsində ikitərəfli əməkdaşlığa dair sənədlər imzalanıb.
İki ölkənin nümayəndə heyətlərinin iştirakı ilə keçirilən iclasda Azərbaycanla Macarıstan arasında əlaqələrin ildən-ilə inkişaf etdiyi və dövlət başçıları tərəfindən qəbul edilmiş “Azərbaycan Respublikası ilə Macarıstan arasında strateji tərəfdaşlıq haqqında Birgə Bəyannamə”nin əməkdaşlığın dərinləşməsində xüsusi rolu vurğulanıb. Tədbirdə Azərbaycan və Macarıstan Hökumətləri arasında iqtisadi əməkdaşlıq üzrə birgə Komissiyanın fəaliyyətinin əməkdaşlıq əlaqələrinin genişlənməsində əhəmiyyəti qeyd edilib.
Daha sonra ikitərəfli əməkdaşlığa dair bir sıra sənədlər imzalanıb. Azərbaycan Respublikası Qida Təhlükəsizliyi Agentliyinin sədri Qoşqar Təhməzli və Macarıstanın xarici işlər və ticarət naziri Peter Siyarto tərəfindən “Azərbaycan Respublikasının Qida Təhlükəsizliyi Agentliyi ilə Macarıstanın Kənd Təsərrüfatı Nazirliyi arasında qida təhlükəsizliyi və heyvan sağlamlığı sahəsində əməkdaşlıq haqqında Anlaşma Memorandumu” imzalanıb.
Qida təhlükəsizliyi sahəsində imzalanmış memorandum çərçivəsində qida zəncirinin bütün mərhələlərində qida təhlükəsizliyi və heyvan sağlamlığının təmin edilməsi, idxal və ixrac olunan məhsullara verilən sertifikatların qarşılıqlı tanınması, elektron informasiya mübadiləsinin genişləndirilməsi, heyvan sağlamlığı üzrə monitorinq və hesabat sisteminin Ümumdünya Heyvan Sağlamlığı Təşkilatının tövsiyələrinə uyğun təkmilləşdirilməsi, risk əsaslı planlaşdırma və nəzarət sistemləri, risk qiymətləndirilməsi metodlarının tətbiqi kimi müxtəlif sahələrdə tərəflər arasında əməkdaşlıq genişlənəcəkdir. Memorandumda, həmçinin baytarlıq nəzarətində olan yüklərin təhlükəsizliyi və qida məhsullarının insan istehlakı üçün yararlılığına dair müvafiq sertifikatların verilməsi, zoonoz xəstəliklərin laborator diaqnostikası və risk təhlili üzrə təcrübələrin təşviqi, hər iki tərəf üçün maraqlı olan birgə tədqiqat layihələrinin həyata keçirilməsi öz əksini tapıb.
Azərbaycan Respublikası və Macarıstan arasında qida təhlükəsizliyi sahəsində əməkdaşlığın genişləndirilməsi iki ölkə arasında idxal-ixrac prosedurlarının sadələşdirilməsinə, qida və kənd təsərrüfatı məhsulları üzrə ticarət dövriyyəsinin atırılmasına mühüm töhfə verəcəkdir.
Oxşar xəbərlər
İctimai iaşə müəssisələrində aşkar edilmiş nöqsanlar aradan qaldırılıb
Azərbaycan Respublikası Qida Təhlükəsizliyi Agentliyinin apardığı plandankənar yoxlamalar zamanı Bakı şəhərində fəaliyyət göstərən bir sıra ictimai iaşə və qida məhsullarının satışı ilə məşğul olan müəssisələrdə aşkarlanmış nöqsanların aradan qaldırılması istiqamətində müvafiq sağlamlaşdırma tədbirləri həyata keçirilib. Belə ki, Xətai, Yasamal və Suraxanı rayonlarında fəaliyyət göstərən 3 müəssisədə keçirilmiş yoxlamalar zamanı müəyyən edilmiş nöqsanlar müəssisə sahibləri tərəfindən aradan qaldırılıb. Görülmüş tədbirlər nəticəsində ictimai iaşə müəssisələrində aşkar edilmiş uyğunsuzluqlar aradan qaldırılıb və fəaliyyətin davam etdirilməsinə şərait yaradılıb. Sağlamlaşdırma tədbirləri həyata keçirilən müəssisələr aşağıdakılardır: 1. Fiziki şəxs Rəhimov Fərid Mübariz oğluna məxsus Bakı şəhəri, Nəsimi rayonu, Mir Cəlal 4 mkr, ev 18A ünvanında yerləşən “Köhnə ciyərxana” kafesi; 2. Fiziki şəxs Zamanov Nəsimi Səməd oğluna məxsus Bakı şəhəri, Nəsimi rayonu, Mir Cəlal küçəsi, 18/3 (93 saylı mağaza) ünvanında yerləşən “Köhnə ciyərxana” kafesi; 3.Fiziki şəxs Bayramov Emin Varımcan oğluna məxsus Bakı şəhəri, Xəzər rayonu, Şüvəlan qəsəbəsi, A.İldırım küçəsi, 37C ünvanında yerləşən “Halva” kafesi;
Masallıda qanunsuz toyuq kəsimi sexləri aşkarlandı – Fəaliyyətləri məhdudlaşdırıldı
Azərbaycan Respublikası Qida Təhlükəsizliyi Agentliyinin əməkdaşları Masallı rayonu, İsgəndərli qəsəbəsində Rəsulov Taleh Seyran oğluna məxsus toyuq kəsimi sexində, Digah kəndində isə Paşayev Füzuli İbrahim oğluna məxsus toyuq kəsimi sahəsində yoxlama keçirib. Yoxlama zamanı hər iki qida obyektində quşların müvafiq müşayiətedici sənədlərinin olmaması, sanitar-gigiyenik və sanitar-texniki tələblərin pozulması və digər nöqsanlar aşkarlanıb. Hər iki sahibkar barəsində inzibati protokol tərtib edilib, məhdudlaşdırıcı tədbirlərin tətbiqi barədə qərar qəbul olunub, toyuq məhsullarından nümunələr götürülərək laborator müayinələrə cəlb edilib. Araşdırmalar davam etdirilir.
Nəzarət tədbirləri - İcmal
AQTA tərəfindən keçirilən plandankənar yoxlamalar zamanı Bakı şəhərində, Bərdə və Masallı rayonlarında fəaliyyət göstərən qida obyektlərində sanitariya-gigiyena tələblərinin pozulması və digər nöqsanlar müəyyən edilib. Aşkarlanmış pozuntularla bağlı obyektlərin fəaliyyətinin məhdudlaşdırılması istiqamətində tədbirlər görülüb.
