Giriş
“Dayanıqlı və yüksək səviyyədə təşkil olunmuş Milli Kodeks Sisteminin yaradılması üçün Azərbaycan Respublikasına dəstək” layihəsi çərçivəsində növbəti görüş keçirilib
14 İyul 2021 17:55
Kodeks Alimentarius Milli Komissiyasının Azərbaycan Respublikası Qida Təhlükəsizliyi Agentliyi tərəfindən irəli sürülən “Dayanıqlı və yüksək səviyyədə təşkil olunmuş Milli Kodeks Sisteminin yaradılması üçün Azərbaycan Respublikasına dəstək” (Kodeks Etimad Fondu 2A (GCP/GLO/893/MUL) layihəsi çərçivəsində növbəti görüşü keçirilib.
Videokonfrans formatında keçirilən görüşdə Azərbaycan Respublikasının Qida Təhlükəsizliyi Agentliyinin, Türkiyə Respublikasının Kənd Təsərrüfatı və Meşəçilik Nazirliyinin Qida Nəzarəti Departamenti nəzdində olan Türkiyə Milli Kodeks Komitəsinin, FAO-nun Azərbaycandakı Tərəfdaşlıq və Əlaqələndirmə Ofisinin nümayəndələri iştirakı edib.
Görüş zamanı layihə haqqında qısa məlumat verilib. Daha sonra Türkiyə ilə müvafiq sahədə həyata keçirilməsi nəzərdə tutulan fəaliyyətlər və növbəti atılacaq addımlar müzakirə olunub.
Bildirilib ki, milli alt komitələrin yaradılması, Kodeks mətnlərindən milli səviyyədə istifadə edilməsi üzrə Türkiyə təcrübəsinin bölüşülməsi, Azərbaycan Milli Kodeks komandasına birbaşa məsləhət verilməsi, müvafiq istiqamətlər üzrə online və ya fiziki formatda təlimlərin keçirilməsi, eləcə də təcrübə mübadiləsi aparmaq üçün qarşılıqlı təlim səfərlərinin təşkili istiqamətində tədbirlərin həyata keçirilməsi gələcək əməkdaşlığın əsas istiqamətlərindəndir.
Qeyd edək ki, Kodeks Alimentarius Komissiyası BMT-nin Ərzaq və Kənd Təsərrüfatı Təşkilatı və Ümumdünya Səhiyyə Təşkilatı tərəfindən “Birgə Qida Standartları Proqramı” çərçivəsində təsis edilmiş, 189 (188 üzv ölkə və bir təşkilat – Avropa İttifaqı) üzvü olan hökumətlərarası orqandır. Azərbaycan Respublikası 2011-ci ildən bu Komissiyanın üzvüdür. Azərbaycan Respublikası Prezidentinin müvafiq Fərmanı ilə Azərbaycan Respublikasının Qida Təhlükəsizliyi Agentliyi Kodeks Alimentarius Komissiyasında Azərbaycan Respublikasının milli əlaqələndirici qurumu təyin edilib.
Oxşar xəbərlər
“Keşlə” bazarında istehlaka yararsız balıq məhsulları aşkarlanıb
Qida Təhlükəsizliyi Agentliyinin əməkdaşları Bakı şəhəri, Nərimanov rayonu, Ə.Qayıbov küçəsi, ev 24M ünvanında fəaliyyət göstərən “Eurohome” bazarında yerləşən “Keşlə” bazarında yoxlama keçirib. Baxış zamanı balıq məhsullarının emalı sahəsinin qida təhlükəsizliyi qeydiyyatından keçmədən fəaliyyət göstərdiyi, sanitar-texniki və sanitar-gigiyenik vəziyyətin qənaətbəxş olmadığı, temperatur rejiminə əməl edilmədən balıq məhsullarının soyuducudan kənarda saxlanılaraq satışa çıxarıldığı müəyyən edilib. Eyni zamanda çəlləklərdə duzlaşdırılaraq antisanitar şəraitdə emal olunan kəskin qoxulu, həşəratlarla sirayətlənmiş ümumi çəkisi 740 kq istehlaka yararsız balıq məhsulu aşkarlanıb. Faktla bağlı istehlaka yararsız balıq məhsullarının satışının qadağan edilməsi və məhv olunmasına dair məhdudlaşdırıcı tədbirlərin tətbiqi barədə qərar qəbul edilib, nöqsanlar aradan qaldırılanadək balıq məhsullarının emalı sahəsinin fəaliyyəti dayandırılıb, inzibati protokol tərtib olunub və icrası məcburi göstərişlər verilib.
Bazar rəhbərləri ilə görüş keçirilib
Qida Təhlükəsizliyi Agentliyinin nümayəndələri Quş Əti, Yumurta İstehsalçıları və İxracatçıları Assosiasiyası və Süd və Süd Məhsulları İstehsalçıları və İxracatçıları Assosiasiyası ilə birgə kənd təsərrüfatı və ərzaq məhsullarının satışı bazarlarının rəhbərləri ilə görüş keçirib. Onlayn formatda keçirilən görüşdə sahibkarlar bazarlarda satışa çıxarılan heyvandarlıq məhsullarına baytarlıq nəzarətinin təmin edilməsinə dair təlimat barədə məlumatlandırılıb. Eyni zamanda heyvan mənşəli məhsulların etiketlənməsi və qablaşdırılması ilə bağlı tələblər görüş iştirakçılarının diqqətinə çatdırılıb. Sonda sahibkarları maraqlandıran suallar cavablandırılıb.
Yasamalda su emalı müəssisəsində nöqsanlar aşkarlanıb
Bakı şəhəri, Yasamal rayonu, Z.Xəlilov küçəsi, 523-cü məhəllə, ev 3 ünvanında fəaliyyət göstərən fiziki şəxs Həsənəliyev Seyfulla Rəvxan oğluna məxsus su emalı müəssisəsində Qida Təhlükəsizliyi Agentliyinin əməkdaşları tərəfindən keçirilmiş yoxlama zamanı normativ hüquqi aktların tələblərinin pozulduğu məlum olub. Belə ki, müəssisədə emal prosesində istifadə olunan filtrlər dəyişdirilmir və ya təmizlənmir, ehtiyat su çəni təmizlənmir. Laborator müayinələrin aparılması məqsədilə götürülmüş su nümunələrində koliform bakteriyaları, ümumi mikroorqanizmlərin sayının normadan çox olduğu aşkarlanıb, həmçinin kalsium, maqnezium, sulfat ionlarının miqdarının, ümumi codluğun, pH göstəricisinin etiket məlumatlarında qeyd olunan miqdarla uyğunluq təşkil etmədiyi müəyyən olunub. Faktla bağlı sahibkar barəsində inzibati protokol tərtib edilib və nöqsanlar aradan qaldırılanadək müəssisənin fəaliyyəti məhdudlaşdırılıb.
