Giriş
“Məktəblilərin qida bələdçiləri” layihəsi çərçivəsində növbəti görüş keçirilib
17 Mart 2022 14:04
Azərbaycan Qida Təhlükəsizliyi İnstitutu (AQTİ) “Məktəblilərin qida bələdçiləri” pilot layihəsi çərçivəsində paytaxtın ümumtəhsil müəssisələrində məktəblilərlə görüşlərə başlayıb. Məktəbdaxili qidalanma ilə bağlı bütün maraqlı tərəfləri birləşdirən layihə AQTİ ilə yanaşı, UNICEF-in dəstəyi və Təhsil Nazirliyinin iştirakı ilə həyata keçirilir.
Layihə çərçivəsində təşkil olunan görüşlərin məqsədi məktəblilər üçün hazırlanmış təbliğat materiallarının ilkin versiyası ilə tanışlıq, şagirdlərin mülahizə, düşüncə və baxışları əsasında tələb və təkliflərin müəyyənləşdirilməsi, aparılan fikir mübadiləsinin nəticəsi olaraq, gələcək nəşrlərdə ümumiləşmiş rəylərin nəzərə alınmasıdır.
Bu istiqamətdə ilk görüş paytaxtın 252 saylı məktəb-liseyində təşkil edilib. Müxtəlif yaş qruplarını təmsil edən məktəblilər UNICEF-in dəstəyi və Təhsil Nazirliyinin iştirakı ilə Azərbaycan Qida Təhlükəsizliyi İnstitutu tərəfindən ilkin versiyada hazırlanmış çap materialları ilə tanış olublar. AQTİ mütəxəssisləri məktəblilərə nəşr materialları, nəşrin məqsədi və əhatə dairəsi haqda ətraflı məlumat veriblər. Bildirilib ki, uşaqlara düzgün qidalanma vərdişlərinin aşılanması və sağlamlığın təşviqini əks etdirən bukletlər qida təhlükəsizliyi, COVID-19-un profilaktikasına dair metodiki göstərişlər, sağlam qidalanmaya dair bilik və bacarıqlar, həmçinin ümumtəhsil müəssisələrində fəaliyyət göstərən bufet və yeməkxanalara nəzarət mexanizmləri mövzularına həsr olunub.
Daha sonra şagirdlər bukletlərdə yer almasını istədikləri məlumatlarla bağlı mülahizələrini bildirib, təkliflərini irəli sürüblər.
Qeyd edək ki, gələcəkdə məktəblilərə paylanması üçün hazırlanan bukletlərin onların rəy və təklifləri əsasında yenidən nəşr olunması nəzərdə tutulur. Bu məqsədlə təhsilalanların fikir və düşüncələrinə xüsusi əhəmiyyət verən AQTİ görüşlərin paytaxtın digər ümumtəhsil müəssisələrində də davam etdirilməsini planlaşdırır. Bukletlərin hazırlanması və məktəblilərin maarifləndirici çap materialları ilə təmin olunması ümumilikdə məktəblərdə göstərilən iaşə xidmətinin günün tələbləri çərçivəsində yenidən qurulması, qidalanmanın optimallaşdırılması yolu ilə təhsil və tərbiyə alanların sağlamlığının qorunması və möhkəmləndirilməsinə töhfə vermək məqsədi daşıyır.
Oxşar xəbərlər
Gəncədə yaşayış evində saxta alkoqollu içkilərin istehsal edildiyi aşkarlanıb
Gizli fəaliyyət göstərən saxta alkoqollu spirtli içki istehsalı ilə bağlı daxil olan məlumat əsasında Qida Təhlükəsizliyi Agentliyinin və yerli polis idarəsinin əməkdaşları Gəncə şəhəri, M.Ə.Sabir küçəsində Fituri Əsmər Mehman qızına məxsus yaşayış evində reyd keçirib. Yoxlama zamanı müxtəlif əmtəə nişanlı şüşə butulkaların yuyulub təmizlənərək, saxta üsullarla alkoqollu içkilərin qablaşdırıldığı müəyyən olunub. 13 ədəd 1 l-lik, 9 ədəd 0.7 l-lik, 4 ədəd 0.5 l-lik “Banketnaya Yubiley”, 19 ədəd 1 l-lik, 7 ədəd 0.7 l-lik, 5 ədəd 0.5 l-lik “Organic Line”, 1 ədəd 1 l-lik, 3 ədəd 0.7 l-lik “Banketnaya”, 1 ədəd 1 l-lik, 1 ədəd 0.5 l-lik “Старый Доктор” əmtəə nişanlı satış məqsədilə qablaşdırılmış saxta alkoqollu içki, həmçinin müxtəlif yerli və xarici brend markalı içkilərə məxsus butulka və qapaqlar, içərisində 25 litr su-spirt qarışığı olan plastik çəllək aşkarlanıb. Faktla bağlı qanunvericiliyə uyğun müvafiq tədbirlər görülüb. Məhsullardan nümunələr götürülərək laborator müayinələrə cəlb edilib. Qanunsuz istehsal olunan alkoqollu içkilərin satış yerlərinin müəyyən edilməsi istiqamətində zəruri tədbirlər həyata keçirilməkdədir. Araşdırmalar davam etdirilir.
Saxta süd məhsullarının sosial media səhifəsində satışa çıxarıldığı müəyyən edilib
Sosial media platformasında satışı həyata keçirilən qaymağın keyfiyyətinin aşağı olması ilə bağlı Qida Təhlükəsizliyi Agentliyinə daxil olan müraciət əsasında Abşeron rayonu, Masazır qəsəbəsi, Ə.Vahid küçəsi, “Salty Park” yaşayış kompleksi, giriş 1, ev 295 ünvanında yoxlama keçirilib. Baxış zamanı fiziki şəxs Nəzərova Könül Sabir qızının istehsalçı müəssisələrdən tərkibində quru süd və süd yağı əvəzedicisi olan müxtəlif növ süd məhsullarını (qaymaq, pendir və s.) alıb etiketini çıxararaq, “təbii süd məhsulu” adı altında, müşayiətedici sənədləri olmadan “TikTok” və “İnstagram” sosial media səhifələrində satışını həyata keçirdiyi aşkarlanıb. Eyni zamanda süd məhsullarının temperatur rejimi gözlənilmədən, soyuducu avadanlıqla təmin edilməyən minik avtomobili vasitəsilə müştərilərə çatdırıldığı müəyyən edilib. Faktla bağlı qanunvericiliyə uyğun zəruri tədbirlər görülüb, qanunsuz fəaliyyətin qarşısı alınıb. Qeyd edək ki, saxta məhsulların satışı istehlakçıların hüquqlarının pozulmasıdır. Saxlama şəraitinə riayət olunmadan məhsulların satışı isə mikrobioloji çirklənməyə səbəb ola bilər ki, bu da insan sağlamlığı üçün təhlükəli hesab olunur. Vətəndaşlar qida təhlükəsizliyi sahəsində istehlakçı hüquqlarının pozulması və qanunazidd hallarla rastlaşdıqda, bu barədə konkret faktlarla Agentliyin “1003-Çağrı Mərkəzi”nə məlumat verə bilərlər. Müraciət daxil olduqdan dərhal sonra araşdırmalara başlanılacaq və qanunvericiliyə uyğun müvafiq tədbirlər görüləcəkdir.
Bərdədə heyvan satışı bazarında ciddi nöqsanlar müəyyən edilib
Bərdə rayonu, Alpoud kəndində fəaliyyət göstərən “Ticarət Mərkəzi” MMC-yə məxsus heyvan satışı bazarında Qida Təhlükəsizliyi Agentliyinin əməkdaşları tərəfindən keçirilmiş yoxlama zamanı aşkarlanan nöqsanların icra vəziyyəti ilə bağlı plandankənar yoxlama aparılıb. Baxış zamanı bazarda satışa çıxarılan müxtəlif çeşiddə ət məhsullarının və unlu qənnadı məmulatlarının temperatur rejiminə əməl edilmədən və birbaşa günəş şüaları altında saxlandığı, əl yuma çanaqlarının mövcud olmadığı, qida məhsulları ilə təmasda olan səthlərin korroziyaya uğradığı və natəmiz olduğu, qida məhsulları üçün ayrıca yuma sahəsinin təşkil edilmədiyi, işçi heyətin gigiyena qaydalarına riayət etmədiyi və xüsusi geyimlə təmin olunmadığı, müvafiq təmizlik işlərinin görülmədiyi aşkarlanıb. Faktla bağlı sahibkar barəsində inzibati protokol tərtib olunub, qeyd edilən məhsullar satışdan kənarlaşdırılıb və icrası məcburi göstərişlər verilib.
