Giriş
Qida subyektlərinin sağlamlaşdırılması işləri davam etdirilir
19 Avqust 2024 17:40
Azərbaycan Respublikasının Qida Təhlükəsizliyi Agentliyi (AQTA) ölkədə qida sahəsində fəaliyyət göstərən sahibkarlıq subyektlərinin fəaliyyətlərinin qanunvericiliyin tələbləri çərçivəsində həyata keçirilməsinə, həmçinin əlverişli və sağlam biznes mühitinin formalaşdırılmasına dəstək məqsədilə tədbirləri davam etdirir.
Bu tədbirlər çərçivəsində Bakı şəhəri, Binəqədi rayonu, Biləcəri qəsəbəsində (Motodrom 156) fəaliyyət göstərən qablaşdırılmış içməli su emalı müəssisəsi də sağlamlaşdırılan obyektlərin sırasına daxil edilib. Belə ki, Agentliyin müfəttişləri tərəfindən həmin müəssisədə daha əvvəl planlı yoxlama həyata keçirilib. Aşkarlanmış nöqsanlarla bağlı qanunvericiliklə müəyyən olunmuş qaydada tədbirlər görülüb. Habelə pozuntuların aradan qaldırılması istiqamətində sahibkarlıq subyektinə dəstək göstərilib, maarifləndirmə işləri aparılıb, məcburi tələblərin pozulmasının qarşısının alınması ilə bağlı peşəkar metodiki tövsiyələr verilib.
Daha sonra sözügedən müəssisəyə qanunvericilikdə nəzərdə tutulmuş qaydada baxış keçirilib. Baxış zamanı pozuntuların tam aradan qaldırıldığı müşahidə edilib. Görülmüş sağlamlaşdırıcı tədbirlər nəticəsində həmin müəssisənin fəaliyyətinin qida təhlükəsizliyi sahəsində texniki normativ hüquqi aktların tələblərinə cavab verdiyi müəyyənləşib. Bununla da içməli su emalı müəssisəsinin fəaliyyəti ilə bağlı qəbul olunan məhdudlaşdırıcı tədbirlərin tətbiqi barədə qərar qüvvədən düşüb.
Qeyd edək ki, AQTA əhalinin sağlamlığının qorunması, təhlükəsiz qida məhsulları ilə təmin olunması və müəssisələrin sağlamlaşdırılması istiqamətində ardıcıl tədbirlərini bundan sonra da davam etdirəcək.
Oxşar xəbərlər
"Fish home" restoranında ciddi nöqsanlar aşkarlanıb
Binəqədi rayonu, Nizami Nərimanov küçəsi 15F ünvanında fəaliyyət göstərən fiziki şəxs Sayılov Məqsud Əzizağa oğluna məxsus “Fish home” restoranında AQTA əməkdaşları tərəfindən keçirilmiş yoxlama zamanı ciddi nöqsanlar aşkarlanıb. Belə ki, iaşə müəssisəsində mənşə sənədləri olmayan qida məhsulları (yağ, balıq və ət məhsulları) aşkarlanıb. Həmçinin qida məhsullarının hazırlanması zamanı çarpaz çirklənmə riskinin yarandığı, qida məhsullarının döşəmə və divardan ara məsafəsi gözlənilmədən saxlandığı, mətbəx sahəsində yerləşdirilmiş soyuducunun rəflərinin korroziyaya uğradığı, mal qonşuluğu və texnoloji ardıcıllıq prinsipinin pozulduğu, işçilər üçün soyunub-geyinmə sahəsinin təşkil edilmədiyi və gigiyenik təlimlərə cəlb edilmədiyi məlum olub. Məhsullardan nümunələr götürülərək laborator müayinələrə cəlb olunub. Faktla bağlı sahibkar barəsində inzibati protokol tərtib edilib və qida obyektində xidmətlərin göstərilməsinin dayandırılması barədə məhdudlaşdırıcı tədbir görülüb.
“Azza”nın istehsal etdiyi yağ məhsulunda uyğunsuzluq aşkarlanıb
AQTA əməkdaşları tərəfindən həyata keçirilən monitorinqlər zamanı “Azza-Aqro” QSC-nin istehsalı olan “Fermazza” əmtəə nişanlı 82% yağlılıqda kərə yağından götürülmüş nümunənin sınaq nəticələrinə əsasən, yağda bitki sterinləri (Stiqmasterin, Kampesterin, Beta-sitosterin) ilə yanaşı, yağ turşuları üzrə uyğunsuzluq aşkarlanıb. Bununla bağlı məhsul partiyasının dövriyyədən çıxarılması və ticarət şəbəkələrindən geri çağırılması barədə məhdudlaşdırıcı qərar qəbul edilib, sahibkar barəsində inzibati tədbir görülüb və icrası məcburi göstərişlər verilib. Qeyd edək ki, məhsulların üzərində təbii inək südündən alınmış, pasterizə edilmiş qaymaqdan istifadə edilməsi bəyan edilsə də, faktiki tərkibində bitki sterinin aşkar edilməsi istehlakçıların aldadılmasına və hüquqlarının pozulmasına səbəb olur.
Lənkəranda fəaliyyət göstərən restoranda nöqsanlar aşkarlandı
Lənkəran rayonunda yerləşən, Rəhmanov Zəka Bilal oğluna məxsus ”Cənnət-Xıl” restoranında AQTA əməkdaşları tərəfindən keçirilmiş yoxlama zamanı qida təhlükəsizliyi tələblərinin pozulduğu aşkarlanıb. Belə ki, obyektin sanitar-gigiyenik tələblərə cavab vermədən fəaliyyət göstərdiyi, qida məhsullarının saxlanması zamanı temperatur rejiminə əməl edilmədiyi, qida məhsulları hazırlanan sahədə döşəmə, tavan və divar səthlərinin təmirsiz olduğu, müvafiq təmizlik işlərinin aparılmadığı, havalandırma sisteminin quraşdırılmadığı və digər nöqsanlar müəyyən edilib. Faktla bağlı sahibkar barəsində inzibati protokol tərtib edilib və qanunvericiliyə uyğun zəruri tədbirlər görülüb.
