Giriş
Ağdaşda fəaliyyət göstərən heyvan satışı bazarında nöqsanlar aşkarlanıb
23 May 2024 14:44
Azərbaycan Respublikası Qida Təhlükəsizliyi Agentliyinin əməkdaşları tərəfindən Ağdaş rayonu, Aşağı Zeynəddin kəndi ərazisində fəaliyyət göstərən "Kamil-M” MMC-yə məxsus heyvan satışı bazarında yoxlama aparılıb. Yoxlama zamanı qida təhlükəsizliyi sahəsində texniki normativ hüquqi aktların, sanitar-texniki və sanitar-gigiyenik tələblərin pozulduğu aşkarlanıb.
Belə ki, bazar ərazisində diri heyvan satışı ilə yanaşı müxtəlif çeşiddə qida məhsullarının satışının həyata keçirildiyi, həmçinin ictimai iaşə xidmətinin göstərildiyi məlum olub.
Bazar ərazisində mal qonşuluğu prinsipinə və temperatur rejiminə əməl olunmadığı, piştaxtalar üzərində müxtəlif növ unlu-qənnadı məhsullarının açıq şəkildə satışının həyata keçirildiyi, qida məhsullarının saxlanılması üçün müvafiq avadanlıqların mövcud olmadığı, üzərində etiket məlumatı və qida təhlükəsizliyi sahəsində müvafiq müşayiətedici sənədləri olmayan konservləşdirilmiş və bal məhsullarının satışının həyata keçirildiyi, müxtəlif növ qida məhsullarının yerdən ara məsafəsi gözlənilmədən və birbaşa torpaq üzərinə yığıldığı aşkarlanıb. Həmçinin bazar ərazisində fəaliyyət göstərən ictimai iaşə obyektinin sanitar-texniki və sanitar-gigiyenik tələblərə cavab vermədiyi, mətbəx sahəsinin tavan, döşəmə və divarlarının asan yuyulabilən və təmizlənən materiallarla üzlənmədiyi, işçi heyətin xüsusi geyimlə təmin olunmadığı və gigiyena qaydalarına əməl edilmədiyi, mütəmadi təmizlik işlərinin aparılmadığı müəyyən olunub.
Faktla bağlı bazar rəhbərliyi barəsində inzibati protokol tərtib olunub. Eyni zamanda bazarda qida məhsullarının satışının qadağan olunması və ictimai iaşə fəaliyyətinin dayandırılmasına dair məhdudlaşdırıcı tədbirlərin tətbiqi barədə qərar qəbul edilib.
Agentlik bir daha bazar rəhbərlərinin nəzərinə çatdırır ki, qida təhlükəsizliyi tələblərinin əməl olunmadığı bazarlarla bağlı ən sərt tədbirlər görüləcək.
Oxşar xəbərlər
AQTA sədri Şəmkirdə istixana təsərrüfatlarında olub
Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzli Şəmkir rayonunda fəaliyyət göstərən “Shamkir Greenhouse” MMC və “AM Brothers Agro” MMC-nin istixana təsərrüfatlarında olub.
Ölkədə fəaliyyətinə icazə verilən heyvan bazarlarının sayı 22-ə çatdı - VİDEO
Qazax və Gədəbəy rayonlarında yerləşən heyvan bazarlarının biotəhlükəsizlik, həmçinin müasir standartlara uyğun yenidənqurma və abadlaşdırma işlərindən sonra fəaliyyətinə icazə verilib. Belə ki, bazarların giriş-çıxış qapısında dezbaryerlər quraşdırılıb, baytarlıq nəzarəti zamanı xəstəlik əlamətləri aşkar edilən heyvanların digər heyvanlardan təcrid olunaraq saxlanılması məqsədilə xüsusi izolyatorlar tikilib.
Ölkənin 33 rayon və şəhərində müasir heyvan kəsimi məntəqələri qurulmalıdır - VİDEO
Ət və ət məhsullarının təhlükəsizliyinin təmin edilməsi baxımından heyvanların kəsiminin müvafiq baytarlıq-sanitariya və sanitariya-gigiyena tələblərinə cavab verən ixtisaslaşdırılmış kəsim məntəqələrində həyata keçirilməsi mühüm əhəmiyyət daşıyır. Azərbaycan Respublikasının Qida Təhlükəsizliyi Agentliyi (AQTA) tərəfindən aparılan monitorinqlər göstərir ki, hazırda ölkənin 33 rayon və şəhərində heyvan kəsimi məntəqəsi ya mövcud deyil, ya da fəaliyyət göstərmir. Əhalinin sıx məskunlaşdığı bu bölgələrdə heyvan kəsimi məntəqələrinin mövcud olmaması heyvanların kəsiminin əksər hallarda küçələrdə, yol kənarlarında həyata keçirilməsinə şərait yaradır. Bu da öz növbəsində kəsim prosesinin, eləcə də əldə olunan ət və ət məhsullarının təhlükəsizliyinə nəzarətin təmin edilməsində birbaşa çətinliklər yaradır.
