Giriş
Alkoqollu içkilərin istehsalı müəssisəsində bir sıra nöqsanlar aşkar olunub
28 Aprel 2022 17:00
Azərbaycan Respublikasının Qida Təhlükəsizliyi Agentliyi (AQTA) ölkədə qida təhlükəsizliyinin təmin edilməsi və əhalinin sağlamlığının qorunması istiqamətində nəzarət tədbirlərini davam etdirir.
Agentlik əməkdaşları tərəfindən keçirilən nəzarət tədbirləri çərçivəsində Abşeron rayonu, Mehdiabad qəsəbəsi, Dostluq küçəsi, ev 1 ünvanında fəaliyyət göstərən, “Abşeron-Şərab” ASC-yə məxsus alkoqollu içkilərin istehsalı müəssisəsində plandankənar yoxlama həyata keçirilib. Yoxlama zamanı “Grelka” nişanlı 40%-li tündlükdə araqların markalanmasında istifadə edilən etiket məlumatında məhsulun “Alfa” tipli etil spirtindən istehsal olunduğu qeyd olunsa da, “Alfa” tipli etil spirtinin mədaxili barədə heç bir sənəd təqdim olunmayıb. Müəssisədə araq istehsalında xammal kimi Belarusiya Respublikasından idxal olunan “Lyuks” tipli etil spirtindən istifadə olunduğu müəyyən edilib. Həmçinin “Grelka” nişanlı 40%-li tündlükdə arağın etiket məlumatında “Silver Filtration” (Gümüş Filtrasiya) sözlərinin qeyd olunmasına baxmayaraq, araşdırma nəticəsində araq istehsalında ağac oduncağından alınan БАУ-А markalı aktivləşdirilmiş kömürdən istifadə olunduğu məlum olub. İstehsal prosesində məhsulun təmizlənməsində gümüş filtrlərdən istifadə olunması öz təsdiqini tapmayıb. Bu da sahibkar tərəfindən “İstehlakçıların hüquqlarının müdafiəsi haqqında” Azərbaycan Respulikası Qanununun tələblərinin kobud şəkildə pozulduğunu göstərir.
Aşkar olunmuş faktlarla bağlı qanunvericiliyə uyğun olaraq, inzibati xəta haqqında protokol tərtib edilərək müəssisə rəhbərliyi inzibati məsuliyyətə cəlb edilib, həmçinin “Grelka” nişanlı 40%-li tündlükdə araqların istehsalının və satışının qadağan edilməsi, həmin məhsulların satış məntəqələrindən geri çağırılması barədə məhdudlaşdırıcı tədbirlərin tətbiqinə dair Qərar qəbul edilib. Eyni zamanda Agentlik tərəfindən respublikada fəaliyyət göstərən iri ticarət şəbəkələrində həmin məhsulun satışının qadağan olunması barədə müraciət ünvanlanıb, “Abşeron-Şərab” ASC tərəfindən həmin məhsulun ticarət şəbəkələrindən geri çağırılması təmin edilib.
Bununla bağlı, istehlakçılar tərəfindən satış şəbəkələrində aşağıdakı fotoşəkillərdə göstərilən, üzərində “Silver Filtration” və “Alfa” tipli etil spirtindən istehsal olunduğu qeyd olunan “Grelka” nişanlı araqların alınmaması və Agentliyin “1003 - Çağrı Mərkəzi”nə məlumat vermələri tövsiyə olunur.
AQTA əhalinin sağlamlığının qorunması və təhlükəsiz qida məhsulları ilə təmin edilməsi üçün ardıcıl tədbirlərini davam etdirir. İstehlakçı hüquqlarının pozulmasına yönəlmiş qanunsuz halların qarşısı qətiyyətlə alınacaqdır.
Oxşar xəbərlər
İmişlidə fəaliyyət göstərən çörək emalı müəssisəsində nöqsanlar aşkarlanıb
Qida Təhlükəsizliyi Agentliyinin əməkdaşları İmişli şəhəri, N.Savalanov küçəsində fəaliyyət göstərən, Fərmanov Dirbaş Veysəl oğluna məxsus çörək emalı müəssisəsində yoxlama keçirib. Baxış zamanı müəssisənin qida təhlükəsizliyi qeydiyyatından keçmədən fəaliyyət göstərdiyi məlum olub. Həmçinin məhsulların saxlanma şəraitinə və temperatur rejiminə əməl olunmadığı, emal prosesinin qaydalara uyğun həyata keçirilmədiyi, müvafiq təmizlik işlərinin görülmədiyi və digər nöqsanlar aşkarlanıb. Faktla bağlı müəssisənin fəaliyyəti nöqsanlar aradan qaldırılanadək məhdudlaşdırılıb, rəhbəri inzibati məsuliyyətə cəlb olunub.
Gəncədə yaşayış evində saxta alkoqollu içkilərin istehsal edildiyi aşkarlanıb
Gizli fəaliyyət göstərən saxta alkoqollu spirtli içki istehsalı ilə bağlı daxil olan məlumat əsasında Qida Təhlükəsizliyi Agentliyinin və yerli polis idarəsinin əməkdaşları Gəncə şəhəri, M.Ə.Sabir küçəsində Fituri Əsmər Mehman qızına məxsus yaşayış evində reyd keçirib. Yoxlama zamanı müxtəlif əmtəə nişanlı şüşə butulkaların yuyulub təmizlənərək, saxta üsullarla alkoqollu içkilərin qablaşdırıldığı müəyyən olunub. 13 ədəd 1 l-lik, 9 ədəd 0.7 l-lik, 4 ədəd 0.5 l-lik “Banketnaya Yubiley”, 19 ədəd 1 l-lik, 7 ədəd 0.7 l-lik, 5 ədəd 0.5 l-lik “Organic Line”, 1 ədəd 1 l-lik, 3 ədəd 0.7 l-lik “Banketnaya”, 1 ədəd 1 l-lik, 1 ədəd 0.5 l-lik “Старый Доктор” əmtəə nişanlı satış məqsədilə qablaşdırılmış saxta alkoqollu içki, həmçinin müxtəlif yerli və xarici brend markalı içkilərə məxsus butulka və qapaqlar, içərisində 25 litr su-spirt qarışığı olan plastik çəllək aşkarlanıb. Faktla bağlı qanunvericiliyə uyğun müvafiq tədbirlər görülüb. Məhsullardan nümunələr götürülərək laborator müayinələrə cəlb edilib. Qanunsuz istehsal olunan alkoqollu içkilərin satış yerlərinin müəyyən edilməsi istiqamətində zəruri tədbirlər həyata keçirilməkdədir. Araşdırmalar davam etdirilir.
Saxta süd məhsullarının sosial media səhifəsində satışa çıxarıldığı müəyyən edilib
Sosial media platformasında satışı həyata keçirilən qaymağın keyfiyyətinin aşağı olması ilə bağlı Qida Təhlükəsizliyi Agentliyinə daxil olan müraciət əsasında Abşeron rayonu, Masazır qəsəbəsi, Ə.Vahid küçəsi, “Salty Park” yaşayış kompleksi, giriş 1, ev 295 ünvanında yoxlama keçirilib. Baxış zamanı fiziki şəxs Nəzərova Könül Sabir qızının istehsalçı müəssisələrdən tərkibində quru süd və süd yağı əvəzedicisi olan müxtəlif növ süd məhsullarını (qaymaq, pendir və s.) alıb etiketini çıxararaq, “təbii süd məhsulu” adı altında, müşayiətedici sənədləri olmadan “TikTok” və “İnstagram” sosial media səhifələrində satışını həyata keçirdiyi aşkarlanıb. Eyni zamanda süd məhsullarının temperatur rejimi gözlənilmədən, soyuducu avadanlıqla təmin edilməyən minik avtomobili vasitəsilə müştərilərə çatdırıldığı müəyyən edilib. Faktla bağlı qanunvericiliyə uyğun zəruri tədbirlər görülüb, qanunsuz fəaliyyətin qarşısı alınıb. Qeyd edək ki, saxta məhsulların satışı istehlakçıların hüquqlarının pozulmasıdır. Saxlama şəraitinə riayət olunmadan məhsulların satışı isə mikrobioloji çirklənməyə səbəb ola bilər ki, bu da insan sağlamlığı üçün təhlükəli hesab olunur. Vətəndaşlar qida təhlükəsizliyi sahəsində istehlakçı hüquqlarının pozulması və qanunazidd hallarla rastlaşdıqda, bu barədə konkret faktlarla Agentliyin “1003-Çağrı Mərkəzi”nə məlumat verə bilərlər. Müraciət daxil olduqdan dərhal sonra araşdırmalara başlanılacaq və qanunvericiliyə uyğun müvafiq tədbirlər görüləcəkdir.
