Giriş
AQTA-da Özbəkistan nümayəndə heyəti ilə görüş keçirilib
25 Avqust 2025 17:03
Azərbaycan Qida Təhlükəsizliyi Agentliyində (AQTA) ölkəmizdə səfərdə olan Özbəkistan nümayəndə heyəti ilə görüş keçirilib. Özbəkistanın Səhiyyə Nazirliyi yanında Sanitariya-epidemioloji rifah və ictimai sağlamlıq komitəsi sədrinin birinci müavini Nurmat Atabekovun başçılıq etdiyi nümayəndə heyəti ilə müzakirələrdə əməkdaşlıq imkanları nəzərdən keçirilib, təcrübə mübadiləsi aparılıb.
Agentliyin sədr müavini Zəkiyyə Mustafayeva qeyd edib ki, Azərbaycanla Özbəkistan arasında münasibətlər son illər dinamik şəkildə inkişaf edir, qarşılıqlı səfərlər, imzalanan sənədlər və həyata keçirilən birgə layihələr bu əməkdaşlığın daha da genişlənməsinə imkan yaradır. Görüş zamanı ölkəmizdə qida təhlükəsizliyi, bitki və heyvan sağlamlığının təmin olunması istiqamətində görülən işlər, mövcud qanunvericiliyin və texniki normativ hüquqi aktların tətbiqi təcrübəsi nümayəndə heyətinin diqqətinə çatdırılıb.
Daha sonra qida təhlükəsizliyinə risk əsaslı yanaşma metodları, böhran vəziyyətlərində idarəetmə mexanizmlərinin formalaşdırılması və sürətli xəbərdarlıq sistemlərinin əhəmiyyəti vurğulanıb. Eyni zamanda nəzarət tədbirləri, yoxlama prosedurları, HACCP sisteminin tətbiqi üzrə əldə olunmuş təcrübə müzakirə edilib.
Görüşdə idxal-ixraca dair tələblər, yeni növ məhsulların, bioloji aktiv qida əlavələrinin, pestisidlərin, baytarlıq preparatlarının və yem əlavələrinin qeydiyyatı məsələləri, eləcə də “Avtomatlaşdırılmış Qida Təhlükəsizliyi” İnformasiya Sisteminin (AQTİS) iş prinsipləri ilə bağlı təqdimatlar edilib. Bununla yanaşı, ictimaiyyətlə ünsiyyətin qurulması, media vasitələrindən səmərəli istifadə və kommunikasiya materiallarının hazırlanması mövzuları da diqqət mərkəzində olub.
Görüşün yekununda iki ölkənin müvafiq qurumları arasında əməkdaşlığın genişləndirilməsi, qarşılıqlı təcrübə mübadiləsinin davam etdirilməsi barədə razılıq əldə olunub. Nümayəndə heyəti AQTİ-nin fəaliyyəti ilə də tanış olacaq.
Oxşar xəbərlər
Azərbaycandan Bolqarıstan və digər Aİ ölkələrinə fındıq ixracı məsələləri müzakirə olunub
Azərbaycan Respublikasının Qida Təhlükəsizliyi Agentliyi (AQTA) ilə Bolqarıstan Qida Təhlükəsizliyi Agentliyinin nümayəndələri arasında onlayn görüş keçirilib.
Qanunsuz heyvan kəsimi ciddi risklər yarada bilər - VİDEO
Baytarlıq müayinəsindən keçməmiş, xəstə və ya xəstəlik şübhəsi olan heyvanların kəsilərək ətinin istehlaka təqdim edilməsi insan sağlamlığı üçün ciddi risklər yaradır. Belə heyvanlardan insanlara bruselyoz, qarayara, vərəm və digər zoonoz xəstəliklər keçə bilər.
İdxal olunan bitki tərkibli spred yağı istehsalçı ölkəyə geri qaytarılıb
Azərbaycan Respublikasının Qida Təhlükəsizliyi Agentliyi (AQTA) tərəfindən həyata keçirilən nəzarət tədbirləri çərçivəsində "Vita Milk" MMC-nin idxal etdiyi bitki tərkibli spred yağı məhsulundan nümunələr götürülərək müayinələrə cəlb edilib.
