Giriş
AQTA ilə Polşa Respublikasının Bitki Mühafizəsi və Toxumçuluq üzrə Dövlət Müfəttişliyi arasında görüş keçirilib
3 Mart 2021 18:32
Azərbaycan Respublikasının Qida Təhlükəsizliyi Agentliyi və Polşa Respublikasının Bitki Mühafizəsi və Toxumçuluq üzrə Dövlət Müfəttişliyi arasında görüş keçirilib.
Görüşdə Agentliyin sədri Qoşqar Təhməzli iştirak edib. Tədbirdə Azərbaycan Respublikası ilə Polşa Respublikası arasında müvafiq sahələrdə ikitərəfli əməkdaşlığın daha da inkişaf etdirilməsi, Polşaya bitki və bitki məhsulları ixracının artırılması imkanlarının nəzərdən keçirilməsi, pestisidlərin monitorinqi, sınağı və qeydiyyatı üzrə Polşa təcrübəsinin öyrənilməsi və bitki mühafizəsi sahəsində mövcud qanunvericilik mübadiləsi ilə bağlı müzakirələr aparılıb. Tərəflər əməkdaşlığı öz səlahiyyətləri çərçivəsində və dövlətlərin qanunvericiliklərinə, eləcə də 31 may 2019-cu il tarixində Bakıda imzalanmış “Azərbaycan Respublikasının Qida Təhlükəsizliyi Agentliyi ilə Polşa Respublikasının Bitki Mühafizəsi və Toxum İstehsalı Dövlət Müfəttişliyi arasında fitosanitariya sahəsində Anlaşma Memorandumu”na uyğun olaraq, bərabərlik və qarşılıqlı səmərəlilik prinsipləri əsasında inkişaf etdirəcəklərini vurğulayıb. Sonda iki qurum arasında daha geniş əməkdaşlığın müvafiq struktur bölmələri vasitəsilə konkret istiqamətlər üzrə birbaşa formada həyata keçirilməsi, eləcə də mütəxəssislərin qarşılıqlı işgüzar və təcrübə səfərlərinin təşkili barədə razılığa gəlinib.
Qeyd edək ki, Polşa Respublikasının Bitki Mühafizəsi və Toxumçuluq üzrə Dövlət Müfəttişliyi Beynəlxalq Bitki Mühafizə Konvensiyası çərçivəsində milli bitki mühafizəsi təşkilatıdır.
Oxşar xəbərlər
Ölkədə fəaliyyətinə icazə verilən heyvan bazarlarının sayı 22-ə çatdı - VİDEO
Qazax və Gədəbəy rayonlarında yerləşən heyvan bazarlarının biotəhlükəsizlik, həmçinin müasir standartlara uyğun yenidənqurma və abadlaşdırma işlərindən sonra fəaliyyətinə icazə verilib. Belə ki, bazarların giriş-çıxış qapısında dezbaryerlər quraşdırılıb, baytarlıq nəzarəti zamanı xəstəlik əlamətləri aşkar edilən heyvanların digər heyvanlardan təcrid olunaraq saxlanılması məqsədilə xüsusi izolyatorlar tikilib.
Ölkənin 33 rayon və şəhərində müasir heyvan kəsimi məntəqələri qurulmalıdır - VİDEO
Ət və ət məhsullarının təhlükəsizliyinin təmin edilməsi baxımından heyvanların kəsiminin müvafiq baytarlıq-sanitariya və sanitariya-gigiyena tələblərinə cavab verən ixtisaslaşdırılmış kəsim məntəqələrində həyata keçirilməsi mühüm əhəmiyyət daşıyır. Azərbaycan Respublikasının Qida Təhlükəsizliyi Agentliyi (AQTA) tərəfindən aparılan monitorinqlər göstərir ki, hazırda ölkənin 33 rayon və şəhərində heyvan kəsimi məntəqəsi ya mövcud deyil, ya da fəaliyyət göstərmir. Əhalinin sıx məskunlaşdığı bu bölgələrdə heyvan kəsimi məntəqələrinin mövcud olmaması heyvanların kəsiminin əksər hallarda küçələrdə, yol kənarlarında həyata keçirilməsinə şərait yaradır. Bu da öz növbəsində kəsim prosesinin, eləcə də əldə olunan ət və ət məhsullarının təhlükəsizliyinə nəzarətin təmin edilməsində birbaşa çətinliklər yaradır.
Qanunsuz heyvan kəsimi ciddi risklər yarada bilər - VİDEO
Baytarlıq müayinəsindən keçməmiş, xəstə və ya xəstəlik şübhəsi olan heyvanların kəsilərək ətinin istehlaka təqdim edilməsi insan sağlamlığı üçün ciddi risklər yaradır. Belə heyvanlardan insanlara bruselyoz, qarayara, vərəm və digər zoonoz xəstəliklər keçə bilər.
