Giriş
AQTA-nın bitki sağlamlığı üzrə mütəxəssisləri Rusiyada səfərdədir
5 Mart 2021 14:11
1 mart 2021-ci il tarixində Azərbaycan Respublikasının Qida Təhlükəsizliyi Agentliyi və Azərbaycan Qida Təhlükəsizliyi İnstitutunun bitki sağlamlığı üzrə mütəxəssisləri Rusiya Federasiyasına səfər ediblər. Səfərin məqsədi iki ölkənin müvafiq laboratoriyaları və elmi-tədqiqat institutları arasında birgə tədqiqatların həyata keçirilməsi üzrə əməkdaşlığın genişləndirilməsi, bu sahədə peşəkar kadrların hazırlanmasıdır.
Səfər çərçivəsində AQTA sədrinin müşaviri Camal Quliyevin rəhbərlik etdiyi nümayəndə heyətinin Rusiya Federasiyasının Kənd Təsərrüfatı Nazirliyinin tabeliyində fəaliyyət göstərən “Ümumrusiya Bitki Karantini Mərkəzi” Federal Dövlət Büdcə Təşkilatının rəhbərliyi ilə görüşü keçirilib. Görüş çərçivəsində qarşılıqlı fikri mübadiləsi aparılıb, həmçinin mütəxəssislər elmi sahədə fəaliyyət göstərən şöbə və laboratoriyaların fəaliyyəti ilə yaxından tanış olublar.
Səfər çərçivəsində Kolomna şəhərində yerləşən müvəqqəti saxlanma anbarlarına da baxış keçirilib. Baxış zamanı AQTA əməkdaşları Rusiyanın müvafiq qurumunun müfəttişləri ilə birgə idxal olunan məhsullara fitosanitar karantin baxışı keçirib və nümunələrin götürülməsi prosesində iştirak ediblər. AQTA və AQTİ mütəxəssisləri nümunələrin qəbulu şöbəsi, nümunələrin ekspertizası laboratoriyasında müayinələrin aparılması prosesini və idxalın rəsmiləşdirilməsini yaxından izləyib, eləcə də müvəqqəti saxlanma anbarlarına daxil olan Azərbaycana məxsus nəqliyyat vasitəsində daşınan fındıq məhsullarının ilkin müayinəsində və karantin ekspertizasında hər hansı zərərli orqanizmin aşkarlanmadığını müşahidə ediblər. Eyni zamanda zərərli orqanizmlərlə sirayətlənmiş yük partiyasının fumiqasiyasının necə həyata keçirildiyi də nümayəndə heyətinə nümayiş etdirilib.
AQTA-nın nümayəndə heyəti, həmçinin Rusiya Federasiyasının Baytarlıq və Fitosanitar Nəzarət üzrə Federal Xidmətinin ərazi idarələri və Ümumrusiya Bitki Karantini Mərkəzinin Moskva şəhəri üzrə ərazi idarəsi laboratoriyalarına səfər edib, burada idxal və ixrac prosesləri zamanı götürülmüş nümunələrin qəbulu, o cümlədən entomologiya, herbologiya, fitohelmintologiya, bakteriologiya və virusologiya laboratoriyalarının iş prinsipi ilə tanış olublar.
Qeyd edək ki, AQTA və AQTİ mütəxəssislərindən ibarət nümayəndə heyətinin Rusiya Federasiyasına təcrübə səfəri davam edir.
Oxşar xəbərlər
Lökbatan qəsəbəsində reyd zamanı istehlaka yararsız ət aşkarlanıb
Qida Təhlükəsizliyi Agentliyinin Daxili İşlər Nazirliyinin əməkdaşları ilə birgə keçirdiyi reyd zamanı Bakı şəhəri, Qaradağ rayonu, Lökbatan qəsəbəsində fiziki şəxs İsmayılov Gülabba Ələkbər oğluna məxsus 77-AL-754 dövlət qeydiyyat nişanlı avtomobilin yük hissəsində daşınma zamanı baytarlıq-sanitariya və sanitariya-gigiyena tələbləri pozulan 100 kq mənşəyi məlum olmayan ət aşkarlanıb. Baxış zamanı ətlərin baytarlıq ekspertizasından keçmədiyi, baytarlıq müşayətedici sənədi olmadığı və orqanoleptik göstəricilərinə görə normativ sənədin tələblərinə cavab vermədiyi məlum olub. Ətlərdən götürülən nümunələrin laborator müayinəsi nəticəsində At DNT-si müəyyən edilib. Faktla bağlı fiziki şəxs barəsində inzibati tədbir görülüb və ətin dövriyyədən çıxarılması təmin edilib. Araşdırmalar davam etdirilir.
Kərə yağları ilə bağlı nəzarət tədbirləri davam etdirilir
Qida Təhlükəsizliyi Agentliyinin əməkdaşları tərəfindən həyata keçirilən nəzarət tədbirləri çərçivəsində fiziki şəxs Cəfərov Əli Telman oğlunun istehsal etdiyi kərə yağlarından götürülmüş nümunələrin müayinəsi nəticəsində məhsul partiyalarında bitki sterinləri (Kampesterin, Stiqmasterin, Beta-sitosterin), eyni zamanda normativ sənədlə bu növ məhsulun tərkibində istifadəsinə icazə verilməyən qida əlavələri (Sorbin və Benzoy turşuları) aşkarlanıb. Faktla bağlı Agentlik tərəfindən sözügedən məhsul partiyalarının dövriyyədən çıxarılması və ticarət şəbəkələrindən geri çağırılması barədə məhdudlaşdırıcı qərar qəbul edilərək qanunvericiliyə uyğun zəruri tədbirlər görülüb. Qeyd edək ki, kərə yağı məhsullarının üzərində təbii inək südündən alınmış, pasterizə edilmiş qaymaqdan istifadə edilməsi bəyan edildiyi halda, faktiki tərkibində bitki yağının aşkarlanması istehsalçı tərəfindən istehlakçıların aldadılması və hüquqlarının pozulması hesab olunur. Həmçinin tərkibində Sorbin (E200) və Benzoy (E210) turşuları olan məhsulların həddindən artıq istehlakı insanlarda allergik reaksiyaların yaranmasına səbəb ola bilər ki, qüvvədə olan normativ sənədə uyğun olaraq bəzi məhsullarda həmin qida əlavələrinin istifadəsi qadağandır. Uyğunsuzluq aşkarlanan məhsul partiyaları aşağıdakılardır: № Məhsulun adı Məhsulun istehsal və son istifadə tarixləri Aşkarlanan uyğunsuzluq 1. "Westfood" əmtəə nişanlı 82.5% yağlılıqda qaymaqdan təbii kərə yağı 07.02.2025-07.02.2026 Kampesterin, Stiqmasterin, Beta-sitosterin, Sorbin (E200) turşusu, Benzoy (E210) turşusu 2. "Beloruskiy Kray" əmtəə nişanlı 82.5% yağlılıqda təbii kərə yağı 05.03.2025-05.03.2026 Kampesterin, Beta-sitosterin
Salyanda fəaliyyət göstərən restoranda nöqsanlar aşkarlanıb
Salyan rayonu, Y.Qasımov küçəsi 3B ünvanında fəaliyyət göstərən, fiziki şəxs Ağayev Rüstəm Cavanşir oğluna məxsus “Era” restoranında Qida Təhlükəsizliyi Agentliyinin əməkdaşları tərəfindən yoxlama keçirilib. Baxış zamanı ictimai iaşə müəssisəsinin mətbəx sahəsində sanitar-texniki və sanitar-gigiyenik vəziyyətin qənaətbəxş olmadığı, texnoloji ardıcıllıq prinsipinin pozulduğu, məhsulların saxlanması zamanı temperatur rejiminə əməl olunmadığı, havalandırma sisteminin quraşdırılmadığı, işçi heyətin müvafiq geyimlə təmin edilmədiyi və digər nöqsanlar aşkarlanıb. Faktla bağlı fiziki şəxs barəsində inzibati protokol tərtib olunub və nöqsanlar aradan qaldırılanadək müəssisənin mətbəx sahəsində işlərin görülməsi və xidmətlərin göstərilməsi barədə müvəqqədi məhdudiyyət tətbiq olunub.
