Giriş
AQTA-nın nümayəndə heyəti Litva Respublikasında işgüzar səfərdə olub
26 Oktyabr 2022 11:36
Azərbaycan Respublikasının Qida Təhlükəsizliyi Agentliyinin (AQTA) nümayəndə heyəti 23-25 oktyabr tarixlərində Litva Respublikasında işgüzar səfərdə olub.
Səfər çərçivəsində Agentliyin sədr müavini Rəşad Mafusovun rəhbərlik etdiyi nümayəndə heyəti bu ölkənin Kənd Təsərrüfatı nazirinin müavini Egidijus Giedraitis, Kənd Təsərrüfatı Nazirliyi yanında Dövlət Bitkiçilik Xidmətinin rəhbəri Sergejus Fedotovas, eləcə də Dövlət Qida və Baytarlıq Xidmətinin direktoru Mantas Staskeviçius arasında görüş keçirilib. Görüş zamanı AQTA-nın fəaliyyət istiqamətləri, son illər ölkəmizdə qida təhlükəsizliyi sahəsində görülən tədbirlər barədə geniş məlumat verilib. AQTA və Litva Respublikasının Dövlət Qida və Baytarlıq Xidməti, o cümlədən Litva Respublikasının Kənd Təsərrüfatı Nazirliyi yanında Dövlət Bitkiçilik Xidməti arasında Anlaşma Memorandumları imzalanıb.Tərəflər qida təhlükəsizliyi, baytarlıq və fitosanitar sahələrdə qarşılıqlı əməkdaşlığı genişləndirmək niyyətlərini bəyan ediblər.
Səfər zamanı Litva Respublikasının Milli Qida və Baytarlıq Riskinin Qiymətləndirilməsi İnstitutunun nümayəndə heyəti ilə də görüş keçirilib. Görüşdə hər iki ölkənin qida təhlükəsizliyi institutları barədə məlumat verilib. Eyni zamanda, risk qiymətləndirilməsi, təhlükənin müəyyənləşdirilməsi və səciyyələndirilməsi, genotipləşdirmə və sekvensləşdirmə analizləri üzrə Litva təcrübəsinin öyrənilməsinin vacibliyi vurğulanıb.
Agentlliyin nümayəndə heyəti Litva Respublikasının Medininkai sərhəd nəzarət məntəqəsinə səfər ediblər. Səfər zamanı sərhəd-nəzarət məntəqələrində həyata keçirilən işlər, diri heyvanların idxalı zamanı heyvanların karantində saxlanması ilə əlaqədar həyata keçirilən prosedurlar, sərhəddə aparılan laborator analizlər, sərhəd nəzarət məntəqələri və aidiyyəti regional idarələr arasında əlaqə qurulmasına dair məsələlər üzrə təcrübələr bölüşülüb.
Eyni zamanda, Litva Respublikasının Kənd Təsərrüfatı Nazirliyi yanında Dövlət Bitki Xidmətinin Fitosanitar Tədqiqat Laboratoriyasının əməkdaşları ilə görüş keçirilib. Görüş çərçivəsində AQTA-nın nümayəndə heyətinin üzvləri laboratoriyaların faəliyyəti ilə yaxından tanış olub, həmçinin yeni aşkar edilmiş zərərli orqanizmlə mübarizənin təşkili, məhvetmə qərarının çıxarılması, icrası və digər məsələlərə dair fikir mübadiləsi aparıblar.
Oxşar xəbərlər
Göygöldə nöqsanlar aşkarlanan kolbasa istehsalı müəssisəsinin fəaliyyəti məhdudlaşdırılıb
Qida Təhlükəsizliyi Agentliyinin əməkdaşları Göygöl rayonunun Qızılqaya qəsəbəsində yerləşən, fiziki şəxs Nağıyev Camal Əli oğluna məxsus kolbasa istehsalı müəssisəsində plandankənar yoxlama keçirib. Baxış zamanı müəssisənin qida təhlükəsizliyi qeydiyyatından keçmədən fəaliyyət göstərdiyi, sanitar-gigiyenik vəziyyətin qida təhlükəsizliyi sahəsində texniki normativ hüquqi aktların tələblərinə cavab vermədiyi, kolbasa məhsullarının saxlanması və qablaşdırılması sahəsində xüsusi temperatur rejiminə əməl edilmədiyi, həmçinin məhsulların etiket məlumatlarında uyğunsuzluq müəyyən olunub. Bundan əlavə, müəssisədə istifadə müddəti bitmiş məhsulların təkrar dövriyyəsi üçün doğrama bıçaqları, kiflənmiş kolbasanın silinməsi üçün duru yağ, istehsal tarixinin silinməsi üçün məhlul, təkrar qablaşdırılma üçün vakuum avadanlığı aşkarlanıb. Faktla bağlı qanunvericiliyə uyğun olaraq müəssisənin fəaliyyəti məhdudlaşdırılıb və icrası məcburi göstərişlər verilib. Araşdırmalar davam etdirilir.
Lənkəranda normativ tələblərin pozulduğu ət satışı məntəqəsinin fəaliyyəti məhdudlaşdırılıb
Daxil olan müraciət əsasında Lənkəran şəhəri, Koroğlu küçəsi, Böyük bazar ərazisində fəaliyyət göstərən, fiziki şəxs Həsənov Allahşükür Atəş oğluna məxsus ət satışı məntəqəsində Qida Təhlükəsizliyi Agentliyinin əməkdaşları tərəfindən keçirilmiş plandankənar yoxlama zamanı qida təhlükəsizliyi sahəsində texniki normativ hüquqi aktların tələblərinin pozulduğu aşkarlanıb. Belə ki, məntəqədə sanitar-gigiyenik tələblərə əməl edilmədiyi, ətlərin üzərində baytarlıq nəzarətindən keçirildiyinə dair möhürün olmadığı, əlyuma çanağının, havalandırma sisteminin, eləcə də ət məhsullarının saxlanması üçün soyuducu və dondurucuların mövcud olmadığı, işçi heyətin tibbi müayinədən keçmədiyi və fərdi qoruyucu vasitələrdən istifadə etmədiyi, dezinfeksiya işlərinin aparılmadığı müəyyən edilib.
Qanunsuz fəaliyyət göstərən dönərxanada bir sıra nöqsanlar aşkarlanıb
Ağdam rayonu, Quzanlı qəsəbəsində fəaliyyət göstərən, fiziki şəxs Əliyev İbrahim Şirin oğluna məxsus dönərxanada Qida Təhlükəsizliyi Agentliyinin əməkdaşları tərəfindən plandankənar yoxlama keçirilib. Baxış zamanı dönərxanada qida məhsulları üzrə gigiyena qaydalarına və qida təhlükəsizliyi tələblərinə əməl edilmədiyi, sanitar-texniki və sanitar-gigiyenik vəziyyətin qüvvədə olan normativlərə cavab vermədiyi müəyyən edilib. Belə ki, iaşə obyektinin qida təhlükəsizliyi qeydiyyatından keçmədən fəaliyyət göstərdiyi məlum olub, həmçinin obyektdə xammal olaraq istifadə edilən məhsulların (xiyar, pomidor, mayonez) açıq şəkildə saxlandığı, çarpaz çirklənmənin qarşısının alınması məqsədilə texnoloji prosesin ardıcıllığına riayət edilmədiyi, əlyuma çanaqlarının isti su və gigiyenik tələblərə cavab verən qurutma vasitələri ilə təmin edilmədiyi, havalandırma sisteminin quraşdırılmadığı, çirklənməyə qarşı müdafiə və zərərvericilərlə mübarizə üçün müvafiq şəraitin olmadığı, döşəmə, divar səthlərinin təmirsiz olduğu və dezinfeksiyaedici vasitələrin təsirinə davamlı materialla üzlənmədiyi, mütəmadi olaraq müvafiq təmizlik işlərinin aparılmadığı, tullantıların ağzı kip bağlanan və qoxu yaymayan qablara toplanmadığı və digər nöqsanlar aşkarlanıb.
