Giriş
AQTA sədri Qoşqar Təhməzli və kənd təsərrüfatı naziri İnam Kərimov Belarusun kənd təsərrüfatı və ərzaq naziri İvan Krupko ilə görüşüblər
2 İyun 2021 11:22
Qida Təhlükəsizliyi Agentliyinin sədri Qoşqar Təhməzli və kənd təsərrüfatı naziri İnam Kərimovun rəhbərlik etdikləri nümayəndə heyəti Belarus Respublikasının paytaxtı Minskə səfər edib.
Səfər çərçivəsində Azərbaycan nümayəndə heyəti Minskdə keçirilən “Belaqro-2021” 31-ci Beynəlxalq İxtisaslaşmış Sərgisinin açılış mərasimində iştirak edib.
1-5 iyun tarixlərində Minskdə keçiriləcək aqrosənaye həftəsi çərçivəsində Çin-Belarus Sənaye Parkında təşkil olunmuş “Belaqro” sərgisinə 16 ölkədən, o cümlədən Rusiya, Böyük Britaniya, Fransa, Niderland, İtaliya, Litva, Çin, İordaniya və digər ölkələrdən 400-dən çox şirkət qatılıb. Sərginin açılış mərasimində Belarus Baş nazirinin müavini Aleksandr Subbotin və digər rəsmi şəxslər iştirak ediblər. Azərbaycan nümayəndə heyətinin üzvləri iki pavilyonda və açıq havada nümayiş olunan ekspozisiyada təqdim edilən kənd təsərrüfatı məhsulları və texnikası, o cümlədən pilotsuz kənd təsərrüfatı sistemləri ilə tanış olub, heyvandarlıq və əkinçilik sahəsində innovasiyalara dair stendlərdə sərgilənən yeniliklərlə maraqlanıblar.
Daha sonra Qida Təhlükəsizliyi Agentliyinin sədri Qoşqar Təhməzli və kənd təsərrüfatı naziri İnam Kərimov Belarusun kənd təsərrüfatı və ərzaq naziri İvan Krupko ilə görüşüblər. Görüşdə Azərbaycan ilə Belarus arasında aqrar sahədə strateji əməkdaşlıq məsələləri müzakirə olunub. Tərəflər iki ölkənin baytarlıq nəzarəti sistemlərinin inteqrasiyası, bu sahədə kadr hazırlığı, birgə elmi-tədqiqat işlərinin aparılması, kənd təsərrüfatı və ərzaq məhsullarının qarşılıqlı ixracı və digər məsələləri nəzərdən keçiriblər.
Nazir İvan Krupko Belarus Prezidenti Aleksandr Lukaşenkonun bu ilin aprel ayında Azərbaycana səfərini və Prezident İlham Əliyevlə görüşünü xatırladaraq qeyd edib ki, dövlət başçıları Qarabağda işğaldan azad olunmuş ərazilərin bərpasında bir sıra istiqamətlər üzrə məsələləri ətraflı müzakirə ediblər. Gələcəkdə Qarabağda kənd təsərrüfatının inkişafında Belarusun aqrar sahədəki təcrübəsindən, xüsusilə aqroşəhərciklərin yaradılması təcrübəsindən istifadə olunması mümkündür.
Görüşdə iki ölkənin kənd təsərrüfatı və qida təhlükəsizliyi sahəsində əməkdaşlığın genişləndirilməsi, birgə Fəaliyyət Planının hazırlanması, bununla bağlı Azərbaycan və Belarusun müvafiq qurumlarının təmsilçilərindən ibarət işçi qrupunun formalaşdırılması və digər məsələlər ətrafında müzakirələr aparılıb.
Azərbaycan nümayəndə heyəti səfər çərçivəsində Belarusun “Snov” Aqrokombinatında, “Qritskeviçi”, “Novaya jizn” ASC-lərində, Nesvij Uşaq Qidaları zavodunda və digər sənaye müəssisələrində olub.
Oxşar xəbərlər
İctimai iaşə müəssisələrində aşkar edilmiş nöqsanlar aradan qaldırılıb
Azərbaycan Respublikası Qida Təhlükəsizliyi Agentliyinin apardığı plandankənar yoxlamalar zamanı Bakı şəhərində fəaliyyət göstərən bir sıra ictimai iaşə və qida məhsullarının satışı ilə məşğul olan müəssisələrdə aşkarlanmış nöqsanların aradan qaldırılması istiqamətində müvafiq sağlamlaşdırma tədbirləri həyata keçirilib. Belə ki, Xətai, Yasamal və Suraxanı rayonlarında fəaliyyət göstərən 3 müəssisədə keçirilmiş yoxlamalar zamanı müəyyən edilmiş nöqsanlar müəssisə sahibləri tərəfindən aradan qaldırılıb. Görülmüş tədbirlər nəticəsində ictimai iaşə müəssisələrində aşkar edilmiş uyğunsuzluqlar aradan qaldırılıb və fəaliyyətin davam etdirilməsinə şərait yaradılıb. Sağlamlaşdırma tədbirləri həyata keçirilən müəssisələr aşağıdakılardır: 1. Fiziki şəxs Rəhimov Fərid Mübariz oğluna məxsus Bakı şəhəri, Nəsimi rayonu, Mir Cəlal 4 mkr, ev 18A ünvanında yerləşən “Köhnə ciyərxana” kafesi; 2. Fiziki şəxs Zamanov Nəsimi Səməd oğluna məxsus Bakı şəhəri, Nəsimi rayonu, Mir Cəlal küçəsi, 18/3 (93 saylı mağaza) ünvanında yerləşən “Köhnə ciyərxana” kafesi; 3.Fiziki şəxs Bayramov Emin Varımcan oğluna məxsus Bakı şəhəri, Xəzər rayonu, Şüvəlan qəsəbəsi, A.İldırım küçəsi, 37C ünvanında yerləşən “Halva” kafesi;
Masallıda qanunsuz toyuq kəsimi sexləri aşkarlandı – Fəaliyyətləri məhdudlaşdırıldı
Azərbaycan Respublikası Qida Təhlükəsizliyi Agentliyinin əməkdaşları Masallı rayonu, İsgəndərli qəsəbəsində Rəsulov Taleh Seyran oğluna məxsus toyuq kəsimi sexində, Digah kəndində isə Paşayev Füzuli İbrahim oğluna məxsus toyuq kəsimi sahəsində yoxlama keçirib. Yoxlama zamanı hər iki qida obyektində quşların müvafiq müşayiətedici sənədlərinin olmaması, sanitar-gigiyenik və sanitar-texniki tələblərin pozulması və digər nöqsanlar aşkarlanıb. Hər iki sahibkar barəsində inzibati protokol tərtib edilib, məhdudlaşdırıcı tədbirlərin tətbiqi barədə qərar qəbul olunub, toyuq məhsullarından nümunələr götürülərək laborator müayinələrə cəlb edilib. Araşdırmalar davam etdirilir.
Nəzarət tədbirləri - İcmal
AQTA tərəfindən keçirilən plandankənar yoxlamalar zamanı Bakı şəhərində, Bərdə və Masallı rayonlarında fəaliyyət göstərən qida obyektlərində sanitariya-gigiyena tələblərinin pozulması və digər nöqsanlar müəyyən edilib. Aşkarlanmış pozuntularla bağlı obyektlərin fəaliyyətinin məhdudlaşdırılması istiqamətində tədbirlər görülüb.
