Giriş
AQTA sədri və “Rosselxoznadzor”un rəhbəri arasında görüş olub
16 Noyabr 2023 18:03
Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzli və ölkəmizdə rəsmi səfərdə olan Rusiya Federasiyasının Baytarlıq və Fitosanitar Nəzarət üzrə Federal Xidmətinin ("Rosselxoznadzor") rəhbəri Sergey Dankvert arasında görüş keçirilib.
Görüş Azərbaycan Respublikasının Baş naziri Əli Əsədovun 2021-ci ildə Rusiyaya səfəri zamanı imzalanan “Azərbaycan Respublikasının Qida Təhlükəsizliyi Agentliyi ilə Rusiya Federasiyasının Kənd Təsərrüfatı Nazirliyi arasında baytarlıq sahəsində əməkdaşlıq haqqında Saziş”in və “Azərbaycan Respublikasının Qida Təhlükəsizliyi Agentliyi ilə Baytarlıq və Fitosanitar Nəzarət üzrə Federal Xidmət (Rusiya Federasiyası) arasında bitki karantini sahəsində informasiya sistemlərinin inteqrasiyasına keçidə dair Protokol”un icrasının təmin edilməsi, o cümlədən qarşılıqlı əməkdaşlıq çərçivəsində qida təhlükəsizliyi, baytarlıq və fitosanitar nəzarəti sahələrində birgə görülən işlərin müzakirəsi və müvafiq tədbirlərin həyata keçirilməsinin təşkili məqsədini daşıyıb.
Görüş zamanı müvafiq sənədlərdən irəli gələn məsələlərə uyğun olaraq, transsərhəd heyvan xəstəliklərinə qarşı mübarizənin təşkili, dabaq xəstəliyinin SAT-2 tipi üzrə Rusiyada istehsal edilən vaksinin ölkəmizdə tətbiqi, fitosanitar nəzarəti sahəsində sistemlərin ekvivalentliyinin tanınması əsasında ixrac olunan məhsulların müayinə tezliklərinin azaldılması və qida məhsullarının istehsal edildiyi obyektlərin təsdiq sisteminin ekvivalentliyinin tanınması müzakirə olunub.
AQTA sədri iki ölkənin müvafiq qurumları arasında qida təhlükəsizliyi, baytarlıq və fitosanitar nəzarəti sahələrində həyata keçirilən tədbirləri və onların əhəmiyyətini diqqətə çatdırıb. O cümlədən transsərhəd heyvan xəstəlikləri ilə mübarizə tədbirlərinin həyata keçirilməsi üçün birgə fəaliyyətin zəruriliyini vurğulayıb. Bu sahədə əlaqələrin gücləndirilməsinin və bioloji təhlükəsizliyin təmin olunmasının vacibliyini önə çəkib.
"Rosselxoznadzor"un rəhbəri iki qurum arasında qida təhlükəsizliyi, baytarlıq və fitosanitar nəzarəti sahələrində əməkdaşlığın hazırkı vəziyyətini müsbət qiymətləndirərək müvafiq sahələrdə görülən işlərin hər iki ölkənin ticarət dövriyyəsinin artırılmasına töhfə verəcəyinə əminliyini ifadə edib.
Görüşdə qarşılıqlı maraq doğuran digər məsələlərlə bağlı fikir mübadiləsi aparılıb. Sonda iki qurum arasında əməkdaşlığın daha da gücləndirilməsi, o cümlədən transsərhəd heyvan xəstəlikləri ilə mübarizə sahəsində işlərin genişləndirilməsi məqsədəuyğun hesab edilib və görüşün yekunlarına dair protokol imzalanıb.
Qeyd edək ki, səfər çərçivəsində S.Dankvertin digər görüşləri, eləcə də Azərbaycan Qida Təhlükəsizliyi İnstitutuna baş çəkməsi və laboratoriyaların işi ilə tanış olması da nəzərdə tutulub.
"Rosselxoznadzor"un rəhbərinin ölkəmizə səfəri noyabrın 18-də başa çatacaq.
Oxşar xəbərlər
Heyvanların identifikasiyası niyə vacibdir? – Maarifləndirici çap məhsulları hazırlanıb
Azərbaycan Respublikasının Qida Təhlükəsizliyi Agentliyi (AQTA) tərəfindən Heyvanların İdentifikasiyası və Qeydiyyatı Sisteminin (HİQS) əhəmiyyəti ilə bağlı maarifləndirici çap məhsulları hazırlanıb. Materiallarda heyvanların fərdi identifikasiyasının baytarlıq tədbirlərinin daha dəqiq və effektiv həyata keçirilməsinə, xəstəliklərin vaxtında aşkarlanmasına və yayılmasının qarşısının alınmasına imkan verdiyi qeyd olunur. Həmçinin heyvanların identifikasiyasının Avtomatlaşdırılmış Qida Təhlükəsizliyi İnformasiya Sistemi (AQTİS) vasitəsilə həyata keçirildiyi, fermer və sahibkarların bu məqsədlə AQTA-nın regional bölmələrinə və Azərbaycan Qida Təhlükəsizliyi İnstitutuna (AQTİ) müraciət edə biləcəyi barədə məlumat verilir. Çap məhsulları fermerlər və təsərrüfat sahibləri arasında paylanılacaq və onların maarifləndirilməsi məqsədilə istifadə olunacaq.
AQTA sədri Şəmkirdə istixana təsərrüfatlarında olub
Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzli Şəmkir rayonunda fəaliyyət göstərən “Shamkir Greenhouse” MMC və “AM Brothers Agro” MMC-nin istixana təsərrüfatlarında olub.
Ölkədə fəaliyyətinə icazə verilən heyvan bazarlarının sayı 22-ə çatdı - VİDEO
Qazax və Gədəbəy rayonlarında yerləşən heyvan bazarlarının biotəhlükəsizlik, həmçinin müasir standartlara uyğun yenidənqurma və abadlaşdırma işlərindən sonra fəaliyyətinə icazə verilib. Belə ki, bazarların giriş-çıxış qapısında dezbaryerlər quraşdırılıb, baytarlıq nəzarəti zamanı xəstəlik əlamətləri aşkar edilən heyvanların digər heyvanlardan təcrid olunaraq saxlanılması məqsədilə xüsusi izolyatorlar tikilib.
