AQTA tərəfindən təsdiq edilən xarici qida obyektlərindən yem və yem əlavələrinin idxalı davam etdirilir
10 Sentyabr 2024 14:33
![AQTA tərəfindən təsdiq edilən xarici qida obyektlərindən yem və yem əlavələrinin idxalı davam etdirilir](https://afsa.gov.az/resized/resize649/center/pages/9562/whatsapp-image-2024-09-10-at-22856-pm.jpg)
Azərbaycan Respublikasının Qida Təhlükəsizliyi Agentliyi tərəfindən təsdiq edilən xarici qida obyektlərindən yem və yem əlavələrinin idxal prosesi davam etdirilir.
Məlum olduğu kimi, yem məhsullarının təhlükəsizliyinin təmin edilməsi ilə bağlı məsələlər “Qida təhlükəsizliyi haqqında” Azərbaycan Respublikasının Qanunu ilə tənzimlənir. Qanun 2023-cü il 1 yanvar tarixindən etibarən qüvvəyə mindikdən sonra bu sahədə beynəlxalq təcrübə nəzərə alınmaqla yeniliklər tətbiq olunub, sadələşdirmə işləri aparılaraq yem və yem əlavələri məhsullarına münasibətdə qeydiyyat tələbi ləğv edilib. Belə ki, yem məhsullarının idxalı üçün artıq qeydiyyat tələbi ləğv edildiyindən ənənəvi yemlərin ölkəyə idxalında prosedurların sadələşdirilməsi həyata keçirilib və yem məhsulları idxal etmək istəyən təsərrüfatların özlərinə uyğun ölkədən qeydiyyat tələbi olmadan yem məhsullarının idxalı imkanı yaradılıb.
Qeyd edək ki, Qanunda yem əlavələri ilə bağlı tətbiq edilmiş yeniliklərdən biri onların Azərbaycan Respublikasının gömrük ərazisinə idxal olunması üçün həmin məhsulların istehsal və emal edildiyi obyektlərin Azərbaycan Respublikasının Qida Təhlükəsizliyi Agentliyi tərəfindən müvafiq qaydada təsdiq edilməsidir. Belə ki, yem əlavələri istehsal edən obyektlər qida təhlükəsizliyi sahəsində texniki normativ hüquqi aktların tələblərinə uyğunluğu yerində və ya videoinspeksiya formatında qiymətləndirilməklə təsdiq olunan qida zənciri obyektlərinin siyahısına daxil edilib.
Hazırda bir neçə yem əlavələri istehsal edən xarici obyektlər Agentlik tərəfindən təsdiq edilib və həmin obyektlərdən qeyd olunan məhsulların ölkəyə idxalı davam etdirilir.
Cari il ərzində ölkəmizə əsasən Rusiya, Argentina, Türkiyə, Çin, Ukrayna və Almaniya daxil olmaqla, ümumilikdə, 31 (ötən ilin eyni dövrü üzrə 27) ölkədən yem və yem məhsulları idxal olunub. Həmçinin cari il ərzində ölkəmizə əsasən Rusiya (47%), Argentina, Türkiyə və Almaniya daxil olmaqla, ümumilikdə, 16 ölkədən quş yemi idxal edilib.
Bildiririk ki, cari il ərzində heyvan və quş yeminin idxalında artım müşahidə olunub. O cümlədən heyvan və quş yeminin idxalı ötən ilin müvafiq dövrü ilə müqayisədə 37% artıb. Həmçinin amin turşusu tərkibli yem əlavələrinin də idxalında artım müşahidə olunub. Belə ki, cari ildə amin turşusu tərkibli yem əlavələrinin idxalı ötən ilin eyni dövrü ilə müqayisədə 48% artıb. Cari il ərzində isə ölkəmizə əsasən Çin, Fransa, Belçika, Türkiyə daxil olmaqla, ümumilikdə, 8 ölkədən amin turşusu tərkibli yem əlavələri idxal olunub.
Bu sahədə aparılan təhlillər bir daha onu göstərir ki, quş əti və quşçuluq məhsullarının qiymətinin artması ilə bağlı bəzi media resurslarında edilən manipulyativ çıxışlar, o cümlədən guya bu məhsulların istehsalı zamanı xərclərin çoxaldığı, yem ehtiyatının azaldığı və buna səbəb kimi ölkəyə idxal olunan yem məhsulları ilə bağlı tətbiq olunan yeni qaydaların əsas göstərməsi kimi iddialar həqiqətə söykənməyən və obyektivlikdən kənar məlumatlardır.
Oxşar xəbərlər
![Təlimlərdə uğur qazanan sahibkarlıq subyektlərinin əməkdaşlarına sertifikatlar təqdim edilib](https://afsa.gov.az/resized/resize224/center/pages/9566/whatsapp-image-2024-09-11-at-102822-am.jpg)
Təlimlərdə uğur qazanan sahibkarlıq subyektlərinin əməkdaşlarına sertifikatlar təqdim edilib
Azərbaycan Qida Təhlükəsizliyi İnstitutunun (AQTİ) Təlim Mərkəzi tərəfindən “Qida sahəsində gigiyena tələbləri” mövzusunda təşkil olunan təlimlərə qatılaraq uğurlu nəticələr əldə edən sahibkarlıq subyektlərinin əməkdaşlarına sertifikatların təqdim olunması mərasimi keçirilib.
![Kütləvi tədbirlər zamanı qidalanma ilə bağlı maarifləndirmə işlərinin miqyası genişləndirilib](https://afsa.gov.az/resized/resize224/center/pages/9565/whatsapp-image-2024-09-11-at-93444-am.jpg)
Kütləvi tədbirlər zamanı qidalanma ilə bağlı maarifləndirmə işlərinin miqyası genişləndirilib
Ölkə ərazisində istehlakçıların təhlükəsiz qida məhsulları ilə təmin edilməsi həmçinin, qida məhsullarının emalı və çatdırılması xidmətlərinin qida təhlükəsizliyi tələblərinə uyğun təşkili istiqamətində maarifləndirmə işlərinin miqyası genişləndirilib. Həyata keçirilən tədbirlər çərçivəsində Azərbaycan Respublikasının Qida Təhlükəsizliyi Agentliyi (AQTA) tərəfindən ictimai iaşə müəssisələrində, keytrinq xidməti göstərən müəssisələrdə qida ilə düzgün davranış qaydalarına həsr olunan maarifləndirici videoçarxlar hazırlanıb. “Qida məhsullarının hazırlanması və çatdırılması xidmətlərinə dair tələblər” adlı videoçarxda ictimai iaşə müəssisələrində məhsulların təhlükəsiz və keyfiyyətli şəkildə istehlakçılara təqdim edilməsi üçün əməl edilməsi zəruri qaydalar haqqında ətraflı məlumat verilib.
![Sumqayıtda mənşəyi məlum olmayan ətin satışa çıxarılmasının qarşısı alınıb](https://afsa.gov.az/resized/resize224/center/pages/9564/whatsapp-image-2024-09-10-at-55923-pm.jpg)
Sumqayıtda mənşəyi məlum olmayan ətin satışa çıxarılmasının qarşısı alınıb
Daxil olan məlumat əsasında Qida Təhlükəsizliyi Agentliyinin müfəttişləri Daxili İşlər Nazirliyinin əməkdaşları ilə birgə Sumqayıt şəhəri, Sumqayıtçay ərazisində fəailiyyət göstərən Əlibəyov Rəşad Şiraslan oğluna məxsus obyektdə yoxlama keçirib. Baxış zamanı mənşəyi məlum olmayan, aşkar korlanma əlamətləri olan ümumi çəkisi 263,6 kq heyvan əti aşkarlanıb. Müayinələrin aparılması məqsədilə ətdən nümunələr götürülərək Qida Təhlükəsizliyi İnstitutunun müvafiq laboratoriyasına təqdim olunub.