Giriş
AQTA və Macarıstanın Qida Zəncirinə Nəzarət Qurumunun nümayəndə heyəti arasında görüş keçirilib
30 İyun 2022 10:24
Azərbaycan Respublikası Qida Təhlükəsizliyi Agentliyinin (AQTA) və Macarıstanın Qida Zəncirinə Nəzarət Qurumunun nümayəndə heyəti arasında görüş keçirilib.
Görüşdə ilkin tanışlıq məqsədilə nümayəndə heyətləri qarşılıqlı təqdimatla çıxışıb ediblər. Azərbaycandan bitkiçilik məhsullarının Macarıstan və digər Aİ ölkələrinə ixracına texniki dəstək göstərilməsi, eləcə də gələcək əməkdaşlıq imkanları müzakirə olunub. 2022-ci il 3 fevral tarixində imzalanmış “Azərbaycan Respublikası Hökuməti və Macarıstan Hökuməti arasında iqtisadi əməkdaşlıq üzrə Birgə Komissiya”nın 8-ci iclasının protokolu və “Azərbaycan Respublikasının Qida Təhlükəsizliyi Agentliyi ilə Macarıstanın Kənd Təsərrüfatı Nazirliyi arasında qida təhlükəsizliyi və heyvan sağlamlığı sahəsində əməkdaşlıq haqqında Anlaşma Memorandumu”nda qida təhlükəsizliyi sahəsi üzrə öz əksini tapmış müddəalar ətrafında fikir mübadiləsi aparılıb və əməkdaşlığın həyata keçirilməsi istiqamətində tədbirlər müəyyənləşdirilib.
Tədbirdə 2021-2022-ci illər ərzində Azərbaycan ilə Macarıstan arasında qida məhsulları, fitosanitar və baytarlıq nəzarətində olan məhsulların idxal-ixrac əməliyyatları ilə bağlı müzakirələr aparılıb. Macarıstandan ölkəmizə əsasən canlı bitki, şokolad, konservləşdirilmiş tərəvəz və ət məhsullarının idxal olunduğu, ölkəmizdən Macarıstana isə meyvə-tərəvəz şirəsi və hazır sousların ixrac olunduğu vurğulanıb. Bildirilib ki, qeyd edilən idxal-ixrac əməliyyatlarının müvafiq prosedurlara uyğun həyata keçirilməsi təmin olunub, ortaya çıxan texniki çətinliklər işçi qaydada həll edilib.
Görüşdə Anlaşma Memorandumu və Hökumətlərarası Komissiyanın Protokolunun icrasının təmin edilməsi çərçivəsində qida məhsullarının izlənilə bilməsi və geri çağırılması sahəsində, eyni zamanda yem məhsulları, qida və yem əlavələri, bioloji aktiv qida məhsulları, qida məhsulları ilə təmasda olan materialların dövlət qeydiyyatına alınması ilə bağlı təcrübə mübadiləsinin həyata keçirilməsinə dair razılıq əldə olunub.
Oxşar xəbərlər
“İbrahim Kabab Evi” ictimai iaşə obyektində nöqsanlar aşkarlanıb
Bakı şəhəri, Nəsimi rayonu, H.Aslanov küçəsi, ev 85, m. 20 ünvanında fəaliyyət göstərən, fiziki şəxs Nəbiyev İbrahim Ağaisa oğluna məxsus “İbrahim Kabab Evi” ictimai iaşə obyektində Qida Təhlükəsizliyi Agentliyi tərəfindən keçirilmiş yoxlama zamanı normativ hüquqi aktların tələblərinin pozulduğu məlum olub. Baxış zamanı iaşə obyektində istehlaka təqdim edilən ətlərin baytarlıq müşayiətedici sənədlərinin olmadığı aşkarlanıb. Ət və ət məhsullarından, alət və avadanlıqlardan götürülmüş nümunələrin laborator müayinəsi nəticəsində uyğunsuzluqlar müəyyən edilib. Faktla bağlı nöqsanlar aradan qaldırılanadək ictimai iaşə obyektində işlərin görülməsi, xidmətlərin göstərilməsi məhdudlaşdırılıb, rəhbərliyi barəsində inzibati protokol tərtib olunub.
Xırdalanda ictimai iaşə obyektində normativ tələblərin pozulduğu aşkarlanıb
Qida Təhlükəsizliyi Agentliyinin əməkdaşları Xırdalan şəhəri, S.Bəhlulzadə küçəsində fəaliyyət göstərən, fiziki şəxs Məmmədov Məmməd Tofiq oğluna məxsus “Məhəllə” kafesində yoxlama keçirib. Baxış zamanı kafedə qida təhlükəsizliyi sahəsində texniki normativ hüquqi aktların tələblərinin pozulduğu, sanitar-gigiyenik və sanitar-texniki vəziyyətin qənaətbəxş olmadığı aşkarlanıb. Etiket məlumatları və müvafiq müşayiətedici sənədləri olmayan məhsulların satışa çıxarıldığı müəyyən edilib. Faktla bağlı nöqsanlar aradan qaldırılanadək kafenin fəaliyyəti məhdudlaşdırılıb, rəhbəri barəsində inzibati qərar qəbul edilərək cərimə tətbiq olunub.
Bərdədə bazarda nöqsanlar aşkarlanıb
Qida Təhlükəsizliyi Agentliyinin əməkdaşları tərəfindən Bərdə rayonu, Güloğlular kəndində fəaliyyət göstərən “Ticarət Mərkəzi” MMC-yə məxsus bazarda keçirilmiş yoxlama zamanı aşkarlanan nöqsanların icra vəziyyəti ilə bağlı yenidən yoxlama keçirilib. Baxış zamanı bazarda süd və süd məhsullarının mənşəyinin məlum olmadığı və temperatur rejiminə əməl edilmədiyi, məhsulların açıq şəkildə satışa çıxarıldığı, işçilərin gigiyena qaydalarına diqqət yetirmədiyi və xüsusi geyimlə təmin edilmədiyi, əl yuma çanaqlarının mövcud olmadığı və digər nöqsanlar müəyyən edilib. Faktla bağlı sahibkar barəsində inzibati protokol tərtib edilib, qeyd edilən məhsullar satışdan kənarlaşdırılıb və icrası məcburi göstərişlər verilib.
