Giriş
AQTİ ali təhsil müəssisələrinin, elmi-tədqiqat institutlarının və elmi mərkəzlərin mütəxəssislərini əməkdaşlığa dəvət edir
23 Noyabr 2023 15:14
Azərbaycan Qida Təhlükəsizliyi İnstitutu (AQTİ) qida təhlükəsizliyi ilə bağlı olan sahələr üzrə fəaliyyət göstərən ali təhsil müəssisələrinin, elmi-tədqiqat institutlarının və elmi mərkəzlərin mütəxəssislərini birgə əməkdaşlığa dəvət edir.
Belə ki, AQTİ tərəfindən ölkədə qida təhlükəsizliyi sisteminin təkmilləşdirilməsi və tənzimlənməsi istiqamətində mühüm işlər həyata keçirilir. Bu sıraya qida təhlükəsizliyi sahəsində elmi-praktiki araşdırmaların və tədqiqatların, həmçinin elmi prinsiplərə əsaslanan risk qiymətləndirilmələrinin həyata keçirilməsini, qida təhlükəsizliyinə dair mövcud beynəlxalq standartların tələblərinə uyğun normativ hüquqi aktların layihələrinin hazırlanmasını, qida məhsullarının təhlükəsizlik və minimum keyfiyyət göstəriciləri üzrə laboratoriya analizlərinin aparılmasını, ekspertiza və tədqiqat xidmətlərinin göstərilməsini, eləcə də mütəxəssislərin hazırlanması üzrə təlim və tədris işlərinin təşkilini şamil etmək olar. Qeyd edilənlər mahiyyət etibarilə insanların həyat və sağlamlığının qorunması üçün qida təhlükəsizliyinin səmərəli təşkilini təmin etməkdən, o cümlədən heyvan və bitki sağlamlığının qorunması ilə qida zəncirinin bütün mərhələlərində təhlükəsiz və keyfiyyyətli qida məhsulları istehsalına nail olmağa xidmət edir.
Qeyd edək ki, İnstitut 5 illik fəaliyyəti dövründə bir sıra beynəlxalq təşkilatlarla (WHO, WOAH, FAO, Codex Alimentarius və s.) əməkdaşlıq çərçivəsində qlobal məsələlərlə bağlı beynəlxalq layihələrin həyata keçirilməsində iştirak edib. Eyni zamanda prioritet elmi-tədqiqat xarakterli layihələrin yerinə yetirilməsinin təşəbbüskarı olub. AQTİ-də yaradılmış Elmi Araşdırmalar Mərkəzi (EAM) və Analitik Ekspertiza Mərkəzinin (AEM) qeyd olunan fəaliyyətlərin həyata keçirilməsində rolu böyükdür. Belə ki, AEM-nin nəzdində fəaliyyət göstərən bütün laboratoriyalar Azərbaycan Akkreditasiya Mərkəzi (AzAK) tərəfindən akkreditasiya olunmaqla yanaşı, dəfələrlə laboratoriya müayinə nəticələrinin beynəlxalq tələblər səviyyəsinə uyğunluğunu təsdiq edən səriştəlilik sınaqlarında müvəffəqiyyət qazanıb. Həmçinin üç laboratoriya nüfuzlu beynəlxalq akkreditasiya qurumları tərəfindən akkreditasiya olunub. Belə ki, Milli Referens Laboratoriyası Almaniyanın DakkS, Mərkəzi Baytarlıq Laboratoriyası Türkiyənin TÜRKAK və Abşeron Regional Sınaq Laboratoriyası Latviyanın LATAK akkreditasiya qurumu tərəfindən akkreditasiyadan keçirilib.
İnstitutun maddi-texniki bazasının gücləndirilməsi və modernləşdirilməsi istiqamətində tədbirlər mütəmadi olaraq davam etdirilir. Bu baxımdan hesab olunur ki, laboratoriya müayinə nəticələri əsasında toplanmış zəngin məlumat bazası nəinki EAM əməkdaşları tərəfindən elmi araşdırmaların həyata keçirilməsində, həmçinin bakalavriat, magistratura və doktorantura təhsili alan müvafiq sahə mütəxəssislərinin elmi-tədqiqat işlərində kifayət qədər faydalı elmi məlumat mənbəyi ola bilər. Qeyd olunan istiqamətlər üzrə AQTİ ilə əməkdaşlıq etmək istəyən mütəxəssislər (+99412) 565 12 72 (daxili 575) nömrəli telefona zəng edə və ya aynur.hasanova@afsa.gov.az elektron poçtuna məktub göndərə bilərlər.
Oxşar xəbərlər
AQTA sədri Şəmkirdə istixana təsərrüfatlarında olub
Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzli Şəmkir rayonunda fəaliyyət göstərən “Shamkir Greenhouse” MMC və “AM Brothers Agro” MMC-nin istixana təsərrüfatlarında olub.
Ölkədə fəaliyyətinə icazə verilən heyvan bazarlarının sayı 22-ə çatdı - VİDEO
Qazax və Gədəbəy rayonlarında yerləşən heyvan bazarlarının biotəhlükəsizlik, həmçinin müasir standartlara uyğun yenidənqurma və abadlaşdırma işlərindən sonra fəaliyyətinə icazə verilib. Belə ki, bazarların giriş-çıxış qapısında dezbaryerlər quraşdırılıb, baytarlıq nəzarəti zamanı xəstəlik əlamətləri aşkar edilən heyvanların digər heyvanlardan təcrid olunaraq saxlanılması məqsədilə xüsusi izolyatorlar tikilib.
Ölkənin 33 rayon və şəhərində müasir heyvan kəsimi məntəqələri qurulmalıdır - VİDEO
Ət və ət məhsullarının təhlükəsizliyinin təmin edilməsi baxımından heyvanların kəsiminin müvafiq baytarlıq-sanitariya və sanitariya-gigiyena tələblərinə cavab verən ixtisaslaşdırılmış kəsim məntəqələrində həyata keçirilməsi mühüm əhəmiyyət daşıyır. Azərbaycan Respublikasının Qida Təhlükəsizliyi Agentliyi (AQTA) tərəfindən aparılan monitorinqlər göstərir ki, hazırda ölkənin 33 rayon və şəhərində heyvan kəsimi məntəqəsi ya mövcud deyil, ya da fəaliyyət göstərmir. Əhalinin sıx məskunlaşdığı bu bölgələrdə heyvan kəsimi məntəqələrinin mövcud olmaması heyvanların kəsiminin əksər hallarda küçələrdə, yol kənarlarında həyata keçirilməsinə şərait yaradır. Bu da öz növbəsində kəsim prosesinin, eləcə də əldə olunan ət və ət məhsullarının təhlükəsizliyinə nəzarətin təmin edilməsində birbaşa çətinliklər yaradır.
