Giriş
AQTİ-də ölkənin biotəhlükəsizlik statusunun daim nəzarətdə saxlanılması üçün sınaqlar həyata keçirilir
16 Fevral 2024 12:53
Azərbaycan Qida Təhlükəsizliyi İnstitutunun (AQTİ) laboratoriyaları biotəhlükəsizliyin təmin olunmasında xüsusi rol oynayır.
İnstitutun nəzdindəki beynəlxalq standartlara cavab verən 2-ci səviyyəli biotəhlükəsizlik laboratoriyaları paytaxt Bakıda və bölgələrdə fəaliyyət göstərir. Stasionar laboratoriyalarla yanaşı, səhra və səyyar tipli biotəhlükəsizlik laboratoriyaları da mövcuddur. Bu da xüsusi təhlükəli və ya zoonoz xəstəliklərin alovlanması zamanı hadisə yerində müayinələrin operativ şəkildə aparılmasında, həmçinin qabaqlayıcı və nəzarət tədbirlərinin görülməsində əvəzsiz rol oynayır.
Ölkədə biotəhlükəsizlik statusunun daim nəzarətdə saxlanılması məqsədilə laboratoriyalarda aparılan sınaqlar zamanı təcrid edilmiş xəstəlik törədicilərinin ştamları və genetik materialları AQTİ-nin Ştamlara nəzarət sektorunun daxilində təsis olunmuş kolleksiyada saxlanılır. Kolleksiyanın təsis edildiyi laboratoriya otaqları Ümumdünya Səhiyyə Təşkilatı və Ümumdünya Heyvan Sağlamlığı Təşkilatının tələb və tövsiyyələri nəzərə alınaraq müvafiq biotəhlükəsizlik səviyyəsinə uyğunlaşdırılıb. Kolleksiya ştamlardan laborator diaqnostikada, müxtəlif elmi tədqiqatlarda və gələcəkdə bioloji preparatların hazırlanmasında istifadəni təmin etmək məqsədilə yaradılıb. Ştam kolleksiyasında saxlanılan bioloji materiallara nəzarətin təmin olunması üçün Ştamlara Elektron Nəzarət Sistemindən istifadə edilir. Elektron sistemdə yaradılmış məlumat bazası üzərindən ştamların ümumi siyahısını, yararlılıq müddətini, aparılan bütün diaqnostik prosesləri izləmək və hesabatlar hazırlamaq mümkündür.
Qeyd edək ki, biotəhlükəsizlik laboratoriyaları insan, heyvan və ətraf mühit üçün təhdid törədən yoluxucu, xüsusi təhlükəli və zoonoz xəstəliklərin təhlükəsiz və çevik şəkildə diaqnostikasını aparmaq və bu istiqamətdə tədqiqat işlərini həyata keçirmək üçün təsis olunub.
Oxşar xəbərlər
Qoşqar Təhməzli qida sahəsində fəaliyyət göstərən sahibkarları qəbul edəcək
Qida Təhlükəsizliyi Agentliyinin sədri Qoşqar Təhməzlinin növbəti vətəndaş qəbulu Agentliyin inzibati binasında mayın 1-i saat 14:00-da keçiriləcək. Qida zəncirinin bütün mərhələlərində fəaliyyət göstərən sahibkarlar, o cümlədən qida məhsullarının istehsalı, emalı, idxal-ixracı, daşınması, satışı və sair sahələrdə çalışan şəxslər onları narahat edən məsələlərlə bağlı Agentlik sədri ilə görüşə bilərlər. Görüşdə iştirak etmək istəyən şəxslər ad, soyad, fəaliyyət sahəsi, müraciətin məzmunu və telefon nömrələrini göstərərək info@afsa.gov.az elektron poçtu vasitəsilə müraciət etməklə və ya (+994 50) 515 51 87 nömrəsinə zəng etməklə, həmçinin vatsap üzərindən əlaqə saxlamaqla qəbula yazıla bilərlər.
Qoşqar Təhməzli Ağsuda vətəndaşları qəbul edib
Qida Təhlükəsizliyi Agentliyinin sədri Qoşqar Təhməzli aprelin 25-i Ağsuda Ağsu, İsmayıllı, Qobustan, Şamaxı rayonlarından olan vətəndaşları qəbul edib. Qəbuldan öncə Ümummilli Lider Heydər Əliyevin abidəsi ziyarət edilib, önünə gül dəstələri düzülüb, xatirəsi ehtiramla yad edilib. Qəbulda vətəndaşların müraciətləri diqqətlə dinlənilib, bir qismi yerində öz həllini tapıb, qaldırılan bəzi məsələlər araşdırılması üçün nəzarətə götürülüb. Qida sahəsində işlə təmin olunmaq istəyən müvafiq ixtisaslara yiyələnmiş vətəndaşların müraciətlərinə də baxılıb. Agentliyin fəaliyyət dairəsinə aid olmayan müraciətlər isə müvafiq qurumlara çatdırılmaq üçün qeydiyyata alınıb.
Göygöldə "Dost" kafesində normativ tələblərin pozulduğu müəyyən edilib
Qida Təhlükəsizliyi Agentliyinin əməkdaşları Göygöl rayonu, Balçılı kəndində fəaliyyət göstərən “Dost” kafesində yoxlama keçirib. Baxış zamanı ictimai iaşə obyektində sanitar-texniki və sanitar-gigiyenik vəziyyətin normativ tələblərə cavab vermədiyi, soyuducuda mal qonşuluğu prinsipinin pozulduğu və etiketlənməsi aparılmayan qida məhsulları aşkarlanıb. Emal sahəsində ayrıca yuma çanaqlarının təşkil edilmədiyi, havalandırma sisteminin təchiz edilmədiyi, döşəmə və divar səthlərinin təmirsiz olduğu, qida ilə təmasda olan işçilərin tibbi müayinədən keçmədiyi və gigiyenik təlimlərə cəlb olunmadığı, müvafiq təmizlik işlərinin görülmədiyi və digər nöqsanlar aşkarlanıb. Faktla bağlı sahibkar barəsində inzibati protokol tərtib edilib, nöqsanlar aradan qaldırılanadək iaşə obyektinin dönər hazırlanma sahəsində işlərin və xidmətlərin görülməsinə məhdudiyyət tətbiq olunub və icrası məcburi göstərişlər verilib.
