Giriş
AQTİ əməkdaşları Türkiyədən olan mütəxəssislər tərəfindən keçirilən təlimdə iştirak ediblər
14 Dekabr 2022 10:14
Azərbaycan Qida Təhlükəsizliyi İnstitutunun (AQTİ) nəzdindəki laboratoriyalarda çalışan işçilərin peşəkarlığının artırılması və laboratoriya nəticələrinin tanınması məqsədilə bu sahədə fəaliyyət göstərən xarici ölkə laboratoriyaları və beynəlxalq təşkilatlarla əməkdaşlıq əlaqələri daim inkişaf etdirilir. Laboratoriya mütəxəssisləri mütəmadi olaraq respublikada və xarici ölkələrdə keçirilən təlimlərə qatılır, təcrübə mübadiləsi aparırlar.
Bu çərçivədə AQTİ əməkdaşları Türkiyə Cümhuriyyəti Kənd Təsərrüfatı və Meşə Nazirliyi tərəfindən “ISO/IEC 17043 Uyğunluğun qiymətləndirilməsi-səriştəlilik testinə dair ümumi tələblər” və “ISO/IEC 13528 Laboratoriyalararası müqayisə yolu ilə səriştəlilik sınaqlarında istifadə üçün statistik üsullar” mövzularında təşkil olunan təlimdə iştirak ediblər.
Təlimin keçirilməsində məqsəd səriştəlilik testlərini təşkil edən təşkilatların səlahiyyətlərinin tanınması üçün ümumi tələbləri və bu sahədə akkreditə olmaq istəyən təşkilatlar üçün hazırlanmış ISO/IEC 17043 beynəlxalq standartının tələblərini izah etməkdən ibarətdir.
Təlim zamanı iştirakçılara standartın tələblərinə əsaslanan keyfiyyət idarəetmə sisteminin qurulması, səriştəlilik sınaqlarının təşkili, müəyyən sınaq və ya ölçmələr üçün laboratoriya fəaliyyətinin qiymətləndirilməsi və performansın davamlılığının müşahidə edilməsi barədə ətraflı məlumat verilib. Eləcə də onlar sınaq və ya ölçmə metodlarının effektivliyinin dəyərləndirilməsi, referans materialların qiymətləndirilməsi, onların müvafiq sınaq və ya ölçmə prosedurları üçün istifadəyə uyğunluğunun qiymətləndirilməsi haqqında məlumatlandırılıblar. Həmçinin təlimdə “ISO/IEC 13528 Laboratoriyalararası müqayisə yolu ilə səriştəlilik sınaqlarında istifadə üçün statistik üsullar” standartını əhatə edən homogenlik və stabillik, səriştəlilik testi nəticələrinin əldə olunması və ilkin təhlili, dayanıqlı (robust) statistik metodlar, performans statistikaları, qrafiklər və digər məsələlər ətrafında müzakirələr aparılıb, iştirakçıların sualları cavablandırılıb.
Qeyd edək ki, ölkədə qida təhlükəsizliyinin təmin olunması məqsədilə AQTİ laboratoriyalarının beynəlxalq standartlara uyğunlaşdırılması istiqamətində mütəmadi olaraq zəruri tədbirlər görülür.
Oxşar xəbərlər
Bitkiçilik məhsullarının istehsalı və ixracı ilə məşğul olan sahibkarlarla görüş keçirilib
Qida Təhlükəsizliyi Agentliyi bitkiçilik məhsullarının istehsalı və ixracı ilə məşğul olan sahibkarlarla görüş keçirib. Onlayn formatda keçirilən görüşdə son günlər Rusiya Federasiyasına ixrac olunan bir sıra bitkiçilik məhsulları ilə bağlı bu ölkənin Baytarlıq və Fitosanitar Nəzarəti Federal Xidməti tərəfindən AQTA-ya daxil olan müvafiq bildirişlər barədə sahibkarlara məlumat verilib. Qeyd olunub ki, məhsullarında uyğunsuzluq aşkarlanması ilə bağlı bildiriş daxil olan müəssisələrə fitosanitar sertifikatın verilməsi prosesi dayandırılıb və hazırda həmin təsərrüfatlarda monitorinqlər həyata keçirilməkdədir. Görüşdə ixrac zamanı beynəlxalq ticarət qaydalarına və məhsulların idxalçı ölkənin fitosanitar tələblərinə uyğunluğuna, həmçinin qablaşdırma və etiketlənmə ilə bağlı tələblərə ciddi şəkildə əməl edilməsi, eyni zamanda təsərrüfat obyektlərinin AQTA tərəfindən qeydiyyata alınmasının önəmi və qanunvericiliyin tələbləri bir daha sahibkarların diqqətinə çatdırılıb. Sonda sahibkarların fikirləri dinlənilib, onları maraqlandıran suallar cavablandırılıb.
AQTA bitkiçilik məhsullarının ixracı ilə məşğul olan sahibkarlara müraciət edib
Son günlər Rusiya Federasiyasına ixrac olunan bir sıra bitkiçilik məhsulları ilə bağlı bu ölkənin Baytarlıq və Fitosanitar Nəzarəti Federal Xidməti tərəfindən AQTA-ya müvafiq bildirişlər daxil olub. Məhsullarında uyğunsuzluq aşkarlanması ilə bağlı bildiriş daxil olan müəssisələrə fitosanitar sertifikatın verilməsi prosesi Agentlik tərəfindən dayandırılıb, həmin təsərrüfatlarda monitorinqlərə başlanılıb. AQTA bununla bağlı bitkiçilik məhsullarının ixracı ilə məşğul olan sahibkarlara müraciət edərək bildirir ki, ixrac zamanı məhsulların idxalçı ölkənin fitosanitar tələblərinə uyğunluğuna, həmçinin qablaşdırma və etiketlənmə ilə bağlı tələblərə ciddi şəkildə əməl edilməlidir. Sahibkarlar bununla bağlı hər hansı peşəkar dəstək və metodiki köməklik üçün AQTA-nın 1003 “Çağrı Mərkəzi” və ya 012-377-00-77 (daxili 238, 215) telefon nömrələri ilə əlaqə saxlaya bilərlər.
Bitki mühafizə vasitələri və aqrokimyəvi maddələrin satışı mağazasında nöqsanlar aşkarlanıb
Salyan rayonunun Yolüstü kəndində yerləşən, Abuzərov Arif Safalı oğluna məxsus bitki mühafizə vasitələri və aqrokimyəvi maddələrin satışı mağazasında Qida Təhlükəsizliyi Agentliyi tərəfindən yoxlama keçirilib. Baxış zamanı obyektdə ümumi çəkisi 1359.8 kq və 297.15 litr olan son istifadə müddəti bitmiş 92 adda pestisid və aqrokimyəvi maddə aşkarlanıb. Eyni zamanda məhsulların saxlanma şəraitinə əməl olunmadığı, temperatur rejiminin pozulduğu və digər nöqsanlar müəyyən olunub. Faktla bağlı inzibati protokol tərtib edilib, istifadə müddəti bitmiş məhsullar dövriyyədən çıxarılıb.
