Giriş
AQTİ ilə Gürcüstanın Dövlət Kənd Təsərrüfatı Laboratoriyası arasında Anlaşma Memorandumu imzalanıb
19 Oktyabr 2022 17:42
Azərbaycan Qida Təhlükəsizliyi İnstitutunda (AQTİ) Gürcüstan nümayəndə heyəti ilə görüş təşkil edilib.
AQTİ-də keçirilən görüşdə Gürcüstanın Milli Qida Agentliyinin rəis müavini Vasili Basiladzenin rəhbərlik etdiyi nümayəndə heyətinə İnstitutun fəaliyyət istiqamətləri barədə ətraflı məlumat verilib. Bildirilib ki, ölkədə qida təhlükəsizliyinin təmin edilməsi və əhalinin sağlamlığının qorunması məqsədilə İnstitutun nəzdində qida təhlükəsizliyi, kompleks tədqiqatlar, bitki və heyvan sağlamlığı üzrə ixtisaslaşmış laboratoriyalar fəaliyyət göstərir. Laboratoriyalarda müxtəlif qida, bitki və heyvan mənşəli məhsulların təhlükəsizlik və keyfiyyət göstəriciləri üzrə müayinələr aparılır.
Həmçinin görüşdə ölkələr arasında təcrübə mübadiləsi, səriştəlilik sınaqlarının aparılması, davamlı tərəfdaşlığın möhkəmləndirilməsi ilə bağlı müzakirələr aparılıb, eləcə də AQTİ tərəfindən xırdabuynuzlu heyvanların taun xəstəliyi və antibiotik qalıqları mövzusunda təqdimatlar edilib.
Daha sonra qonaqlar iş prinsipi ilə tanış olmaq məqsədilə AQTİ-nin laboratoriyalarına baxış keçiriblər. Onlar Kompleks Tədqiqatlar Laboratoriyası, Milli Referans Laboratoriyası və Mərkəzi Baytarlıq Laboratoriyasında olublar. Gürcüstandan olan nümayəndə heyəti laborator sınaqların həyata keçirildiyi otaqlara baş çəkib, sınaqların aparılması prosesini izləyib, cihaz və avadanlıqlara baxıb, qarşılıqlı maraq doğuran məsələlər ətrafında fikir mübadiləsi aparıblar.
Görüşün sonunda AQTİ ilə Gürcüstanın Dövlət Kənd Təsərrüfatı Laboratoriyası arasında Anlaşma Memorandumu imzalanıb. Memorandumda AQTİ ilə Gürcüstanın Dövlət Kənd Təsərrüfatı Laboratoriyası arasında heyvan sağlamlığı sahəsində gələcək əməkdaşlıq və bacarıqların inkişafı, tərəflər arasında davamlı əməkdaşlığın təmin olunması, xüsusi təhlükəli patogenlər tərəfindən törədilən epidemiyaların aşkarlanması, onların qarşısının alınması tədbirləri və çoxtərəfli peşəkar mübadilələrin inkişaf etdirilməsi nəzərdə tutulub.
Oxşar xəbərlər
“İbrahim Kabab Evi” ictimai iaşə obyektində nöqsanlar aşkarlanıb
Bakı şəhəri, Nəsimi rayonu, H.Aslanov küçəsi, ev 85, m. 20 ünvanında fəaliyyət göstərən, fiziki şəxs Nəbiyev İbrahim Ağaisa oğluna məxsus “İbrahim Kabab Evi” ictimai iaşə obyektində Qida Təhlükəsizliyi Agentliyi tərəfindən keçirilmiş yoxlama zamanı normativ hüquqi aktların tələblərinin pozulduğu məlum olub. Baxış zamanı iaşə obyektində istehlaka təqdim edilən ətlərin baytarlıq müşayiətedici sənədlərinin olmadığı aşkarlanıb. Ət və ət məhsullarından, alət və avadanlıqlardan götürülmüş nümunələrin laborator müayinəsi nəticəsində uyğunsuzluqlar müəyyən edilib. Faktla bağlı nöqsanlar aradan qaldırılanadək ictimai iaşə obyektində işlərin görülməsi, xidmətlərin göstərilməsi məhdudlaşdırılıb, rəhbərliyi barəsində inzibati protokol tərtib olunub.
Xırdalanda ictimai iaşə obyektində normativ tələblərin pozulduğu aşkarlanıb
Qida Təhlükəsizliyi Agentliyinin əməkdaşları Xırdalan şəhəri, S.Bəhlulzadə küçəsində fəaliyyət göstərən, fiziki şəxs Məmmədov Məmməd Tofiq oğluna məxsus “Məhəllə” kafesində yoxlama keçirib. Baxış zamanı kafedə qida təhlükəsizliyi sahəsində texniki normativ hüquqi aktların tələblərinin pozulduğu, sanitar-gigiyenik və sanitar-texniki vəziyyətin qənaətbəxş olmadığı aşkarlanıb. Etiket məlumatları və müvafiq müşayiətedici sənədləri olmayan məhsulların satışa çıxarıldığı müəyyən edilib. Faktla bağlı nöqsanlar aradan qaldırılanadək kafenin fəaliyyəti məhdudlaşdırılıb, rəhbəri barəsində inzibati qərar qəbul edilərək cərimə tətbiq olunub.
Bərdədə bazarda nöqsanlar aşkarlanıb
Qida Təhlükəsizliyi Agentliyinin əməkdaşları tərəfindən Bərdə rayonu, Güloğlular kəndində fəaliyyət göstərən “Ticarət Mərkəzi” MMC-yə məxsus bazarda keçirilmiş yoxlama zamanı aşkarlanan nöqsanların icra vəziyyəti ilə bağlı yenidən yoxlama keçirilib. Baxış zamanı bazarda süd və süd məhsullarının mənşəyinin məlum olmadığı və temperatur rejiminə əməl edilmədiyi, məhsulların açıq şəkildə satışa çıxarıldığı, işçilərin gigiyena qaydalarına diqqət yetirmədiyi və xüsusi geyimlə təmin edilmədiyi, əl yuma çanaqlarının mövcud olmadığı və digər nöqsanlar müəyyən edilib. Faktla bağlı sahibkar barəsində inzibati protokol tərtib edilib, qeyd edilən məhsullar satışdan kənarlaşdırılıb və icrası məcburi göstərişlər verilib.
