Giriş
AQTİ mütəxəssisləri beynəlxalq təlimə cəlb edilib
13 Avqust 2021 14:08
Qida təhlükəsizliyi sahəsində kadr potensialının gücləndirilməsi, bu sahədə fəaliyyət göstərən əməkdaşların peşəkarlıqlarının artırılması məqsədilə Azərbaycan Qida Təhlükəsizliyi İnstitutunun (AQTİ) mütəxəssislərinin mütəmadi olaraq yerli və beynəlxalq təlimlərdə iştirakı təmin edilir.
Növbəti belə təlim 2021-ci il 10-12 avqust tarixlərində İslam Ölkələrinin Statistik, Sosial-İqtisadi Tədqiqatlar və Təlim Mərkəzi (SESRIC) tərəfindən Kənd Təsərrüfatı və Qida Təhlükəsizliyi Potensialının Gücləndirilməsi Proqramı (Agri-CaB) çərçivəsində “Qida tullantılarının azaldılması” mövzusunda keçirilib. Təlimlər Malayziya Kənd Təsərrüfatı və Qida Sənayesi Nazirliyi ilə Malayziya Qatı Tullantıların İdarə Edilməsi və İctimai Təmizlik Korporasiyasının (SWCorp) mütəxəssisləri tərəfindən tədris olunub. Təlimdə İslam Əməkdaşlıq Təşkilatına (İƏT) üzv 25 ölkənin müvafiq dövlət qurumlarından 100-dək mütəxəssis iştirak edib.
Təlim məhsul yığımı, məhsul yığımından sonrakı emal, pərakəndə satış və istehlak mərhələləri də daxil olmaqla, istehsal və təchizat zəncirlərində qida itkisi və tullantılarının (FLW) idarə olunması və nəzarəti məqsədilə keçirilib. Təlimdə qida tullantılarının kompostu və heyvan yemi ilə bağlı Malayziya təcrübələri, habelə resurslardan daha səmərəli istifadə və qida sektorunun davamlılığını təmin etmək üçün strategiya və maarifləndirmə proqramlarından bəhs olunub. Həmçinin ərzaq təhlükəsizliyinin dünyanın bir çox ölkələrində, eləcədə İƏT-yə üzv olan bir çox ölkələr üçün də ciddi bir problem olduğu vurğulanıb. Bildirilib ki, İƏT üzv ölkələrinin ərzaq təhlükəsizliyinin təmin edilməsində qida itkisi və tullantılarının səmərəli idarə edilməsi və nəzarəti olduqca vacibdir.
Sonda mövzularla bağlı müvafiq təqdimatlar verilib, müxtəlif təcrübələr bölüşülüb. Daha sonra iştirakçılar beynəlxalq sertifikatlarla təmin edilib.
Oxşar xəbərlər
Xankəndi və Xocalıda zərərvericilərə qarşı maarifləndirmə tədbirləri keçirilib
Azərbaycan Respublikası Qida Təhlükəsizliyi Agentliyinin əməkdaşları tərəfindən Xankəndi şəhərində, eləcə də Xocalı rayonunun Şuşakənd, Malıbəyli və Quşçular kəndlərində fitosanitar nəzarət və maarifləndirmə tədbirləri keçirilib. Tədbirlərin əsas məqsədi qəhvəyi mərmər bağacığı və Amerika ağ kəpənəyinin ölkə ərazisində yayılmasının qarşısının alınması, bu zərərvericilərin vaxtında aşkar edilməsi və sakinlərin bu sahədə məlumatlılıq səviyyəsinin artırılmasıdır. Yerli sakinlərə karantin tətbiq edilən zərərvericilərin bioloji xüsusiyyətləri, yayılma yolları, xarakterik əlamətləri, habelə kənd təsərrüfatı bitkilərinə və yaşıllıqlara vura biləcəyi zərərlər barədə ətraflı məlumat verilib. Zərərvericilərin yayılmasının qarşısını almaq üçün xüsusilə payız-qış mövsümündə həyata keçirilməsi tövsiyə olunan mexaniki və profilaktik mübarizə tədbirləri izah olunub. Tədbirlər çərçivəsində zərərvericilərin vaxtında müəyyən edilməsi, onların mümkün yayılma ocaqlarının aşkarlanması və müvafiq mübarizə tədbirlərinin görülməsinin əhəmiyyəti diqqətə çatdırılıb, sakinlərə maarifləndirici çap materialları paylanıb.
Amerika ağ kəpənəyi və Qəhvəyi mərmər bağacığı ilə bağlı maarifləndirmə tədbirləri davam etdirilir
Amerika ağ kəpənəyi və Qəhvəyi mərmər bağacığının ölkə ərazisində yayılmasının qarşısının alınması və zərərvericilərlə mübarizə məqsədilə Azərbaycan Respublikasının Qida Təhlükəsizliyi Agentliyi tərəfindən fitosanitar nəzarət və maarifləndirmə tədbirləri davam etdirilir. Zərərvericilərə qarşı bitki mühafizəsi tədbirləri çərçivəsində Şəki-Zaqatala regional bölməsinin əməkdaşları tərəfindən Oğuz rayonunun Bucaq, Bayan, Qəbələ rayonunun isə Mirzəbəyli kəndlərində sakinlərlə maarifləndirici görüşlər keçirilib. Görüşlər zamanı zərərvericilərin bioloji xüsusiyyətləri, yayılma səbəbləri, bitkilərə vurduğu zərər, xüsusilə Amerika ağ kəpənəyinin tırtıl mərhələsində yaratdığı təhlükə və ona qarşı mübarizə tədbirləri barədə vətəndaşlara məlumat verilib. Eyni zamanda, zərərvericilərin vaxtında aşkarlanmasının və onların yayılmasının qarşısının alınması məqsədilə mütəmadi müşahidə və monitorinqlərin aparılmasının vacibliyi diqqətə çatdırılıb. Tədbirlər çərçivəsində kənd sakinlərinə zərərvericilərlə bağlı maarifləndirici bukletlər təqdim olunub, onların sualları cavablandırılıb və müvafiq fitosanitar tələblərə əməl olunması ilə bağlı tövsiyələr verilib.
Qəhvəyi mərmər bağacığı ilə bağlı maarifləndirmə tədbirləri davam etdirilir
Qəhvəyi mərmər bağacığının ölkə ərazisində yayılmasının qarşısının alınması məqsədilə Qida Təhlükəsizliyi Agentliyi tərəfindən fitosanitar nəzarət və maarifləndirmə tədbirləri davam etdirilir. Zərərvericiyə qarşı bitki mühafizəsi tədbirləri çərçivəsində Quba-Xaçmaz regional bölməsinin əməkdaşları tərəfindən Xaçmaz rayonunun Arzu kəndində kənd sakinləri ilə maarifləndirici görüşlər keçirilib. Görüşlər zamanı qəhvəyi mərmər bağacığının payız aylarında açıq sahələri tərk edərək qışlama məqsədilə evlərə, anbarlara və digər qapalı tikililərə toplanması barədə sakinlərə məlumat verilib. Eyni zamanda, zərərvericinin sayının azaldılmasında effektiv üsullardan biri olan mexaniki mübarizə tədbirləri və onların tətbiqi qaydaları izah edilib, kənd sakinlərinə qəhvəyi mərmər bağacığı haqqında məlumat kitabçaları paylanıb.
