Giriş
AQTİ qida təhlükəsizliyi üzrə peşəkar layihələndirmə xidməti təklif edir
15 Aprel 2021 14:45
Azərbaycan Qida Təhlükəsizliyi İnstitutu (AQTİ) qida sahəsində fəaliyyət göstərən sahibkarlıq subyektlərinə qida təhlükəsizliyi üzrə peşəkar layihələndirmə xidməti təklif edir.
Layihələndirmə xidməti sahibkarlıq subyektinin yaradılmasından əvvəl qida təhlükəsizliyi ilə bağlı normativ texniki sənədlərin işlənib hazırlanması, həmçinin istehsal prosesinin texnoloji təşkilini əhatə edir. Xidmət çərçivəsində yerli və beynəlxalq standartlara uyğun olaraq müəssisənin layihələndirilməsi, istehsal istiqamətindən asılı olaraq texnoloji axının qurulması, çirkli və təmiz zonaların qurulması və zonalararası sanitar keçidlərin təyini, tullantıların idarə olunması sisteminin tətbiqi həyata keçirilir. Eyni zamanda xidmətdən istifadə edən sahibkarlıq subyektləri üçün havalandırma sistemi, su təchizati və kanalizasiya sistemi texnoloji cəhətdən layihələndirilir.
Peşəkar mütəxəssislər tərərfindən təklif olunan emal müəssisəsi, anbar, ictimai iaşə müəssisəsi və digər obyektlərin layihələndirilməsi zamanı bütün proseslərdə qida təhlükəsizliyinin qorunması, həmçinin layihənin beynəlxalq qida təhlükəsizliyi norma və aktlarına uyğunluğu təmin olunur. Qida emalı müəssisələrinin beynəlxalq və yerli qida təhlükəsizliyi qanunvericiliyi normaları üzrə layihələndirilməsi qida emalı üzrə əməliyyatların texnoloji ardıcıllığa uyğun qurulmasına imkan yaradır.
Qida sahəsində fəaliyyət göstərən sahibkarlıq subyektləri qida təhlükəsizliyi üzrə peşəkar layihələndirmə xidmətindən istifadə etmək üçün İnstitutun (012) 377-00-20 (daxili 553) nömrəli əlaqə vasitəsilə müraciət edə bilərlər.
Qeyd edək ki, AQTİ qida sahəsində fəaliyyət göstərən sahibkarlıq subyektlərinə qida təhlükəsizliyinə dair elmi, texniki və praktiki konsultasiya, həmçinin qida təhlükəsizliyi göstəriciləri üzrə tədqiqat xidmətləri göstərir.
Oxşar xəbərlər
AQTA əməkdaşı badminton yarışında yer tutub
Gənclər və İdman Nazirliyi və Badminton Federasiyasının birgə təşkilatçılığı ilə dövlət qurumlarının əməkdaşları arasında badminton yarışı keçirilib. Qida Təhlükəsizliyi Agentliyinin İdxal və ixraca nəzarət şöbəsinin əməkdaşı Cavid Əlizadə kişilər arasında 2-ci yeri qazanıb. Yarışda ümumilikdə 10 dövlət qurumunu təmsil edən 12 kişi və 6 qadın iştirak edib.
AQTA-da tələbələr istehsalat təcrübəsi keçib
Azərbaycan Dövlət Aqrar Universitetinin (ADAU) tələbələri Azərbaycan Respublikasının Qida Təhlükəsizliyi Agentliyində istehsalat təcrübəsi keçiblər. Təcrübə proqramı çərçivəsində tələbələr ilkin istehsal müəssisələrində, o cümlədən istixanalarda aparılan monitorinqlərdə iştirak ediblər. Monitorinqlər zamanı onlar bitkiçilik məhsullarının ilkin istehsalı prosesi, istehsal sahələrində sanitar-gigiyenik vəziyyətin qiymətləndirilməsi və qida təhlükəsizliyi tələblərinə əməl olunması istiqamətində həyata keçirilən tədbirlərlə yerində tanış olublar. Tələbələr ilkin istehsal mərhələsində qida təhlükəsizliyinin təmin edilməsi, eləcə də mümkün risklərin müəyyənləşdirilməsi və qarşısının alınması istiqamətində praktiki biliklər əldə ediblər. Eyni zamanda, nəzəri biliklərinin praktikada tətbiqi, monitorinq prosesinin təşkili və müvafiq tələblərin icrası ilə bağlı təcrübə əldə ediblər. Bu cür təcrübə proqramları gələcək aqrar sahədə mütəxəssislərin peşə hazırlığının gücləndirilməsi, praktiki bilik və bacarıqlarının inkişaf etdirilməsi, həmçinin qida təhlükəsizliyi ilə bağlı ixtisaslı kadr potensialının artırılması baxımından mühüm əhəmiyyət daşıyır.
İdxal olunan baytarlıq preparatında uyğunsuzluq aşkarlanıb
Azərbaycan Respublikasının Qida Təhlükəsizliyi Agentliyi tərəfindən həyata keçirilən nəzarət tədbirləri zamanı "Spektra-Vet" MMC-nin respublikamıza idxal etdiyi baytarlıq preparatlarının sınaq nəticələrində uyğunsuzluq aşkarlanıb. Belə ki, Çin Xalq Respublikasından idxal edilən “Farmazin Tylo” əmtəə nişanlı baytarlıq preparatı məhsul partiyasından götürülmüş nümunələrdə pH göstəricisinin normativ texniki tələblərə cavab vermədiyi müəyyən edilib. Uyğunsuzluqla əlaqədar qanunvericiliyə müvafiq qərar qəbul edilərək, 5010 ədəd 50 ml-lik, 3006 ədəd 100 ml-lik məhsul məhv edilib.
