Giriş
AQTİ su nümunəsində parametrlərin müayinəsi üzrə laboratoriyalararası səriştəlilik sınağına start verib
6 Avqust 2024 12:21
Azərbaycan Qida Təhlükəsizliyi İnstitutu (AQTİ) ölkədə fəaliyyət göstərən laboratoriyalar üçün səriştəlilik sınaqlarını davam etdirir.
Su nümunəsində codluq, xloridlər, konduktivlik və pH parametrlərinin müayinəsi üzrə növbəti səriştəlilik sınağına qatılmaq üçün 31 avqust 2024-cü il İnstituta sonuncu müraciət tarixi müəyyən olunub. Bu səriştəlilik sınağının proqramı ilə AQTİ-nin rəsmi saytı (afsi.gov.az) vasitəsilə tanış olmaq mümkündür. Saytda yaradılan “Səriştəlilik sınaqları” adlı bölmədə bu səriştəlilik sınağının proqramı və laboratoriyaların həmin sınaqda iştirak etməsi üçün lazım olan sənədlər (“Müraciət forması”, “Nəticələrin qeydiyyat forması”) yerləşdirilib. Laboratoriyaların sınaqda iştirakını təmin etməkdən ötrü saytdakı müvafiq bölmədə yerləşdirilən “Müraciət forması” doldurularaq info.pt@afsa.gov.az elektron poçtuna göndərilməlidir. Sınaqlar yekunlaşdıqdan sonra isə nəticələr “Nəticələrin qeydiyyat forması” doldurularaq eyni ünvana yollanmalıdır.
Səriştəlilik sınaqlarının nəticələri İnstitutun saytında yerləşdiriləcək. Laboratoriyaların nəticələri konfidensiallığı qorumaq məqsədilə individual laboratoriya nömrələri ilə açıqlanacaq.
Qeyd edək ki, sınaqlar ISO 17043 “Uyğunluğun Qiymətləndirilməsi-Səriştəlilik Sınaqlarına Ümumi Tələblər" standartı əsasında təşkil edilir və qiymətləndirmələr bu standartın tələblərinə əsasən beynəlxalq standartlara uyğun olaraq aparılır. “Qida təhlükəsizliyi haqqında” Azərbaycan Respublikası Qanununa əsasən təşkil olunan sınaqların məqsədi laboratoriyalar üçün səriştəliliklərini qiymətləndirmək imkanını yaratmaqdan ibarətdir. Müvafiq Qanuna əsasən, dövlət nəzarəti və tənzimlənməsi tədbirləri çərçivəsində, habelə bu qanunla müəyyən edilmiş icazələrin verilməsi üçün götürülmüş nümunələrin tədqiqi (sınağı) yalnız “Uyğunluğun qiymətləndirilməsi sahəsində akkreditasiya haqqında” Azərbaycan Respublikası Qanununda nəzərdə tutulmuş qaydada akkreditasiyadan keçmiş laboratoriyalarda aparılmalıdır.
Oxşar xəbərlər
AQTA əməkdaşları arasında Ümumdünya Qida Təhlükəsizliyi Gününə həsr olunmuş minifutbol turniri keçirilib
Azərbaycan Qida Təhlükəsizliyi Agentliyinin əməkdaşları arasında Ümumdünya Qida Təhlükəsizliyi Gününə həsr olunmuş minifutbol turnirinin final mərhələsi keçirilib. Əvvəlcə 3-cü yer uğrunda “Qazax-Tovuz RB” və “AQTİ B” komandaları mübarizə aparıb. “Qazax-Tovuz RB” 3-1 hesabı ilə qalib gələrək turnirin bürünc medalını qazanıb. Final oyununda isə “Bakı RB A” ilə “AQTİ A” komandaları üz-üzə gəlib. Gərgin mübarizə şəraitində keçən qarşılaşma “Bakı RB A”nın 3-2 hesablı qələbəsi ilə başa çatıb. Beləliklə, “Bakı RB A” komandası turnirin qalibi olaraq qızıl, “AQTİ A” isə gümüş medala layiq görülüb. Turnirin sonunda rəsmi mükafatlandırma mərasimi keçirilib. Yarışda yer tutan komandalara medal və diplomlar təqdim olunub. Agentliyin rəhbərliyi çempionatda iştirak edən bütün komandaları təbrik edib, belə idman tədbirlərinin əməkdaşlar arasında həmrəylik və sağlam rəqabət mühitinin formalaşmasında mühüm rol oynadığını vurğulayıb. Qeyd edək ki, Agentliyin Birləşmiş Həmkarlar İttifaqı Komitəsinin təşkilatçılığı ilə keçirilən turnirin əsas məqsədi işçilər arasında sağlam həyat tərzinin təşviqi, bədən tərbiyəsi və idmanın əhəmiyyətinin təbliği, eləcə də əməkdaşların asudə vaxtlarının səmərəli şəkildə təşkil olunması və əməkdaşlar arasında sağlam rəqabət mühitinin yaradılması olub.
Azərbaycandan Çinə quş əti məhsullarının ixracı imkanları müzakirə edilib
Ölkəmizdən Çin Xalq Respublikasına quş əti və quş əti məhsullarının ixracı ilə bağlı müvafiq tədbirlər davam etdirilir. Hazırda bu çərçivədə AQTA ilə Çinin Baş Gömrük Administrasiyası arasında müvafiq işlər görülməkdədir Eyni zamanda, Çinə həmin məhsulların ixracını həyata keçirmək istəyən quş əti istehsalçıları ilə görüş keçirilib və bu ölkənin idxal tələbləri barədə ətraflı məlumatlar verilib.
AQTA əməkdaşı EPPO-nun tədbirində iştirak edib
Özbəkistanın paytaxtı Daşkənddə Bitki Karantini və Mühafizəsi üzrə Avropa və Aralıq Dənizi Təşkilatının (EPPO) Bitki Mühafizə Vasitələri üzrə İşçi Qrupunun 55-ci iclası keçirilib. Tədbirdə Qida Təhlükəsizliyi Agentliyinin əməkdaşı Cavidan Quliyev iştirak edib. İclasda pestisidlərin effektivliyinin qiymətləndirilməsi, beynəlxalq standartların yenilənməsi, preparatların istifadəsi zamanı insan sağlamlığı və ətraf mühitin qorunması məsələləri müzakirə olunub, gələcək əməkdaşlıq istiqamətləri müəyyənləşdirilib. Tədbirdə “Azərbaycanda pestisidlərin qeydiyyatı və dövriyyəsinə nəzarət” mövzusunda təqdimatlar olunub.
