Giriş
AQTİS-də yeni yaradılmış modullar və yeniliklərlə bağlı sahibkarlar arasında məlumatlandırma xarakterli görüşlər davam edir
29 Aprel 2022 16:55
Azərbaycan Respublikasının Qida Təhlükəsizliyi Agentliyi (AQTA) Avtomatlaşdırılmış Qida Təhlükəsizliyi İnformasiya Sistemində (AQTİS) yeni yaradılmış modullar və yeniliklərlə bağlı sahibkarlar arasında məlumatlandırma və yeniliklərlə tanışlıq xarakterli görüşlərin təşkilini davam etdirir. Bu istiqamətdə növbəti onlayn görüş baytarlıq nəzarətində olan qeyri-qida məhsullarının idxalçıları ilə keçirilib.
Görüşdə AQTA-da innnovativ həllərin tətbiqi ilə fəaliyyətin daha səmərəli təşkili, o cümlədən elektron xidmətlərin sayı və keyfiyyətinin artırılması ilə bağlı görülən işlər haqqında sahibkarlara geniş məlumat verilib. Bildirilib ki, AQTİS-də idxal modulunda yeni yaradılmış xidmətlər və tətbiq olunan yeniliklər digər sahələrdə olduğu kimi, baytarlıq sahəsini də əhatə edir. Bundan sonra “Baytarlıq preparatları, yem və yem əlavələrinin idxalına icazə rəyi”, “İdxal olunan diri heyvanlara baytarlıq idxal icazəsi” və “Heyvan mənşəli xammal və törəmə materiallarının idxalına icazə rəyi” üçün müraciətlərin qəbulu elektron qaydada aparılacaq və bu yenilik may ayının 16-dan etibarən AQTİS üzərindən “Şəxsi kabinet” vasitəsilə həyata keçiriləcək. Bu da öz növbəsində sahibkarlara vaxta qənaət, operativ məlumat mübadiləsi, sürətli icranın təmin olunması, şəffaflıq və izlənmə mexanizminin formalaşdırılması və s. kimi geniş imkanlar yaradacaq.
Görüşdə qeyd edilib ki, Agentlik rəqəmsal idarəçilik həlləri və elektron xidmətləri təkmilləşdirməklə, öz fəaliyyətində şəffaflığın təmin edilməsi, bununla da sahibkarlıq subyektlərinin fəaliyyətinin daha da optimallaşdırılması, eyni zamanda onlara dəstək verilməsi istiqamətində aparılan işlərin sürətləndirilməsi üzrə tədbirləri davam etdirəcək.
Oxşar xəbərlər
Xankəndi və Xocalıda zərərvericilərə qarşı maarifləndirmə tədbirləri keçirilib
Azərbaycan Respublikası Qida Təhlükəsizliyi Agentliyinin əməkdaşları tərəfindən Xankəndi şəhərində, eləcə də Xocalı rayonunun Şuşakənd, Malıbəyli və Quşçular kəndlərində fitosanitar nəzarət və maarifləndirmə tədbirləri keçirilib. Tədbirlərin əsas məqsədi qəhvəyi mərmər bağacığı və Amerika ağ kəpənəyinin ölkə ərazisində yayılmasının qarşısının alınması, bu zərərvericilərin vaxtında aşkar edilməsi və sakinlərin bu sahədə məlumatlılıq səviyyəsinin artırılmasıdır. Yerli sakinlərə karantin tətbiq edilən zərərvericilərin bioloji xüsusiyyətləri, yayılma yolları, xarakterik əlamətləri, habelə kənd təsərrüfatı bitkilərinə və yaşıllıqlara vura biləcəyi zərərlər barədə ətraflı məlumat verilib. Zərərvericilərin yayılmasının qarşısını almaq üçün xüsusilə payız-qış mövsümündə həyata keçirilməsi tövsiyə olunan mexaniki və profilaktik mübarizə tədbirləri izah olunub. Tədbirlər çərçivəsində zərərvericilərin vaxtında müəyyən edilməsi, onların mümkün yayılma ocaqlarının aşkarlanması və müvafiq mübarizə tədbirlərinin görülməsinin əhəmiyyəti diqqətə çatdırılıb, sakinlərə maarifləndirici çap materialları paylanıb.
Amerika ağ kəpənəyi və Qəhvəyi mərmər bağacığı ilə bağlı maarifləndirmə tədbirləri davam etdirilir
Amerika ağ kəpənəyi və Qəhvəyi mərmər bağacığının ölkə ərazisində yayılmasının qarşısının alınması və zərərvericilərlə mübarizə məqsədilə Azərbaycan Respublikasının Qida Təhlükəsizliyi Agentliyi tərəfindən fitosanitar nəzarət və maarifləndirmə tədbirləri davam etdirilir. Zərərvericilərə qarşı bitki mühafizəsi tədbirləri çərçivəsində Şəki-Zaqatala regional bölməsinin əməkdaşları tərəfindən Oğuz rayonunun Bucaq, Bayan, Qəbələ rayonunun isə Mirzəbəyli kəndlərində sakinlərlə maarifləndirici görüşlər keçirilib. Görüşlər zamanı zərərvericilərin bioloji xüsusiyyətləri, yayılma səbəbləri, bitkilərə vurduğu zərər, xüsusilə Amerika ağ kəpənəyinin tırtıl mərhələsində yaratdığı təhlükə və ona qarşı mübarizə tədbirləri barədə vətəndaşlara məlumat verilib. Eyni zamanda, zərərvericilərin vaxtında aşkarlanmasının və onların yayılmasının qarşısının alınması məqsədilə mütəmadi müşahidə və monitorinqlərin aparılmasının vacibliyi diqqətə çatdırılıb. Tədbirlər çərçivəsində kənd sakinlərinə zərərvericilərlə bağlı maarifləndirici bukletlər təqdim olunub, onların sualları cavablandırılıb və müvafiq fitosanitar tələblərə əməl olunması ilə bağlı tövsiyələr verilib.
Qəhvəyi mərmər bağacığı ilə bağlı maarifləndirmə tədbirləri davam etdirilir
Qəhvəyi mərmər bağacığının ölkə ərazisində yayılmasının qarşısının alınması məqsədilə Qida Təhlükəsizliyi Agentliyi tərəfindən fitosanitar nəzarət və maarifləndirmə tədbirləri davam etdirilir. Zərərvericiyə qarşı bitki mühafizəsi tədbirləri çərçivəsində Quba-Xaçmaz regional bölməsinin əməkdaşları tərəfindən Xaçmaz rayonunun Arzu kəndində kənd sakinləri ilə maarifləndirici görüşlər keçirilib. Görüşlər zamanı qəhvəyi mərmər bağacığının payız aylarında açıq sahələri tərk edərək qışlama məqsədilə evlərə, anbarlara və digər qapalı tikililərə toplanması barədə sakinlərə məlumat verilib. Eyni zamanda, zərərvericinin sayının azaldılmasında effektiv üsullardan biri olan mexaniki mübarizə tədbirləri və onların tətbiqi qaydaları izah edilib, kənd sakinlərinə qəhvəyi mərmər bağacığı haqqında məlumat kitabçaları paylanıb.
