Giriş
AQTİS-də yeni yaradılmış modullar və yeniliklərlə bağlı sahibkarlar məlumatlandırılıb
20 Aprel 2023 09:50
Azərbaycan Respublikasının Qida Təhlükəsizliyi Agentliyi (AQTA) Avtomatlaşdırılmış Qida Təhlükəsizliyi İnformasiya Sistemində (AQTİS) yeni yaradılmış modullar və yeniliklərlə bağlı sahibkarlar arasında məlumatlandırma və yeniliklərlə tanışlıq xarakterli görüşlərin təşkilini davam etdirir. Bu istiqamətdə növbəti onlayn görüş baytarlıq sahəsində fəaliyyət göstərən sahibkarlarla keçirilib.
Görüşdə AQTA-da innnovativ həllərin tətbiqi ilə fəaliyyətin daha səmərəli təşkili, o cümlədən elektron xidmətlərin sayı və keyfiyyətinin artırılması ilə bağlı görülən işlər haqqında sahibkarlara geniş məlumat verilib.
Görüş zamanı baytarlıq preparatlarının, yem və yem əlavələrinin dövlət qeydiyyatına alınması üçün müraciətlərin qəbulunun elektron qaydada aparılacağı və bu yeniliyin AQTİS üzərindən “Şəxsi kabinet” vasitəsilə həyata keçiriləcəyi bildirilib. Sahibkarların “Şəxsi kabinet”lərinə daxil olaraq “Baytarlıq preparatının (yem və yem əlavəsinin) qeydiyyatı (yenidən qeydiyyatı) və qeydiyyat şəhadətnaməsinin verilməsi” üzrə elektron ərizə forması ilə müraciət etmələrinin zəruriliyi diqqətə çatdırılıb. Eyni zamanda müraciət edilmə qaydası, sözügedən iş prosesi üzrə icra mərhələlərinin ardıcıllığı, iş prosesinin gedişi zamanı qanunvericiliyə əsasən tələb olunan sənəd toplusu və nümunələrin təqdim ediləbilmə qaydası barədə ətraflı məlumat verilib.
Daha sonra bu istiqamətdə maarifləndirmə işlərinin davam edəcəyi, nəzərdə tutulan yeniliklər və qanunvericilik aktlarının tələblərinə əsasən digər məsələlər barədə dövri olaraq sahibkarların “Şəxsi kabinet”lərinə məlumat xarakterli bildirişlərin göndəriləcəyi vurğulanıb.
Sonda görüş iştirakçılarının sualları cavablandırılıb və təklifləri dinlənilib.
Oxşar xəbərlər
Marketdə istehlaka yararsız qida məhsulları aşkarlanıb
Daxil olan müraciət əsasında Masallı rayonu, Köhnə Alvadı kəndində fəaliyyət göstərən, Abuşov Ümid Alış oğluna məxsus “Alış” marketdə Qida Təhlükəsizliyi Agentliyinin əməkdaşları tərəfindən keçirilmiş plandankənar yoxlama zamanı normativ tələblərin pozulduğu müəyyən olunub. Belə ki, ticarət obyektində istifadə müddəti bitmiş müxtəlif əmtəə nişanlı qida məhsulları (qənnadı, makaron, süd, kolbasa) aşkarlanıb. İstifadə müddəti bitmiş məhsulların satışının qarşısı alınıb və faktla bağlı qanunvericiliyə uyğun müvafiq tədbirlər görülüb.
Dünyadakı epizootik vəziyyətə uyğun olaraq müvafiq tədbirlər görülür
Azərbaycan Respublikasının Qida Təhlükəsizliyi Agentliyi başqa ölkələrdən respublikamızın ərazisinə keçə biləcək yoluxucu heyvan xəstəliklərindən qorunmaq məqsədilə Ümumdünya Heyvan Sağlamlığı Təşkilatından daxil olan məlumatlar əsasında dünyadakı epizootik vəziyyətə uyğun olaraq müvafiq tədbirlər həyata keçirir. Ümumdünya Heyvan Sağlamlığı Təşkilatının (WOAH) rəsmi məlumatlarına əsasən, Portuqaliya Respublikasının Lissabon dairəsində, Filippin Respublikasının Şimali Kamarines əyalətində, Amerika Birləşmiş Ştatlarının isə Missuri, Alabama, Kanzas, Viskonsin ştatlarında yüksək patogen quş qripi xəstəliyi qeydə alınıb. Respublika ərazisinin qeyd olunan yoluxucu xəstəlikdən qorunması üçün Lissabon dairəsində, Şimali Kamarines əyalətində və Missuri, Alabama, Kanzas, Viskonsin ştatlarında zonalaşma prinsipi nəzərə alınmaqla, xəstəlik baş vermiş təsərrüfatdan 10 km radiusda olan məsafədə yerləşən müəssisələrdən diri quş və inkubasiya yumurtalarının, quş ətinin, tərkibində quş emalı məhsulları olan quş ətindən və bütün növ quşçuluq məhsulundan alınan hazır ət məhsullarının (quş qripi viruslarının məhv edilməsini təmin edən termik emala məruz qalan mallar istisna olmaqla), quş yemləri və quş üçün yem əlavələrinin (bitki mənşəli, kimyəvi və mikrobioloji sintez yolu ilə alınmış yemlər və yem əlavələri istisna olmaqla), quşların saxlanması, kəsilməsi və emalı üçün istifadə olunmuş avadanlıqların idxalına WOAH-nin “Quruda yaşayan heyvanların sağlamlıq Məcəlləsi”nə uyğun olaraq müvəqqəti məhdudiyyət tətbiq olunub. Eyni zamanda nəzarət tədbirlərinin gücləndirilməsi məqsədilə qeyd olunan inzibati ərazi vahidlərindən gələn, yaxud tranzitlə keçib respublikamıza daxil olan, habelə respublika ərazisindən tranzitlə digər ölkələrə gedən nəqliyyat vasitələri ilə bağlı müvafiq tədbirlərin görülməsi üçün Azərbaycan Respublikasının Dövlət Gömrük Komitəsinə müraciət olunub.
Bakıda nöqsanlar aşkarlanan ictimai iaşə müəssisəsinin fəaliyyəti məhdudlaşdırılıb
Qida Təhlükəsizliyi Agentliyinin əməkdaşları tərəfindən Bakı şəhəri, Qaradağ rayonu, Müşfiqabad qəsəbəsi ərazisində fəaliyyət göstərən fiziki şəxs Abbasov Zahir Həsən oğluna məxsus “Ay işığı” ictimai iaşə müəssisəsinin plandankənar yoxlama keçirilib. Yoxlama zamanı ictimai iaşə müəssisəsində qida təhlükəsizliyi sahəsində texniki normativ hüquqi aktların, həmçinin sanitariya norma və qaydalarının bir sıra tələblərinin pozulduğu aşkarlanıb. Belə ki, müəssisənin qida təhlükəsizliyi qeydiyyatından keçmədiyi, ayrıca manqal sahəsinin təşkil edilmədiyi, mətbəx sahəsinin divar, döşəmə və tavan səthlərinin su keçirməyən, yuyula bilən, yuyucu maddələrin və dezinfeksiyaedici vasitələrin təsirinə davamlı materiallarından üzlənmədiyi, havalandırma sisteminin quraşdırılmadığı, ayrıca yuma çanaqlarının təşkil olunmadığı, ağzı kip bağlanan, qoxu yaymayan tullantı qablarından istifadə edilmədiyi, işçilərin tibbi müayinədən keçmədiyi, xüsusi geyimlə təmin edilmədiyi, eyni zamanda gigiyenik təlimlərə cəlb olunmadığı, müvafiq təmizlik işlərinin aparılmadığı və digər nöqsanlar müəyyən olunub. Faktla bağlı fiziki şəxs barəsində inzibati protokol tərtib olunub, müəssisədə işlərin görülməsi və xidmətlərin göstərilməsinin dayandırılması barədə məhdudlaşdırıcı tədbirlərin tətbiqinə dair qərar qəbul edilib.
