Giriş
Avropa İttifaqının Azərbaycandakı nümayəndəliyinin əməkdaşı AQTİ laboratoriyalarının iş prinsipi ilə tanış olub
24 Sentyabr 2021 14:36
Avropa İttifaqının Azərbaycandakı nümayəndəliyinin proqram meneceri Rayner Freund Azərbaycan Qida Təhlükəsizliyi İnstitutunun (AQTİ) nəzdində fəaliyyət göstərən laboratoriyalara səfər edib. Səfərin məqsədi qida təhlükəsizliyi, heyvan və bitki sağlamlığının qorunması sahəsində Avropalı mütəxəssislərlə birgə əməkdaşlığın, təcrübə mübadiləsinin daha da genişləndirilməsidir.
Tanışlıq səfəri zamanı Aİ-nin ölkəmizdəki nümayəndəliyinin əməkdaşı ilə qarşılıqlı fikir mübadiləsi aparılıb, həmçinin AQTİ-nin fəaliyyət istiqamətləri barədə məlumat verilib. Qida təhlükəsizliyinin daha səmərəli təşkilini təmin etmək sahəsində Aİ-nin Azərbaycanda reallaşdırdığı uğurlu layihələrdən danışılıb.
Həm iş prinsipini öyrənmək, həm də müayinə metodları, ekspertiza və tədqiqat xidmətləri ilə yaxından tanış olmaq məqsədilə R. Freund AQTİ-nin nəzdində fəaliyyət göstərən laboratoriyalara baxış keçirib. Qonağa laboratoriyaların fəaliyyət istiqaməti, maddi-texniki bazası, eləcə də beynəlxalq təşkilatlarla əməkdaşlığı, səriştəlilik sınaqlarında əldə olunmuş yüksək nəticələr barədə ətraflı məlumat verilib.
Görüşdə qida təhlükəsizliyi, heyvan və bitki sağlamlığının daha səmərəli təşkilini təmin etmək baxımından Aİ ilə birgə əməkdaşlığın inkişaf etdirilməsi üzrə perspektivlər, bilik və bacarıqların mübadiləsi müzakirə olunub.
Oxşar xəbərlər
“İbrahim Kabab Evi” ictimai iaşə obyektində nöqsanlar aşkarlanıb
Bakı şəhəri, Nəsimi rayonu, H.Aslanov küçəsi, ev 85, m. 20 ünvanında fəaliyyət göstərən, fiziki şəxs Nəbiyev İbrahim Ağaisa oğluna məxsus “İbrahim Kabab Evi” ictimai iaşə obyektində Qida Təhlükəsizliyi Agentliyi tərəfindən keçirilmiş yoxlama zamanı normativ hüquqi aktların tələblərinin pozulduğu məlum olub. Baxış zamanı iaşə obyektində istehlaka təqdim edilən ətlərin baytarlıq müşayiətedici sənədlərinin olmadığı aşkarlanıb. Ət və ət məhsullarından, alət və avadanlıqlardan götürülmüş nümunələrin laborator müayinəsi nəticəsində uyğunsuzluqlar müəyyən edilib. Faktla bağlı nöqsanlar aradan qaldırılanadək ictimai iaşə obyektində işlərin görülməsi, xidmətlərin göstərilməsi məhdudlaşdırılıb, rəhbərliyi barəsində inzibati protokol tərtib olunub.
Xırdalanda ictimai iaşə obyektində normativ tələblərin pozulduğu aşkarlanıb
Qida Təhlükəsizliyi Agentliyinin əməkdaşları Xırdalan şəhəri, S.Bəhlulzadə küçəsində fəaliyyət göstərən, fiziki şəxs Məmmədov Məmməd Tofiq oğluna məxsus “Məhəllə” kafesində yoxlama keçirib. Baxış zamanı kafedə qida təhlükəsizliyi sahəsində texniki normativ hüquqi aktların tələblərinin pozulduğu, sanitar-gigiyenik və sanitar-texniki vəziyyətin qənaətbəxş olmadığı aşkarlanıb. Etiket məlumatları və müvafiq müşayiətedici sənədləri olmayan məhsulların satışa çıxarıldığı müəyyən edilib. Faktla bağlı nöqsanlar aradan qaldırılanadək kafenin fəaliyyəti məhdudlaşdırılıb, rəhbəri barəsində inzibati qərar qəbul edilərək cərimə tətbiq olunub.
Bərdədə bazarda nöqsanlar aşkarlanıb
Qida Təhlükəsizliyi Agentliyinin əməkdaşları tərəfindən Bərdə rayonu, Güloğlular kəndində fəaliyyət göstərən “Ticarət Mərkəzi” MMC-yə məxsus bazarda keçirilmiş yoxlama zamanı aşkarlanan nöqsanların icra vəziyyəti ilə bağlı yenidən yoxlama keçirilib. Baxış zamanı bazarda süd və süd məhsullarının mənşəyinin məlum olmadığı və temperatur rejiminə əməl edilmədiyi, məhsulların açıq şəkildə satışa çıxarıldığı, işçilərin gigiyena qaydalarına diqqət yetirmədiyi və xüsusi geyimlə təmin edilmədiyi, əl yuma çanaqlarının mövcud olmadığı və digər nöqsanlar müəyyən edilib. Faktla bağlı sahibkar barəsində inzibati protokol tərtib edilib, qeyd edilən məhsullar satışdan kənarlaşdırılıb və icrası məcburi göstərişlər verilib.
